【廣島本通商店街】 – 潮人必去8大商店 - 喜愛日本 LikeJapan |ライクジャパン

去日本當然一定會去行商店街啦 , 廣島有本通商店街 , 有超過60年歷史 , 雖然唔夠大阪東京嘅商店街大，但所有嘢都好齊全㗎~
但一般行商店街大家都會行好大路嘅店例如運動品牌 , ABC Maket , GU , Uniqlo 等等
今次想同大家推介下除咗一啲出名嘅鋪頭外 , 仲有啲咩又靚又特色嘅鋪頭值得大家行啦~

Tutuanna

日本商店街都有好多買襪嘅鋪頭 , 日本當地人好鐘意著中長襪 , 著鞋時有啲層次嘛 , 所以佢地啲中長襪特別多款式 , 而Tutuanna相比其它鋪頭啲款比較特別啲選擇又多啲 , 價錢都係￥1080 3對(税込) , 鋪頭行入少少仲有內衣睡衣 , 如果大家想買襪 , 幾推介依間㗎~

▲本通商店街依間Tutuanna都幾大間㗎~

▲我就係見到依對襪比佢地吸引咗入去啦~ 好靚呀

▲最後都忍唔住買幾對襪 HAHA

3Coins

佢係一間￥300店 , 加埋稅就￥315 , 計返港幣大約係$22 ,主要賣的是日常生活百貨、雜貨，仲有一啲女仔飾品 , 收納袋應有盡有，要買生活品3coins非常值得㗎 , 但本通依間有少少細種類唔夠多 ~

▲依間比較啱女仔行，有超多頭飾手飾

▲仲有一啲生日party嘅用品買呀 ~

Randa

依間係賣女士嘅鞋 , 鋪頭入少少都有啲女裝 , 依家啲鞋款幾靚 , 有晒唔同style嘅款式 , 有斯文款 , 日系款 , 歐美款都有 , 佢Size係用CM嚟定22-25.5CM相等34-41碼 , 但佢價錢平均大約係￥6000 – 10000 (港幣約$400-700) , 其實價錢中等都可以接受 , 質料都唔錯㗎~

▲本通嘅randa都幾好行 , 款式都齊~

Riche Crande

Riche係一間 total beauty salon , 可以整頭髮 , 指甲同植睫毛 , 其實去日本除咗行街仲可以試下扮下靚 , 整指甲約¥5660 (約港幣$400) , 植睫毛約100條睫毛￥5400(約港幣$380) , 染頭髮加剪約¥6480 (約港幣460) , 價錢唔貴可以值得一試 , 染頭剪髮好抵呀~

▲樓上全層 , 樓下有好多相版同價錢

Asics Walking

Asics出咗一個fashion嘅系列 , Walking系列啲鞋款好似平時出街嘅款式 , 相信Asics想收納更多粉絲 , 同時運動同出街都可以著佢地嘅品牌 , 咁我相信Walking系列都會有運動鞋一樣咁舒服 , 去到日本可以值得睇下~

▲如果就咁睇鞋款 , 相信大家都估唔到係運動品牌Asics啦~

Jeans Mate

有好多唔同嘅品牌都係Jeans Mate搵到 , 例如Levis’s ,Edwin , Lee ,Dickies等等年輕人最愛嘅品牌 , 同埋佢地鋪頭有Tax-Free , 通常依個鋪頭我地都可以留低唔少銀両係到㗎~ haha

▲佢地款式都幾多 , 仲有香港人最愛嘅Champion~

Spinns スピンズ

依間同Jeans Mate有少少相似都係有類似嘅品牌 , 但Spinns スピンズ就比較多元素除咗品牌之外 , 仲有好多潮流時裝價錢都唔算貴大約港幣$150右左 , 鋪頭仲有2層幾大㗎~

▲佢地都幾多選擇 , 有運動款 ,潮流款 ,原宿款仲有男裝咩人都啱行 ,推介 !!!

Blue Earth

依間Blue Earth想重點推介一下 , 近年好興古著同復古(二手) , 我最近去日本都好想睇下復古名牌 , 因為我知道價錢好平 , 但廣島地方唔大所以之前上網睇過無咩提供有依啲嘅鋪頭 , 但點知本通有一間賣古著嘅鋪頭 , 所以今次就去大開眼界啦~ Blue Earth除咗古著都有新貨買到㗎 , 仲可以做埋二手回收添 , 有時用舊款換新款就可以用依個方法啦 , 好多日本人都係咁做㗎~ 所以依到一定係尋寶嘅好地方 !