之前講過我今次嘅郵輪之旅每一日都會落地玩，上一次係金澤去完【兼六園】，其實除咗【兼六園】之外，【金澤 21 世紀美術館】都係必去景點之一。館內約有3,500件作品，主要係1980年代後創作嘅，其中由阿根廷當代藝術家Leandro Erlich打造嘅『泳池』（The Swimming Pool），就係館中最出名兼最受歡迎嘅作品，嚟緊我會同大家重點介紹~而呢間以玻璃作主要建構材料嘅美術館，查實喺開幕前已經獲得威尼斯建築雙年展頒發金獅獎，其特色之處就係以玻璃走廊連接所有展覽區，令館內空間充滿透明感。
去到入口處向上望，就會見到屋頂上有個金像，叫「測量雲的男人」（雲を測る男 ），用尺嚟量度根本捉摸唔到嘅雲，呢個概念果然好artistic。
美術館基本上成棟建築都係採用透明玻璃打造，就連升降機都唔例外，而且上下都係無鋼纜的。
入到Turrell Room，向上望就會見到由James Turrell 打造嘅天井「Blue Planet Sky」，四四方方嘅窗口同藍天白雲，都令我不自覺地諗起電影《the room》，女主角和兒子Jack只能靠唯一嘅天窗感受外面嘅世界，過住與世隔絕嘅生活…
而呢個「花花世界」area，係台灣設計師林明弘以加賀友禪為題材製作嘅作品，同埋亦注入了台灣花布嘅元素，完美呈現中日合璧，同時亦令美術館活潑好多~
就連凳仔都印上同樣嘅print，與後面畫布融為一體，搖下搖下非常好坐，好多人行到攰都會喺到休息。
成塊都係以唔同顏色嘅鮮豔拼布拼成！超有霸氣
其實館內每個空間都充滿極簡感覺，就算多人都依然有足夠嘅空間感。
終於嚟到Leandro嘅《The Swimming Pool》，上面望落去就會見到喺下面參觀緊嘅人，製造水底效果~但其實只係喺地下室嘅玻璃天窗上加一層10cm嘅水，望落就會好似泳池咁，係美術館最hit亦係必睇嘅代表作品~
落到去就係咁~牆係水藍色；仲有埋手把~望上去一樣見到啲人，而且水嘅波紋同折射都令呢個「泳池」更加逼真。
個人特別鍾意呢幅作品
近睇就會見到個story，其實係關於各種生物甚至人類嘅蛻變，最後又變番最初之木。
呢個area亦好chill，加上灑落黎嘅陽光，感覺時間靜止了~（懶係有feel）
金沢21世紀美術館
〒920-8509 石川県金沢市広坂1丁目2番1号
Tel：076-220-2800
看放時間: 9:00-22:00 展覽區 10:00-18:00(星期五、六延長至22:00)
About Post Author
