各位醒目既讀者見到足不出戶四隻字，應該已經估到筆者打算教大家點係網上識日本人。無錯！今日筆者就會介紹四種自己親身試過，完全無伏既方法幫大家去識日本朋友；最後亦都會做返個比較，等各位讀者可以用岩自己既方法～
Hello Talk
Hello Talk係一個語言交換app，經過多次更新，佢亦都慢慢成形同受到世界各地既人關注，基本上只要學語言既朋友都絕對唔可以錯過呢個app！
基本上Hello Talk同大家用開既whatsapp睇落差唔多，但就多左一套語文學習工具同埋朋友搜尋系統，幫你篩選理想聊天對象！而睇得呢一篇文章既你當然係想同日本人傾計啦，以下筆者就會一步步教大家點樣用呢個app去識日本人～
首先第一件事當然係註冊啦
填好個人資料之後就可以進入選擇你想學習既語言
＊當中母語分為繁體中文及廣東話，以筆者經驗前者會比較多人學（自然有多啲聊天對象選擇），但後者會對香港大啲興趣，比較容易展開話題
完成註冊之後自然進入系統配對版面，大家可以根據對方性別、年齡、頭像去揀選心目中既聊天對象
＊如果大家只志在順順利利搵到個日本人傾計，筆者建議大家以「在線」排序再選擇。因為呢個app有唔少人註冊左就長期唔on，所以如果以「在線」作排序的話就可以增加對方回應你既成功率！
除左以上述方式尋找對象之外，大家亦都可以向右掃轉到「動態」版面，呢個版面其實同facebook一樣，所以大家可以透過對方發佈既狀態睇下岩唔岩傾，再以「發信息」及「加語言顆伴」既形式識朋友！
順帶一提，對話版面仲附帶左好多小工具幫大家檢查文法同翻譯，不過有啲功能係需要比錢先用到…（其實大家上網查一樣做到同樣效果）
提一提大家，想搵到一個傾到計既對象好講彩數，所以筆者會建議大家有殺錯無放過！超大量地add人，就算有大量人無回覆都總有一兩位願意同你傾計～
Lang-8
之後筆者想介紹既就係自己都經常使用既「Lang-8」，可能有唔少讀者都已經知道呢個網既存在。只要click入呢個網址就會發現大家可以將自己既寫作練習上載到呢個平台，就會有日本人免費同你改！
雖然之前既文章都介紹過呢個網站，但就集中係日文寫作方面～不過今次既主點既然係識日本人，當然會主力講多啲點樣善用呢個平台識朋友啦！
上到去個網首先註冊左先
按「發表」就可以開始寫文章，然而最重要既係下一步…
就係多謝幫你改作文既個個人，並隨即新增佢為好友，等佢可以長期留意到你所發佈既文章（你又可以睇返佢所寫既），加深大家之間既交流
當然大家亦都可以以進攻既姿態主動識人，係目錄之中按下「尋找語言朋友」
但仲未完！因為我今篇唔係教大家搵人幫你改作文，而係真係搵個朋友傾計…所以lang8今次主要既功能其實係「訊息」呀！
筆者鼓勵咁多位讀者如果真係想識日本人，就唔可停留係被人改作文／幫人改既交流，而係主動的！進擊的！去訊息人…當大家傾到咁上下熟，自然可以問下有無機會拎個line，之後就「日本友達get」！
DRRR CHAT
如果大家有睇無頭騎士呢套動話的話，絕對唔會對呢個聊天室感到陌生！不過呢個chatroom唔單止係動畫中出現，更加有fans建立左個真．chatroom！而入面當然大部份都係日本人啦！
不過呢個chatroom其實唔止得一個，比較多人玩既係以下呢三個
到底邊個最好？筆者就會推薦返自己最常用既http://drrrkari.com/～點解？
因為以筆者經驗，呢一個網日本人既密度係最高，其他都比較多外國人（例如大陸，台灣，歐美國家等等…）
揀自己icon同輸入自己個名
之後就可以按入室同日本人對話
當中係該聊天室留言既由小學生到上班族既都有，所以完全唔使驚有代溝架！基本上入到去就隨心所欲地發言，想講咩就講咩日文都好，都可以放膽入去玩下，唔使驚文法錯，因為只要多啲做交流，就會慢慢適應同進步！
LINE友達募集掲示板
最後一個就黎個簡單直接架啦！睇到個名就知係點玩，無錯，就係將岩心水既對象既id加入自己line度…
呢一類既網站多不勝數，基本上筆者都係隨意揀一個去搵朋友：
唯一一點要提提大家既係唔好add一啲話會比你睇啲「正野」既女仔，因為多數都係假ac，主要用黎放啲釣魚／有毒link比你…
最後亦都係最重要既一part，就係4種方法既比較啦！！
最方便：drrr chat>hello talk>lang8>掲示板
如果你係單純想搵個日本人吹水練日文的話，咁drrr chat一定係你不二之選～
因為註冊都唔使，入到個網按兩按已經可以同大量日本人對話，省去一大堆輸入個人資料／搜索朋友既步驟同時間
最安全穩陣：lang8>hello talk>drrr chat>掲示板
如果你係一位比較怕陌生人既人，lang8就可以比你慢慢建立關係，最由你自己決定去唔去同一進一步發展，而且唔需要諗話題怕尷尬，大家只要幫對方改下文法就可以叫做有交流，可以接觸日本人既同時又可以同對方保持一段距離
drrr大家都要帶眼識人，因為筆者都試過見唔少怪叔叔，成日問人拎相，又講咸濕野；而掲示板既更加唔使講，尤其係講明自己係女仔既，有唔少數都係伏－一係叫你幫佢買點數，再唔係就係假ac…
學岩學日文：hello talk=lang8>掲示板>drrr chat
但如果你只係一位日語初心者，咁hello talk/lang8就可能最岩你啦！首先hello talk/lang8有別於其他2個，佢本身就係為學外語而設，所以對方會有心幫你改文法，教下你日文
但drrr呢類chatroom呢，大部人都係預左對方係日本人，所以你唔識日文佢地都未必會答你，加上chatroom當中有唔少既流行語係書本上唔會教到，如果唔係日文有返咁上下程度都未必可以順利咁係入面對話
About Post Author
