係香港剪開60蚊速剪既我，難得黎到日本，當然想睇下係日本係咪剪個髮都靚過人啦！係文章開始之前，你可能會問：「係唔係就算唔知日文都無問題架？」就等我先好明確咁同你講係！完全唔需要識日文，有錢就夠啦！
事不宜遲，先講講今次我去既髮廊先。早前「マツコ会議」既時侯就發現呢間位於原宿既AKROS，有唔少男士都會特意前來希望改變自己形象，樓下呢位哥仔甚至不惜坐新幹線，總共花左五萬日元黎實現佢既「夢想」。
究竟呢間髮廊有咩特別既地方？原來入面有一位著名既髮型師松本拓馬，剪髮出名快、靚、正！
係日本剪髮既第一步一定網上預約。除左QB，其他比較有名氣既髮廊都需要預約，否則貿貿然咁入去剪既話好易食白果。
(如果想剪另一間又無心水，可以GOOGLE「（地方） 髮廊 推介」，例如：「髮廊 東京 推介」，之後上hotpepper搵返間髮廊，做法同下面一樣）
不過我當時就無搵到松本拓馬剪，一黎我打算預約既時侯佢早已經full booking，二黎以我呢位頹毒男生既頭髮長度，根本談唔上什麼型象改造。於是我就抱著純粹去日本髮廊體驗一下既心態，係網上預約左呢間akros，以下就係整個過程：
首先入到官網登記做會員
按下会員登録する（無料）輸入email
按下「上記に同意して仮登録メールを送信」，就會有封email寄去你度，click入條link度
入到條link就會係呢個畫面
記住以下我講既野,以後係日本網站登記無難度
パスワード:密碼
お名前:
「姓」同「名」打返自己英文名(記得名要連住打,唔可以有space)
「セイ」同「メイ」係打返姓名既片假名版本,唔識唔緊要:上呢個網(http://www.sljfaq.org/cgi/e2k_ja.cgi),上面打英文,將下面翻譯出黎既野copy返落去
「例:陳小明
姓：chan
名：siuming
セイ：チャン
メイ：シアミング」
ニックネーム:即係nickname,打乜都得
登錄過後入返髮廊頁面,約「予約する」就可以進入預約,但唔好咁心急先…
見到AKROS LOGO下方有個クーポン・メニュー嘛?
click入去,就可以根據自己想要既服務揀返優惠套餐
揀既時侯,如果你係第一次剪要揀返「新規」既
另外黎黎去去都係4種mix and match:
カット：剪髮
トリートメント：treatment
パーマ：電髮
カラー：染髮
決定好既選擇右邊既「予約する」,再揀時間
揀髮型師,只有指名して予約する既可以揀,放左係下面既就代表呢個時間book唔到佢
按下指名する次へ,然後點擊圖中兩個圈圈既位置
cap低呢版cap低呢版cap低呢版、好重要所以要講三次
完成
預約之後就按時間去返指定髮廊。去akros剪髮第一個難關就係要搵地址，跟住google map行行到目的地但只見到一大間H&M…原來佢夾左係H&M中間，個笠制仲要細心搵先搵到
先比個心理準備大家，搭lift上去一開門就係髮廊,所以下一秒就會受到店員們既熱列招待。呢個時侯唔使驚，淡淡定走到櫃檯show張截圖過佢地睇。當佢地見到預約號碼同一個唔係日本人既名就會知道發生緊咩事（所以唔會用一大堆聽唔明既日文同你講野）。然後店員就會指示你去locker位放低隨身物品，鎖好之後就會有人指示你坐係邊
坐低後，店員會比杯茶你飲同一大堆雜誌你睇，如果仲未決定剪咩髮型既話可以參考一下雜誌入面既造型。不過我會建議大家先上網搵定想剪咩髮型，染咩色等等…到時髮型師過到黎隻字都唔使講，直接show部手機佢睇就可以。
接下來所做既野同係香港剪頭髮差唔多，都係先洗頭、剪髮再set靚個頭！不過整個過程會見到日本人都好細心，例如洗頭既時侯佢地會鋪張好薄既紙係你面上廢事啲水彈到你（但老實講鋪唔鋪都無乜分別）剪好髮既時侯髮型師亦好一邊幫大家set頭一邊講解點樣可以係屋企盡可能整到佢整咁好睇，唔識聽日文既朋友可以就咁睇下佢點做，佢地會特登慢慢就整方便大家記住。
樓上坐新幹線黎剪髮位哥仔
最後埋單無乜特別，店員會係計數機顯示金額，唔使考大家日語聽力！最後髮型師會比卡片你，如果想下次再剪記得留低佢，因為下次指定返同一個髮型師可以有八折！
最後你問我抵唔抵？我唔會答你好抵，以我情況，剪個頭，treatment，染髮加埋大約700幾800。對一直好崇尚日系風格既朋友黎講應該絕對可以接受，係香港剪頭髮好多情況都貨不對版，但係日本剪就真係可以剪得出個種風格，兩者分別係睇得出。可惜我從來唔留頭髮，即使有啲造型想試下但頭髮都唔夠長(「▔□▔)/所以係有下次既，等留長左會再去剪多次！
About Post Author
