點解成日睇Facebook，見到啲日本男仔求婚片段，全部都咁感動嘅？其實唔少人都係靠「求婚策劃師」幫手！佢哋包辦買花、book場、諗橋等工作，令唔識浪漫嘅男仔都可以冧死女！想知究竟呢啲「求婚策劃師」會點幫手？即刻睇落去啦！
不少女仔都鐘意浪漫同驚喜，而日本女仔當然一樣，對浪漫同驚喜都好受落！所以對於日本男仔嚟講，向女仔求婚果陣，一定要花盡心思，製造一個最美好嘅回憶。不過，未必人人都識製造浪漫，亦未必有時間去plan咁多野。日本就有唔少wedding agency搞埋「propose planning」服務，除左提供求婚好橋，仲幫手策劃場地、音樂甚至搵dancer比你，包保求婚過程一定夠浪漫！
我地就搵左幾間日本求婚策劃agency，比較下佢哋嘅價錢同服務。由最普通嘅求婚plan、快閃跳舞求婚，到大規模嘅戲劇式求婚，全部都有齊！大家就可以睇得出日本人究竟有幾重視求婚啦！
1. Anniversaire Japan アニヴェルセル
呢間Anniversaire係一間wedding service agency，有提供各種價錢嘅求婚plan，主打簡單又感動嘅求婚。佢地嘅YouTube channel上傳左好多客人嘅求婚例子，有幾條仲過10K views，算係幾有名氣㗎！
基本求婚plan：
最基本嘅求婚plan，通常流程係帶女朋友去指定地方食飯，搵籍口參觀下附近嘅教堂，再驚喜地向佢求婚。Agency提供事前商談，大家可以按要求再加其他特別service，又或係細改下求婚嘅流程。值得一提嘅係，只要喺佢地合作公司買戒指，就會免費送埋基本嘅求婚plan，感覺都幾抵！
30,000 yen: 包製作費用、場地租借、場地音響production
50,000 yen: 包製作費用、場地租借、場地音響production，再包求婚花束同蠟燭燈光佈置
而相信唔少人都有呢個煩惱，就係唔知女朋友鐘意咩款嘅戒指，怕買錯款會令佢失望。呢間公司就仲有個Princess plan，提供求婚用紀念戒指，再加一隻事後先揀款嘅結婚戒指，俾你求完婚先同女朋友一齊去揀戒指款，咁就唔怕買錯款啦！
之前就有位台灣男仔向日本女友求婚，特登請埋雙方家人出席，又叫餐廳轉特別食譜，佢嘅求婚片段被唔少媒體報導過！不過，如果要呢啲額外service，例如係食物安排、隨行拍攝等，就要再加錢先有啦！
官網上有唔少人都比正評，大讚佢地service好好！
Anniversaire官方網頁：http://atsurprise.jp/
2. Emotion Rise
呢間公司可以話係比較「國際化」，因為對比起前兩間，只有呢間有齊中、英、日語版本嘅網頁，亦有較多與外國人嘅合作經驗。同樣係載歌載舞求婚plan為主，呢間就聲稱係同行內最多委托經驗、顧客滿足度No.1同YouTube影片點擊率No.1嘅wedding agency。
由於今年初有位港男嘅求婚影片被廣傳，呢間公司嘅知名度都大大提升，而家多咗好多中、港、台嘅客人，溝通時就可以用英文簡單對答！
公司無列明收費幾多，我地就以港男求婚呢個例子作參考，向佢地查詢呢個求婚plan嘅價錢。港男求婚呢個plan大約係250,000 yen，價錢包cast同製作費用，但場地同隨行拍片就再要加錢。
睇番港男求婚嘅片段，場地應該係日本某個商場，目測至少有15位cast，現場仲有約10位工作人員，咁多人力物力，呢個package相對嚟講又唔算太貴！
唔好以為呢啲求婚表演好易做，其實公司都有講明，希望客人早一至兩星期參與練習，或者睇片自已練舞。
Emotion Rise官方網頁：http://www.emotionrise.com/
3. At Surprise Japan アット サプライズ ジャパン
對比起上一間agency，呢間嘅求婚plan就以「performance」為主，多數係較大規模嘅求婚表演，例如做drama、唱歌、跳舞等。佢地就無寫明收費係幾多，我地嘗試用Facebook inbox查詢價錢，不過就未得到回應，詳細收費將後補上。
與其話係「求婚計劃」，記者就認為佢似一段求婚表演多啲！因為佢地嘅求婚橋都偏向「大陣仗」，通常搵成十幾位dancer，係人群中間表演，令女朋友成為眾人焦點！
呢間agency都幾出名，近幾年都有上過電視新聞，就連NHK、TBS都有報導過！
佢地嘅一段求婚片就曾經被瘋傳，用咗「玻璃鞋尋找灰姑娘」嘅concept，完全滿足到女生想做下公主嘅心，網民都留言話好羨幕呀！
片中嘅男主角先帶女朋友去商場行街，見到有人搞緊尋找灰姑娘表演，就叫女朋友去試下，點知一試就啱著！
然後身邊化身成路人嘅dancer就跳舞慶祝，同大家想像中一樣，最後男主角都跳埋一份，向女朋友求婚。
睇番佢地嘅網頁，都有recap番客人嘅comment。呢個comment由一對日本新人上傳，男方話自己本來無跳舞經驗，但竟然成功參與求婚表演，好多謝呢間公司。而女方就指，自己好似成為電影中嘅主角咁，成件事好夢幻！
At Surprise Japan官方網頁：http://atsurprise.jp/
日本嘅求婚planning就搞到成行成市，大多數人嘅評價都幾正面，唔知大家又覺得點呢？
About Post Author
