日本老字號綜合超市ItoYokado創立於1920年，同日本7-Eleven、赤ちゃん本舗、LOFT等等店舖一樣，都係日本零售巨頭SEVEN & i Group嘅一員。依到出售嘅商品種類多多，琳瑯滿目，一齊嚟睇吓ItoYokado有咩必買食品、藥妝同日用品啦！
——————
必買食品
1.水果類
相信唔少人同小編一樣，去日本旅行時，一定會去超級市場掃水果返酒店食～講到ItoYokado嘅水果，就一定唔可以唔提「Sweet King」系列水果啦！「Sweet King」系列水果係ItoYokado嘅原創水果品牌，只有得到ItoYokado認證、經過特別嚴選嘅新鮮時令水果，先可以納入去「Sweet King」系列水果到，絕對有有品質保證，大家可以放心享用。另外ItoYokado每日都會安排職員測量同標示水果糖度，等大家可以知道水果嘅甜度～
——————
2.蔬菜＋肉類＋魚類
喺ItoYokado到出售嘅蔬菜，並唔止係普通蔬菜咁簡單。ItoYokado同一個個生產者攜手合作，創立咗個叫做「看得見的放心。」系列（「顔が見える食品。」）嘅自家品牌，致力於提供安心、安全又好味嘅商品畀大家。系列入面嘅蔬菜、肉類、水果、雞蛋、魚等等包裝上面，都印有每一個生產者個名同肖像，等來店嘅顧客拎起件商品嘅時候，可以了解到依樣食品係邊個、喺邊到同點樣製作出嚟；大家亦可以通過包裝上嘅QR Code了解更多有關產品嘅詳情，大大拉近消費者和生產者之間嘅距離，更大家可以更加放心地購買依啲產品。「看得見樣子的蔬菜。」系列商品全部都係日本國產農作物，而農作物上面嘅農藥同放射性物質含量仲要經過嚴格嘅審查，先可以放喺賣場出售，所以大家可以安心食用啦～ItoYokado嘅肉類專區仲有好多高級日本國產和牛，雪花分布平均，睇到人流晒口水！如果想自己喺旅館整燒肉，可以直接買碟燒肉拼盤，入面有齊牛肉同豬肉嘅唔同部分，買一碟就搞店，好方便～另外鮮魚專區除咗有出售鮮魚、海鮮之外，仲有加工食品㖭！不過如果想買肉類同海鮮返旅館嘅話，大家記得返到去之後快啲將佢地雪返入雪櫃啦～
——————
3.杯麵＋即食麵類
ItoYokado杯麵專區嘅杯麵種類多不勝數，另外仲有SEVEN & i Group自家品牌SEVEN PREMIUM同其他麵家合作推出嘅杯麵，例如最近喺香港好hit嘅「SEVEN PREMIUM 蔦 醬油Soba」（278日圓 連稅）、辣得嚟豆腐非常足料嘅「SEVEN PREMIUM 蒙古タンメン中本 豆腐湯杯麵」（ 183日圓 連稅）都可以喺到搵到。即食麵專區除咗有豬骨、醬油味即食麵之外，又有啲期間限定嘅即食麵，例如小編當日見到包裝超得意嘅「エースコック即食雲吞麵 5包裝」（375日圓 連稅），啱晒做手信！
——————
4.零食類
ItoYokado有各種牌子零食出售，餅乾、曲奇、薯片、薯條等等，應有盡有。如果你同小編一樣，鍾意食紫菜味薯片的話，可以試吓依包「SEVEN PREMIUM 厚切鹽味紫菜薯片」（213日圓 連稅），厚切薯片薯味濃郁，好唔錯㗎！ItoYokado又有一系列100日圓零食出售，價錢抵得嚟質素又高，大小鹹甜樣樣齊～其中小編嘅心水之選就係「SEVEN PREMIUM 杏仁魚仔」（108日圓 連稅），細細包方便帶出街，另外就係「SEVEN PREMIUM 薩摩蕃薯脆條」（108日圓 連稅），香脆得嚟蕃薯甜味又出，放喺公司食就啱晒啦！
——————
5.麵包類
去旅行好多時都晨咁早出發，去超市買定早餐第二朝食就最方便啦～「SEVEN PREMIUM GOLD 發酵牛油香味 黃金方包 厚切2塊裝」（128日圓 連稅）使用法國產牛油同北海道產忌廉製作而成，食落牛油味香噴噴，就算就咁食都唔會齋（笑）抵讚嘅係依款方包唔會加任何麵包發酵添加劑同乳化劑，咁就可以放心盡情食啦～
——————
6.甜品類
ItoYokado一年四季都有雪糕雪條賣㗎～依到除咗有各大雪糕品牌，例如Häagen-Dazs嘅雪糕之外（有時仲會有日本期間限定版㖭！），仲有SEVEN PREMIUM嘅雪條㗎～小編特別向鍾意食水果嘅朋友推介以下幾款水果雪條，口感好似就咁將個水果冰起咗咁，超正！「SEVEN PREMIUM 芒果冰雪條」（140日圓 連稅）食落陣陣阿方索芒果嘅獨特清香，甜味非常出眾；「SEVEN PREMIUM 奇異果冰雪條」（140日圓 連稅）使用紐西蘭綠色奇異果同黃金奇異果製作，酸味同甜味配合得啱啱好，食落好清新；「SEVEN PREMIUM 蜜瓜冰雪條」（149日圓 連稅）使用來自兩個唔同產地嘅蜜瓜汁整成，蜜瓜味道濃厚，食完回味無窮～
