上集講到去完舞鶴尋找天橋立，今次又再講返郵輪有咩玩先！
溫馨提示：上船之前要做好節食準備，因為上得條船，預咗會肥10磅！皆因船上總共有4間免費餐廳，分別係5樓嘅Fantasia Restaurant同埋Sinfonia Restaurant﹑11樓嘅Bolero Buffet Restaurant同埋12樓嘅La Tavernetta Pizzeria喺唔同時間開放，確保我哋24小時都有野食，再也不知何謂餓。
早餐通常會喺11樓嘅Bolero Buffet Restaurant食，任你食到飽。
老老豆豆，質素相當唔錯，搞到我成日一開波就食勁飽。
晚餐就係「Fantasia」食，毎位乘客都會被分配到指定嘅位同時間用餐，咁就唔怕去到會無位坐。Menu每日都唔同，每款前菜、湯、salad、主菜﹑甜品都有幾款選擇比你揀，好適合同人share，重點係唔夠食的話仲可以嗌多幾份，唔會額外收費！
龍蝦意粉OH~
就咁睇賣相，真係以為去咗意大利高級餐廳，而且味道亦無得輸。
而且好興食食吓飯會突然有廚師同員工走出嚟跳舞，將全場氣氛推至頂點！
另外一定要去La Tavernetta Pizzeria試由意大利廚師即做嘅焗pizza，水準之高令人驚訝。
有幸由Executive Chef親自帶領我地參觀船上廚房，睇吓架船究竟係點為船上二千幾人24小時全天侯供應5餐。入到廚房，第一感覺係超級乾淨整齊，咁大一個廚房衛生竟然仲整潔過我屋企嘅廚房…最特別嘅係船上禁止使用火或gas、所以煮食一律用蒸氣同電力。
每個廚師都有系統地負責唔同工作，呢位廚師就負責準備餐湯。
所有食物預備好後都會即刻用保鮮紙包好或用蓋冚好，以保持食物新鮮同衛生。
部分食物做完會即刻放入保溫櫃內。
而且非常講求環保，所有垃圾都會分類好！食完野，當然要做下運動，除左室內泳池之外…
當然唔少得室外泳池！
泳池位於11樓，總共有2個全日開放嘅泳池同4個按摩浴缸，朝早起身去泳池遊吓水或喺池邊吸收下日月精華，真係好chill。
其實泳池邊仲設立咗條慢跑徑，等乘客可以邊跑邊望住個無敵海景，享受陽光與清風。
郵輪靠岸嘅時候大家都趕住落船，所以會少咗好多人，呢個時候嚟分分鐘可以包起成座池！
到咗夜晚，你會發現原來郵輪每日都夜夜笙歌，根本唔愁無節目！每晚你番到房，就會發現床上放咗本Daily Program小冊子，列出當日所有表演或節目嘅時間，地點等，你就可以揀你有興趣嘅去。
當日就有來自美國Las Vegas出晒名扮Michael Jackson扮得似既Christoff表演，表演尚算精彩，不過似唔似MJ就見仁見智~
除次之外，因為Costa強調自己係Italy At Sea，希望大家可以體驗到意國風情，所以安排咗節目例如意大利廚師示範煮意粉、意大利歌劇表演、意大利土風舞、奇幻馬戲團、威尼斯嘉年華party等等，甚至可以同意大利captain跳舞！（不過大家都睇到片中嘅我失敗咗…T.T）
睇完show，可以喺到邊享受音樂邊同朋友飲cocktail。
付款方面，郵輪唔收現金，所有消費都係直接用Costa卡扣除美金。至於wifi，靠岸時嘅wifi係免費的，但船一行駛到海上，wifi就要收費了，價錢大概係28美金/3個鐘，個人認為無乜必要增值，上得架船，不妨放低電話，專心享受旅程。其實搭郵輪最好玩嘅位係，你可以選擇跟住郵輪嘅航線玩，或者留喺船上chill，一覺訓醒就到達唔同地方。而且喺船上亦好容易識到來自世界各地嘅朋友，擴闊自己眼界同人際關係，呢啲都係搭飛機唔會有嘅機會。
雖然郵輪部份就介紹完，但成個旅程入面，我仲有幾個景點都想分享俾大家，記得繼續留意我嘅blog喇！
重溫之前行程：
About Post Author
