今次介紹嘅係連鎖式洋麵屋「PEITRO」，店舖標榜健康好味嘅日式洋食，主打意粉、PIZZA、燴飯同甜品，喺東京、大阪等都有分店，但多數集中於九州，單單喺福岡就已經有18間！
門口個叔叔就係PEITRO嘅招牌公仔，見到佢就知冇去錯地方啦！
位於SORALIA PLAZA 6 樓嘅ピエトロ室內環境乾淨舒服，有書、畫等等作簡單裝飾，枱與枱之間夠闊落，一啲都唔會覺得焗促！
單單係意粉就已經有超多唔同款！激愛海鮮嘅大話B一打開Menu，3秒內就已經決定咗要order「蟹肉蟹味噌闊意粉」！蟹味噌其實即係蟹膏，想像吓成碟意粉都充滿蟹膏同蟹肉，係咪好幸福呢！
必食之一：「蟹肉蟹味噌闊意粉」
圖片來源：www.pietro.co.jp
意粉一上枱真係香到口水幾乎都流埋出嚟！闊意粉嘅軟硬度整得啱啱好，唔會太淋夠咬口，仲真材實料地有大大舊蟹肉放喺個麵上面，連唔鐘意食海鮮嘅朋友仔都舉起手指公大讚好食！（由於大話B掛住食，竟然唔記得影相，真失敗……唯有借官相一用）
必食之二：「鮮蝦海膽汁意粉」
「鮮蝦海膽汁意粉」都係呢度嘅必食推介，鮮蝦爽口彈牙，海膽大大件軟棉棉又夠鮮甜，金黃色嘅醤汁包住每一條意粉，啖啖都帶住濃郁嘅海膽味，膩而不油，鐘意食海鮮的話千祈唔好錯過！！
必食之三：「辣明太子三文魚籽海膽意粉」
而最後一個一定要試嘅就係「辣明太子三文魚籽海膽意粉」，每一條意粉都黐住好多細細粒嘅明太子，三文魚籽每一粒都脹卜卜，海膽唔洗講齋睇都知超新鮮！整體味道同想像中嘅一樣甘甜帶辣、爽口彈牙，搞到大話B同班朋友們都食到停唔到口！
如果想食多少少嘢，仲可以加錢轉做SET。加380円就可以食埋沙律同有杯飲品，加570円仲可以多個甜品。
呢個「Souffle Pancake」可以選擇唔同嘅醬汁，圖中嘅就係原味乳酪配楓糖漿。Pancake嘅質感有啲似麵包布甸，切開中間會乳酪流出，配埋鬆鬆軟軟嘅外層一齊食，嘩～恨不得多一個胃可以試晒唔同味嘅pancake！
呢度嘅Cheese Cake真係可以話係抵食夾大件，一碟竟然有兩舊！Cheese Cake口感好紮實，有好香濃嘅芝士味，好味到連減肥中嘅朋友仔都話要暫時放棄減肥計劃，一於食咗先算！
總結，大話B覺得今次3款意粉都非常值得一試，選擇困難重症者不妨參考一吓。另外，由於Cheese Cake真係比較大份，想試的話可以同同行者一齊share~
福岡洋麺ピエトロ ソラリア店
地址︰福岡縣福岡市中央區天神2-2-43(Soralia Plaza) ソラリアプラザビル6F
電話：092-733-7602
營業時間︰11:00～23:30 (L.O. 23:00)
前往方法︰西鉄福岡天神駅 ソラリアプラザ6階
官網：www.pietro.co.jp
撰文、圖片：HAMA大話B
About Post Author
