芝麻開門～～歡迎嚟到機場以外嘅成田市～
今日Mika想同大家介紹一間好出名嘅芝麻專門店「ごま福堂」～
成田分店啱啱開咗半年幾，而家已經成為當地嘅潮聖景點之一！
唔好以為佢淨係賣芝麻咁簡單啊，入嚟兜個圈，你會發現原來芝麻都有無限可能！
其實去到成田表參道間唔中都見到有人拎住依個芝麻雪糕密密食，就知道依個雪糕有幾把炮啦！
白芝麻味係用香滑牛奶做嘅，入面加入咗大量攪碎嘅金芝麻，食落牛奶味同芝麻味都好香！
黑芝麻味唔係用牛奶，而是豆奶做嘅！味道冇白芝麻味咁甜，黑芝麻嘅香味好出，加埋外面灑咗咁多金芝麻，真係好正啊～～～
PS右邊個雪糕唔係本身咁細，而係因為就嚟溶所比被偷食了www
大家都知，日本街上垃圾箱都唔多個，所以日本人好少一路行一路食，多數都係鋪頭門口食完先走～
「ごま福堂」就好貼心，有枱有櫈，大家可以坐低慢慢食～
如果覺得店員灑得唔夠多芝麻碎係雪糕面，大家可以按照自己喜好再灑多啲喺上面㗎！
另外如果點咗名物金芝麻可樂餅嘅朋友，記得唔好就咁食，要入嚟點右邊依枝黑芝麻蛋黃醬啊～～～
黑芝麻蛋黃醬望落去雖然有啲樣衰衰，佐係食落好好好香黑芝麻味，冇就咁點蛋黃醬咁膩咁漏～
跟住嚟睇吓「ごま福堂」最受歡迎嘅手信有啲咩先！
第一位就係啱啱灑喺雪糕上面嘅金芝麻！佢比一般嘅芝麻味道香濃，又烘得好乾身，一啲油嘅感覺都冇，仲可以常溫放半年唔會變壞！
第二位係芝麻味糖～～黑芝麻味望落好似涼粉哈哈～
第三位係……金芝麻洋蔥湯包wwww
我真係冇諗過有人會係洋慕湯到落芝麻仲整成湯包囉www
第四位就係大家去吉野家打邊爐個陣最鐘意點嘅胡麻醬啦！一見到「超濃厚」三個字就知道啱心水哈哈～
另外一邊仲有好多各式各樣嘅醬等大家去試食～～
另外依到有部望落去好勁嘅機，原來入面全部都係黑芝麻水羊羹同埋滑劣劣嘅黑芝麻布甸！
花多眼亂唔知買咩好？大家可以選擇買芝麻禮盒……你冇睇錯！係禮盒！
點解我以前從來都冇發現芝麻可以咁把炮㗎！
至於減肥嘅事……嗯都係食埋先講啦哈哈哈～～～～
About Post Author
