久違嘅「冇雷公咁遠系列」，今次嚟到第7集！ 今次同大家介紹位於東北東北嘅景點！(當然啦！ 唔係點叫無雷公咁遠……)就係同高野山、比叡山合稱為「日本三大靈場」，下星期一將會開山嘅恐山！
恐山位於青森縣嘅下北半島，係東北最大嘅靈場。所謂「靈場」，就係指靈魂聚集嘅地方，生同死嘅交界點。所以對日本人嚟講，其實呢個地方都幾神聖，甚至係日本人一個重要嘅修行據點……直至上年大家都走上恐山捉鬼斯同鬼斯通……
恐山雖然被稱為黃泉邊境，不過實地又並非令人覺得毛骨悚然，反而係畀人一種寧靜嘅感覺。而血池地獄、重罪地獄、地獄谷、賽之河原、極樂濱等位置同宇曾利山湖配合一齊，形成一個非常美麗嘅景色。
正門外有賣靈場雪糕…仲有蘆蒿味添，味道意外的不錯……
由於恐山位於火山區，所以到處都有二氧化硫等火山氣體從地上噴出來，當地將之營造成各種「地獄」嘅模樣，留意唔好咁刻意用力「索」。因為吸入過量對身體會造成輕微頭痛、倦怠感等症狀，有人就認為於區內發生嘅靈異事件就係由吸入過量氣體造成幻覺而嚟。
因有二氧化硫噴出，所以場內係禁煙。連線香都要於特定地點使用。
叫得黃泉邊境，就梗係會同靈界有關啦。所以好多日本人去到恐山都係希望可以見到過咗世嘅先人啦。不過除非你係超級高靈人士，否則如果好似小編呢類去「活魚」又冇反應，去貝塚病院又冇反應嘅人，真係畀你「落埋去」都隨時冇嘢睇！ 呢個時候，恐山嘅靈媒「イタコ」(潮來巫女)就係時候出現啦。
透過「イタコ」，日本人就可以問米咁，同先人溝通，而恐山嘅「イタコ」，全部都係由盲人或弱視嘅女性負責，而且要苦練10 年學聽神靈和鬼魂嘅聲音。不過時至今日仲做緊嘅「イタコ」只係淨返3個，而且最後生嗰個都四十過外。基本上「イタコ」每年開山期都會助人同先人溝通，不過於7月20至24日舉辦嘅恐山例大祭同秋脂兩個時期都會有好多日本人拜訪恐山向「イタコ」求助。
極樂濱，面向宇曾利湖
恐山上嘅免費溫泉
上文都已經講過恐山菩提寺係位於火山區內，咁自然係有溫泉都唔奇啦。菩提寺內就有四個溫泉出氣口及湧泉被改為溫泉供遊客使用。佢哋分別係「冷抜の湯」、「古滝の湯」、「花染の湯」、「薬師の湯」，只要俾咗入場費500日圓，就可免費使用。
功用：
「冷抜の湯」：舒緩神經痛
「古滝の湯」：減輕腸胃病
「花染の湯」：對結痂或割傷的傷痕有效
「薬師の湯」：舒緩眼疾
泉温：70-90度
泉質：碳酸水素溫泉
如何前往恐山？
從青森市出發：
STEP 1
於青森鐵路青森站乘坐青森鐵路到下北站(車程約90分鐘、如果坐快速嘅話就可以直通下北站，否則就要於野邊地站轉乘JR大湊線，不過下北站的票由於是共通的，所以不用再買飛)
STEP 2
於下北站乘坐下北交通巴士「下北駅～恐山」嘅路線巴士直往總站(車程約40分鐘)
從八戶出發：
STEP1
於JR八戶站坐青森鐵路前往野邊地站，再轉乘JR大湊線到下北站(車程約105分鐘)
STEP2
於下北站乘坐下北交通巴士「下北駅～恐山」嘅路線巴士直往總站(車程約40分鐘)
恐山菩提寺
地址：青森県むつ市田名部宇曽利山3-2
[入山費用]：成人500日圓／小・中學生200日圓
[開山期間]：每年5月1日～10月尾
[開門時間：]6:00～18:00（大祭典、秋詣り期間は別）
※大祭典日：7月20日～24日，秋詣:10月體育之日當日及之前兩日
[電話]：0175-22-3825（恐山菩提寺 寺務所）
影片來源：
KIN chan OKINAWA(YOUTUBE)
NHK4896(YOUTUBE)
About Post Author