除咗雪糕雪條之外，ItoYokado又有日本傳統嘅和菓子出售。「SEVEN PREMIUM 日本橋榮太樓餡蜜甜品」（321日圓 連稅）使用北海道紅豆製成紅豆蓉，再用沖繩產嘅黑糖整成黑蜜，加上口感特好嘅寒天，就成為咗依款媲美和菓子屋即叫即整嘅超美味餡蜜甜品啦～另外「SEVEN PREMIUM 夢を語ろう！ 」商品系列係ItoYokado同生產者攜手合作，抱住想帶畀顧客「真正好味」嘅心，屢敗屢試後完成嘅高質食品。其中「SEVEN PREMIUM 夢を語ろう！ 圓滾滾的豆大福」（1個/149日圓 連稅）係開發者抱住：「要製作出令人回味無窮的豆大福！」嘅想法製作而成嘅商品。紅豌豆同糯米皮嘅絕妙口感，簡直就同和菓子店嘅豆大福一樣講究，真係唔試唔得啊～
——————
7.無酒精飲品＋酒精飲品類
飲品專區放滿晒清涼飲品同炭酸飲料，單單係牛奶已有成十多種咁多，早餐時飲就啱晒啦！酒精飲品方面，各款啤酒同炭酸酒貨色齊全，其中SEVEN & i Group 限定發售嘅「KIRIN 一番搾り 匠の冴」（286日圓 連稅）係喺冰點下發酵熟成嘅啤酒，味道清爽，各款酒類無論當做手信定係喺酒店品嚐都好適合㗎～
——————
8.壽司＋雞串＋ 油炸食品類
壽司專區唔止有壽司，另外仲有各款魚生飯，款款都好吸引㗎～依到嘅壽司係用日本國產米製作，飯粒煙韌有咬口；魚生新鮮好味。店員會經常根據賣場嘅販賣情況即場製作壽司，幾時都可以提供到啱啱整好嘅壽司畀大家，確保新鮮安全～
ItoYokado嘅雞串係喺店內製作，食落可以媲美餐廳嘅現烤雞串，好正啊～小編當日去到見到有十幾種雞串，例如香蔥雞脾肉串燒、醬汁雞肉棒等等，價錢大約百幾円一串，大家可以盡情買返酒店做宵夜～
另外依到嘅油炸食品專區好大啊！炸蝦天婦羅金黃色香噴噴，吉列豬扒仲大塊過小編個拳頭，好抵食啊～大家喺超級市場買咗壽司、雞串、天婦羅等等餸菜之後，可以拎去food court到坐低慢慢食，好方便！
——————
必買藥妝
ItoYokado嘅藥妝專區有齊SK-II、資生堂、雪肌精等品牌商品，女士們唔好走寶啦！SEVEN PREMIUM LIFESTYLE嘅「BOTANICAL FORCE」系列保濕力超高，買堆「BOTANICAL FORCE 保濕美容液面膜」（1塊/378日圓 連稅）送畀女仔朋友做手信都唔錯喎～「sept beauté」系列係ItoYokado同資生堂合作嘅品牌，依個牌子嘅洗頭水、護手霜等等香味，全部都係基於腦科學研發而成，達到「充電」（recharge）同「放鬆」（relaxing）嘅效果。
——————
必買日用品
1.生活雜貨＋廚房及家庭用品類
「SEVEN PREMIUM LIFESTYLE 乾度良好 浴室用地毯」系列吸水力特強，又有抗菌防臭加工，沖完涼企喺上面抹身就啱晒啦～就算係第二、第三個人使用，張地毯都唔會滲晒水咁濕立立㗎！各款洗衣用品芬芳四溢，用完之後啲衫又乾淨又芳香，好多人專登買返屋企用（笑）鍾意煮嘢食嘅朋友要留意啦：ItoYokado嘅各款廚房用品真係睇到人眼花撩亂，「Choice 出爐料理直接上桌 電磁爐兼容鍋具 6件裝」（5000日圓 連稅）顧名思義，個鍋用嚟煮完餸之後可以甩開個手柄，直接放上餐檯到當碟用，好方便啊！另外ItoYokado嘅幼兒、兒童可愛餐具款色多多，送禮自用皆宜啊～
——————
2.寢具類
相信大家都記得，ItoYokado係日本人日常生活嘅最強後盾～依到唔止生活用品，藥妝等等，連高質素嘅床上用品都應有盡有！ItoYokado嘅枕頭賣場放滿晒各種可以調較高度、觸感柔軟嘅枕頭。其中有啲枕頭，例如「東京西川 機能性枕 RADICE」（10584日圓 連稅）仲有專用袋方便顧客帶走，好貼心啊～枕頭之外，依到仲有好多各式各樣嘅寢具發售，其中綿被又輕又滑，冬天保暖，夏天時觸感涼快，冚住佢嘅話真係唔洗3秒就訓著啦～
講到尾，其實ItoYokado嘅食品、藥妝、日用品等等林林總總，真係行成日都得！如果你都想體驗日本人嘅日常生活，就一定要嚟行吓啦～
*上述商品的企劃、包裝、價格有可能因為不同時期而有所變更，請於店舖查詢商品及價格資料。部分店舖沒有販賣某些商品，敬請留意。
——————
快啲click入以下網址同facebook專頁了解更多店鋪最新資訊啦！
ItoYokado 官方網站（繁體中文）
ItoYokado 官方facebook（繁體中文）
ItoYokado曳舟店
GRAND TREE武蔵小杉店
About Post Author
