【想食鰻魚去邊度好？】京都百年老店「京極かねよ」

京都實在有太多間賣相極吸引嘅鰻魚料理專門店，如果唔知點揀，不妨直接挑選百年老店，因為可以經得起百年風浪，當中一定有佢過人之處！

 

 

小編今次關西採訪之行就揀咗位於三条通名店街附近嘅「京極かねよ」，一來地點夠方便，附近有公共交通公具直達；二來呢度係已經有近百年歷史嘅老舖，可以坐喺歷史建築入面品嚐有只此一家嘅鰻魚料理；三來店舖位於商店街橫街，食完附近大把野行，慢慢食慢慢睇，喺呢度絕對可以玩足一整日！

 

 

呢間舖喺1920年代大正末期已經存在，所以一入門口就已經感受到懷舊嘅氣氛同味道，一磚一瓦，全部都流露住昔日嘅氣氛。

 

 

全店原本有3層，不過經過戰前火災之後3樓就被燒清光，得返地下同2樓兩層。1樓係一般普通座位，2樓就係和式榻榻米座位，窗邊位仲可以望到園林景，都幾舒服。

 

 

呢張圓枱喺咁多座椅中顯得特別古懷，原來已經陪住舖頭走過唔少年頭，年紀有返咁上下。

 

 

一坐低店員就會好醒目地問你想要中文Menu定英文Menu，咁就有圖有字有真相，想食咩都唔使估估吓。當中最多人點嘅就係有湯、刺生、兩大片玉子燒同兩大片燒鰻魚嘅「鰻魚套餐」以及只有呢度先食到嘅「日式煎蛋鰻魚蓋飯」，份量都幾大。

 

 

等咗陣，煎蛋鰻魚蓋飯出現啦，個玉子燒大到個蓋都冚唔哂！一揭開個碗蓋，蛋香就撲鼻而來！因為塊蛋太大嘅關係，即使打開咗個蓋都係見唔到鰻魚同米飯。（笑）

 

 

揭開塊勁重身嘅玉子燒，終於都見到啲鰻魚啦，揭開一刻啲鰻魚仲出緊煙，可想而知塊蛋有幾保溫有幾厚！鰻魚都幾厚肉，不過油脂唔多，入口未有太肥美嘅感覺，而醬汁亦唔算太濃，不過咁樣反而啱啱好，因為醬汁一早滲哂入飯入面，如果太濃一定會搶哂鰻魚嘅味道之餘仲會越食越膩。

 

食嘅時候記得要同時將玉子燒、鰻魚同米飯一次過大大啖放哂入口，呢個三味一體嘅獨有食法唔單口感更豐富，味道亦變得更有層次，比單獨分開食好味得多！

 

 

呢個「鰻魚套餐」真係好豐富，有鰻魚，有刺身，仲有個加咗鰻魚肝去整嘅湯，個湯好清爽舒服，食到中途飲返啖，可以幫助消除油膩感。

 

 

用咗備長炭去燒嘅鰻魚好腍身，燒嘅時候師傅功架好重要，要一邊搽秘製醬汁一邊燒但又唔可以整爛條魚，令到醬汁都可滲到入魚肉之餘要保持鰻魚嘅美觀，少啲經驗都做唔到！講到燒鰻嘅特製醬汁原來亦有段故，話說當年火災，老闆咩都唔攞，就係拎住一桶醬汁逃生，可以想像到呢桶沿用百年嘅醬汁對佢嚟講有幾重要！

 

 

小編對呢個跟餐嘅刺身有少少失望，因為鮮度未至於充滿驚喜，而且有唔少細骨，第一塊食落口喺毫無心理準備之下差啲出事……

 

 

勁厚嘅玉子燒係繼鰻魚之後第二個大賣點，呢個餐有兩大塊，唔使就住食，好爽！有別於一般偏甜嘅玉子燒，呢度嘅玉子燒加入咗以柴魚、貝類、昆布熬製而成嘅高湯，所以唔難食得出雞蛋中有淡淡嘅魚香，唔鍾意普遍偏甜嘅玉子燒的話呢個可能係你杯茶！

 

總括嚟講整體水準都唔錯，不過可能期望越大失望越大，今次呢間有近百年歷史嘅鰻魚料理老舖並未有太大驚喜，但勝在味道同環境都極之懷舊、經典同傳統，想一試日本嘅百年老滋味，呢度可以一去。