[放送室]MODEL變拳后  日本美女拳手 後藤亞由美

 

由天橋行到上擂台，講緊嘅就係依位六戰六勝嘅日本美女拳手後藤亞由美啦～

 

模得兒變拳手　全因「被睇中」

（後藤亞由美公司舊照）

點解後藤亞由美無啦啦會做咗職業拳手呢？

話說一次公司交流會上，有個環節係叫女孩子們逐個逐個出嚟打一吓拳～

當時個個女仔都好似冇咩力咁輕輕地打咗一下，

但係亞由美就「嘭」一聲打落去，咁啱有個拳手在場，

覺得依個女仔好似幾有天份，邀請佢參加打拳，亞由美就係咁踏上拳擊之路啦～

 

模得兒VS拳擊   起碼打拳衰咗都知咩事w

（後藤亞由美模特兒時期）

後藤亞由美本身係一個模得兒，行過天橋亦都演過戲。

不過佢話同一堆又可愛又瘦嘅女仔爭最演出機會，有時衰咗都唔知點解；

又或者係比人講一句：「你唔靚」就已經被全盤否定晒＞＜

對比模得兒，喺運動嘅世界可以通過努力練習而爭勝，佢笑住話「覺得依種感覺好好～」（笑）

 

六戰六勝都唔滿足  「好想全部都K.O.」

目前為止，亞由美六戰六勝，非常犀利，但係亞由美就話並唔滿足。

「雖然係六戰六勝，但係其中有兩場冇成功K.O.對手，好遺憾。」

更加話「如果可以嘅話，我希望每場比賽都可以K.O.對手」，真係對自己好嚴格啊！

亞由美咁想贏其實並唔係為左自己：

「比起自己，更加係因為身邊嘅人對我有好大期望，所以我好想贏畀佢地睇。」

 

嚟緊5月13號，後藤亞由美就會喺香港參加曹星如所屬拳館Def Boxing Gym嘅DEF Fight Night 15！

希望今次佢都可以攞到好成績，邁向「一年內成為世界冠軍」嘅目標啦～