[冇雷公咁遠系列VOL.4!!]
每次去日本，唔係東京就係京阪神，最遠都係北陸，有時會唔會覺得有少少悶﹖如果你係有咁嘅諗法，不妨參考下[冇雷公咁遠系列!!]嘅介紹，或者你會得到新嘅答案啊！
今次講食！ 地點係位於東北嘅青森縣(都話冇雷公咁遠囉～)。青森蘋果就固然出名啦，但係青森縣食海鮮其實都好OK喎，今日就同大家介紹下一間位於青森市嘅魚市場(寫一間廢事又話講過XD)。另外亦會介紹另一間市內嘅豬扒飯食店，嗰度嘅千層特製味噌豬扒亦係必食之選！ 有冷有熱，梗有一款中你口味！
青森市古川市場：「自己諗掂佢」滿到瀉海鮮飯
既然官網同各大部落格開頭都係呢句，小編姑且就跟跟機啦XD，首先介紹嘅就係被稱為「青森市民的廚房」嘅青森魚菜中心(古川市場)。叫得做「青森市民的廚房」，就梗係有原因啦。(細聲：因為嗰度其實係居民買餸嘅地方，唔係為旅客而設嘅地方啊，不過自從出咗名之後，大家就無視/根本唔知佢原本只係一個街市。)不過原因其實唔係好重要，最緊要就係好食嘛！
呢度最出名呢，就係喺度食野係冇餐牌俾你跟住叫，而係要自死掂食咩配料嘅
「自助海鮮蓋飯」(のっけ丼)！ 順帶一題，傳說古川市場嘅「自助海鮮蓋飯」
係變種自北海道釧路「和商市場」嘅「勝手蓋飯」(勝手丼) ……
由買食券開始！
市場嘅一角有個叫「案內所」嘅地方，首先要去呢度買個叫「食券」嘅東西。
食券就係咁樣樣，有少少似郵票，540日圓5張，1080日圓……10張!!!!!
郵票一樣嘅食券，雖則係有10張，但因為白飯會扣走你一張，
所以買餸就得返9張用
首先去有「丼」字標誌(紅圈)嘅舖頭換飯先(一般嚟講只要唔係好多人排隊，
佢係會護送你去換飯)
然後就可以揀配菜wwwwww
配菜一般分為100、200、300日圓(1-3張券)，當然亦有其他用現金即買嘅東西(原本人哋係街市嘛)
以下係部分商品價格：
1券區
三文魚 (2件)
拖羅(2件)
甘蝦(1碟)
金槍魚脊背肉(1碟)
帶子
白飯
魷魚 (2件)
八爪魚(2件)
油甘魚(2件)
2券區
中拖羅(1件)
三文魚子(1碟)
松葉蟹(連蟹味噌) (1碟)
帶子
大白飯
鬼海老(1件)
八爪魚(大) (1件)
前澤牛(1件)# 遊擊出沒
3券區
鱈子
海膽(1碟)
帶子
以下係1080日圓完成品例子(留意第一幅盒海膽係另購青森土炮海膽，土炮800日圓,戰鬥民族入口嘅要1000日圓,另外小編第3幅圖放咗枝原子筆落去俾大家掌握碗飯嘅尺寸)
市場1樓同2樓都有位供休息同用餐，茶水免費供應
古川市場=青森魚菜中心
地址：青森市古川1-11-16
電話：
青森魚菜中心／TEL 017-777-1367
のっけ丼案内所(即係賣食券嗰度)／TEL･FAX 017-763-0085
のっけ丼案内所(即係賣食券嗰度)／TEL･FAX 017-763-0085
營業時間：07:00-16:00
定休日：星期二、每年1月1、2日(留意古川市場經常即興休息，所以記得留意官網最新消息！)
官網：http://www.aomori-ichiba.com/nokkedon/
前往方法：JR青森站步行約20分鐘
中心地下地圖(2樓全層用餐區)
亞希：千層特製嘅味噌豬扒
睇起上嚟似係人名，其實係店名（唔排除間舖入面真係有人叫亞希……），本文要介紹嘅豬料理店就係佢！
唔好睇門面好似好細(雖然以面積計係有啲細)，但其實喺青森甚至東北地區已經係一間有名嘅老舖。無論係炸豬扒、炸蝦都非常出名。其中最出名嘅就一定要數「ミルフィーユ仕立特製とんかつ」(千層特製嘅味噌豬扒<—自家翻譯，譯得唔好俾條生路行下XD)，同埋以加入青森蘋果汁特製醬汁嘅炸豬扒，小編推薦兩者都要試試！
「ミルフィーユ仕立特製とんかつ」(千層特製嘅味噌豬扒)係以麵粉將
豬扒內部間開幾層，幾成好似千層穌咁一層肉－一層原創味噌，小編試到係
有蔥嘅(見到見到啦使你試)，同唔知係咪幻覺，味噌入面好似暗藏蘋果嘅香味…….
豬扒非常不錯，加上有蘋果香味，甜甜鹹鹹嘅醬汁，令人精神為之一振！
除咗千層特製嘅味噌豬扒同炸豬扒，拳頭咁大嘅漢堡牛肉都不容錯過。
炸雞定食
Aki (亜希)
地址：青森県青森市新町２丁目１－１６
電話：017-722-3961
定休日：逄星期二 (不定)
前往方法：JR青森站步行約10分鐘
營業時間：11:00-20:30
ＷＨＡＴ ＩＳ [冇雷公咁遠系列!!]！？
每次去日本，唔係東京就係京阪神，有時會唔會覺得有少少悶﹖ [冇雷公咁遠系列!!]專門介紹遠離以上地方嘅地方！ 無論你係心思思想出遠行，定只係眼睛想旅行，入嚟之後可能會得到新嘅答案啊！
16年4月新出「JR東日本鐵路周遊券」遊東北平咗又爽咗!!
以往去東北地區旅行，除非係自己租車，否則基本就只有坐JR去，不過以前由於只有最貴嘅「JR全國PASS」(大人7日2：9110日圓，14日：46390日圓，21日：59350日圓，兒童半價)係包東北地區，重要連續7日，真係又貴又唔方便。不過自從2016年出咗「JR東日本鐵路周遊券」(海外售價 大人19000日圓，兒童 9500日圓)之後，換證後14日內可任選5日任坐JR，令到行程安排彈性咗好多，真係超級方便，而且東京(上野)去青森單程已經去咗16940日圓，隨時行程第一日已經回本。
About Post Author
