為咗配合2020年東京奧運，日本郵便最近正式宣布「訪日外國人服務」，為全國2萬間直營郵局新增翻譯系統，亦於城市及旅遊景點附近，提供行李寄存、配送酒店嘅服務。大家嚟緊到訪日本，就唔怕溝通唔到，可以大大利用當地郵政服務啦！
即時語音翻譯系統
官方消息指，新增嘅翻譯系統由日本信息研究機構（NICT）開發，支援中、英、韓三種語言，只要對住機器發聲就可以自動翻譯，大家就唔怕聽唔明郵政專業術語啦！翻譯系統將於4月引入，日本郵便希望可以籍此消除語言障礙，方便外國遊客將特產寄回國，為奧運時業務量增加做好準備。
行李寄存＋配送服務
另外，為咗充分利用全國嘅郵局網絡，3月起亦會增設行李寄存服務，於全國過千間郵局實施！參與嘅車站以遊客較多嘅郵局為主，大家可以利用手機預約、結算同確認郵局嘅閒置空間，費用預定為300-600yen。以後除咗車站租locker，又多咗個寄存行李嘅好地方啦！
除咗寄存，日本郵局都計劃推出行李配送服務，為大家配送至所住酒店或下一訪問地，暫定收費為每件行李1000-2000yen。
大家嚟緊去日本旅行，記得留意下附近郵局有無提供呢類服務啦！
日本郵便網址：
http://www.post.japanpost.jp/index.html
圖片來源：富山駅前郵便局、郵便局公式網站
About Post Author
