【注目度急上昇】最愛二次元籃球少女 廣瀨愛麗絲：我唔係混血兒！

其實廣瀨愛麗絲小學6年級嘅時候已經被經理人發掘，而當時嘅佢又曬到好黑，又係一個短頭髮嘅籃球少女，連佢經理人都話當時根本唔知佢係男仔定女仔！

睇番以前嘅相，同而家長頭髮嘅氣質都真係幾唔同！

 

而家係時裝雜誌Seventeen模特兒嘅佢，早幾年仲係以短頭髮登上大銀幕，同組合Sexy Zone成員中島健人一齊主演《鋼之鍊金術師》原作者荒川弘嘅作品《銀之匙》嘅真人化電影，飾演女主角御影亞紀。

 

因為比較似外國人嘅面容，加上個名叫愛麗絲，所以佢成日比人問係咪混血兒。不過佢本人都證實咗佢係100%日本人！其實佢廣瀨愛麗絲只係佢藝名，原名係叫大石麻由子。網民都話可能係佢社長就係想營造佢係混血兒嘅錯覺，然後話覺得呢招好成功添！（而廣瀨玲原名就係大石玲華）

 

望落的確有啲似外國人嘅氣質啊！

 

點解話佢最近注目度急上昇呢？除咗嚟緊呢年有一系列佢有份演重要角色嘅電影同舞台劇作品之外，佢啱啱出演嘅週末綜藝節目《時尚主義》都引起咗網民嘅迴響！

 

因為大家發現咗呢個靚靚青春女演員原來係個宅女，而且講嘅嘢仲引起一班二次元愛好者嘅共鳴！佢喺節目完全暴露咗佢身為漫畫愛好者嘅一面，仲要唔係一般明星話自己都鍾意睇漫畫嗰種，而係真真正正熱衷die hard嗰種！

 

節目中公開咗佢間房嘅書架，佢仲逐一介紹自己中意嘅漫畫同二次元商品，例如棒球漫畫《鑽石皇牌》，佢就話最中意聲優花江夏樹配音嘅角色春市。同時佢用緊嘅iPhone case同樣係花江配嘅角色、《東京喰種》嘅金木研。佢仲喺自己嘅2017月曆發布會度同記者承認金木小天使係佢最想交往嘅對象添！（少女，咁仲重口味嘅XD）

 

以下係佢最引起各位網民共鳴嘅一啲金句。愛麗絲就話自己去旅行或者要出trip拍攝時都會帶大量漫畫去解悶。「如果要留一晚就帶15本左右，三晚就帶3至40本。」當工作人員問點解佢唔睇電子版，佢就話：「我一定要睇紙製版嘅漫畫。漫畫，必須咁先好。」佢仲話非常享受一頁一頁揭落去嘅感覺，話電子版無論如何都取代唔到！最後工作人員仲影到佢購買大量漫畫，而佢仲話：「希望可以死時被漫畫包圍住。」

 

廣瀨愛麗絲呢個宅女嘅一面令好多觀眾同網民都感到意外，好多人都話估唔到呢個靚女係咁中意二次元，而且仲堅守自己嘅原則！大家紛紛話對佢改觀同好感度上升！最搞笑嘅係當記者問佢想唔想出演《東京喰種》真人版電影同金木研演對手戲嘅時候，佢竟然耍手擰頭話：「No，真人版電影同漫畫係唔同，係兩樣嘢。」（詳細訪問可以睇呢度）

 

 

妹妹廣瀨玲就試過幾次失言引起網民聲討，不過姐姐睇落就比較有常識，而且講嘅嘢都非常令網民受落～嚟緊佢仲會主演多套電影，例如同綾野剛拍嘅《新宿天鵝II》就演陪酒女郎、同山崎賢人合拍真人版電影《冰菓》，同埋日劇 《釣魚狂日記2》。雖然都有幾套係真人版電影，不過佢咁鍾意2次元，我諗佢識點做嘅！

 

《新宿天鵝II》預告，愛麗絲妹妹好似有突破性演出？

 

相信佢今年都會繼續上位，一於到時睇下佢嘅作品hit唔hit啦！