大部分人第一次去北海道，都會比零下氣溫嚇親而失控買一堆保暖衫，但結果發現唔止嘥錢，仲因為根本無機會著而嘥晒行李啲位！而最唔想嘅係，去旅行當然會想影多啲靚相，但著到米芝蓮咁又肥又腫就……..其實，只要揀啱質地，唔洗著到漲卜卜都可以好暖又好睇，只要留意以下checklist，就有明確目標知道自己要帶啲咩去啦！
以北海道而家嘅1月氣溫為例，平均溫度大約係0~-10度，但因為室內通常都有暖氣，所以最好係以洋蔥式襯法（layering）為主。首先係heat-tech，然後係毛衣或棉質打底衫，再加件最重要嘅保暖大褸（最好可以擋風防水），淨係呢3件，其實已經夠做！當然，小物例如冷帽、頸巾同厚襪仔嘅幫助亦好大，因為只要保護好容易受寒嘅頭部、頸同埋腳，基本上就已經暖咗7成。
要準備嘅衣物如下：heat-tech、大褸、冷帽、頸巾、厚襪、手套、雪靴、保暖褲、太陽眼鏡、耳罩。至於暖蛋之類，可以去到先買。
服飾方面
★heat-tech：想保暖但又著得輕薄唔臃腫，就一定要有heat-tech。唔洗厚但要貼身，當去5日的話，至少就要帶3件替換~
★冷衫：反而唔係咁重要，因為雖然保暖但唔擋風，高領就更加唔洗諗，一上車或進入開咗暖氣嘅室內，一定會熱到標汗。
★大褸：因為喺雪地時根本就凍到唔會除褸，所以係唔會有人見到你裡面襯乜，大褸就理所當然成為最重要嘅item！因此建議如果唔鍾意日日以同一造型示人的話，可以帶多件大褸替換。
★絨毛褲/leggings：好重要！想顯瘦的話可以儘量揀黑色。
★雪靴：最緊要保暖、防滑同埋防水！保暖方面毛毛越豐厚越好，最好係中筒，踩入厚雪都唔怕。另外因為北海道結冰嘅路面好滑好易跣親，所以鞋底刻紋越深越好，咁先可以防滑。喺呢方面Timberland就做得唔錯，膠鞋底夠深夠穩，但保暖方面都係雪靴好啲。
☓唔好諗住著：
★絲襪：千其唔好諗住一對絲襪走天下，喺北海道係無・可・能派上用場！
★牛仔褲：喺零下嘅溫度入面，牛仔褲完全唔保暖，如果係裡面加襪褲，會令行動唔方便，而且濕咗亦唔容易乾。
★水靴：雖然防水，但唔夠保暖。
配飾方面：
★頸巾：要保暖條頸就一定要避免吹風，喺造型上亦好大幫助，建議可以帶兩條或以上襯衫
★冷帽：同頸巾一樣重要！因為冷風好易吹到頭痛，突如其來嘅大雪亦會淋濕個頭，唔想冷親絕對要戴冷帽。一樣建議至少帶2頂
★耳罩：唔想戴冷帽的話可以選擇耳罩保護耳仔，造型一樣大加分，真係怕凍的話亦可以同冷帽雙管齊下！
★手套：喺北海道唔戴手套對手真係會結冰！尤其是如果要玩雪，更加無可能赤手抱雪~注重實用多過美觀的話，最好揀防水款，唔係手套好容易濕。不過缺點就係用電話會好麻煩…尤其係影相嘅時候~不過如果係touch screen的話，就唔洗專登除手套了。
★厚襪：反正唔會點嘥位，帶多幾對都無妨，因為雪靴濕咗仲可以換襪。越厚越好，羊毛款最保暖~
★手袋：要有蓋有拉鍊！唔係好容易入晒雪，裡面嘅相機同電話都會有生命危險。
★太陽眼鏡：唔好以為冬天就唔洗戴太陽眼鏡，雖然地面比冰雪覆蓋，但其實反而更容易折射陽光，傷眼（又稱雪盲）。
可以帶備的配件：
★如果對鞋唔防水，就可以帶備防水噴霧喺身，噴同無噴效果都幾明顯，即使有雪都好易拍走
baacon 有售,現貨特價$100／一支
★雪爪
日本好多便利店都有賣，因為雪地實在太濕滑，用完可以大大降低「pk率」。不過留意番雪爪好易刮傷地板，所以上車或者進入室內都要記得除番~
日本好多便利店都有賣，因為雪地實在太濕滑，用完可以大大降低「pk率」。不過留意番雪爪好易刮傷地板，所以上車或者進入室內都要記得除番~
★雨傘
輕便嘅縮骨遮就OK，防止大雪時被淋濕。
★暖包
貼嘅或手拎嘅都可以按自己需要選擇，可以去到日本先買（選擇超多）
貼嘅或手拎嘅都可以按自己需要選擇，可以去到日本先買（選擇超多）
另外，因為北海道天氣好乾燥，記得要帶齊超保濕嘅moisturizer去呀~
About Post Author
