歡樂嘅時光過得特別快，又係時侯講byebye。差唔多嚟咗日本一個月，極速增肥嘅我仲未走得住，點解？因為池袋Sunshine City邀請我地嚟呢個期間限定嘅「沖繩物產展」。
講起沖繩，你可能會諗起苦瓜、啤酒、海葡萄、或者一個一個性感嘅比堅尼女郎。但沖繩嘅特產又點止咁少，即刻帶大家睇下現場先。
今次嘅「沖繩物產展」位於池袋Sunshine City4樓嘅展場入面，一入到去，規模比想像中大。現場有超過四十多個店家參展。
除咗食物之外，仲有唔同類型嘅產品好似飾物，甚至護膚品都有。
護膚品有沖繩代表海藻深層清潔面膜同埋月桃葉精華。海藻面膜經姐姐介紹話可以清潔毛孔加強保濕，細細一盒大約可以用兩至三次。
而呢個All in One嘅月桃葉精華就可以解決晒你肌膚上所有唔好嘅問題。（小編就未試過，你地有用後感分享嗎？）
場內好多食品都係即場新鮮製作㗎！身為「為食妹」嘅我，梗係第一時間試食先啦！
呢個好特別，我經過嘅時侯，師傅好熱情咁請我食咗一條。一開始仲以為係薯仔絲。
點知食落先發現，原來佢係炸そば。新鮮熱辣再配埋千島醬，送酒簡直一流。
不過其實呢間店我睇中嘅係另一樣食品，就係呢個石垣牛可樂餅。盛惠300Yen。價錢算適中，重點：可能因為新鮮炸起嘅關係，咬落去真係超脆，而且唔似一般可樂餅咁淨係得薯仔味，而係帶有陣陣嘅牛肉香味，忍唔住咬完一啖又一啖。
轉過另一面，即刻就見到姨姨唔停手咁炸野，好奇嘅我梗係要望下到底係咩野食啦！原來係即炸海藻天婦羅。
唔好睇佢好似其貌不揚咁，但其實入面非常足料。除咗佈滿一條一條嘅海藻絲之外，仲有唔同嘅蔬菜係入面，咁樣食得炸野嚟，感覺都健康啲啦！（樂天派
）重點係，一條都只係100Yen咋，真係好抵！
）重點係，一條都只係100Yen咋，真係好抵！
去到會場另一則我就發現我嘅最愛琉球ホルモン同埋咁大個女都未試過嘅芽菜天婦羅。
ホルモン對於唔喜歡內臟嘅朋友嚟講可能會覺得好噁心，但個人嚟講就非常鍾意食。但其實入面除咗內臟之外，仲有蒟蒻係入面。食落一啲都唔腥。飲啖湯，仲非常鮮味。結果我成碗連湯將佢KO。（不包括個發泡膠碗
）盛惠500Yen。
）盛惠500Yen。
至於另一個芽菜天婦羅就最有驚喜。點解？因為本身唔會期待芽菜有咩味道，點知一咬落去，啲芽菜汁就湧晒出嚟，雖然係油炸，但感覺都幾Fresh！佢仲有一款係有一片午餐肉喺上面，大家有興趣不妨試下，盛惠300Yen。
大家睇咁耐，可能會發現全部都係炸物。咁嘅情況下，最佳嘅配搭就梗係啤酒啦。係現場你可以買到沖繩啤酒，咁就可以邊食邊啤啤佢啦
如果驚小食滿足唔到你，唔駛驚，因為現場仲有好多唔同嘅拉麵店，價錢大約係800－1000Yen。
正餐滿足完就梗係要嘆埋佢嘅甜品。現場有黑糖蛋糕，炸紫薯波等等，不過最後我就揀左呢個，紫薯芒果甜筒。
雪糕質地非常軟滑，不過估唔到芒果竟然比紫薯味道更出，如果你係紫薯愛好者可能會有少少失望。如果唔係，呢個甜筒就夠晒正，盛惠330Yen。
大會當日仲請咗鈴木奈奈做開幕嘉賓，場面非常熱鬧。
食飽飽記住唔好咁快走住，因為現場有好多零食都係沖繩限定。唔買返去食，買嚟做手信都係一個唔錯嘅選擇。
當日我就買咗好多紫薯嘅零食，佢仲有一個好處就係，如果你只係想淺嚐嘅話，佢有散裝一粒粒咁俾你買，咁就滿足晒你地唔同嘅慾望啦！
「沖繩物產展」為期一個星期，由5月27日至6月5日。咁啱係日本嘅朋友就把握時間上去睇下啦！除咗室內立食位置，佢場內仲有一個用餐區域設有桌椅。所以夜晚諗唔到晚餐食咩嘅時侯，都可以試下過嚟呢度，係東京感受下沖繩嘅氣氛啦
【沖繩物產展】
日期：5月27日至6月5日
時間：11:00－20:30 （最終日為20:00）
地址：3 Chome-1-1 Higashiikebukuro, Toshima, Tokyo 170-0013 (池袋Sunshine City 4樓展場)
官網：http://www.sunshinecity.co.jp/event/e1155.html
About Post Author
