平民居酒屋 全店280YEN鳥貴族

 

鳥貴族係一間食雞肉串燒為主題嘅居酒屋，係全國都有好多間分店，所以最好大家就係官網度搵下分店，總有一間係你附近！而今日筆者去嘅就係淺草分店﹐佢位置係淺草中央地帶，只要係東京鐵路銀座線淺草站8號出口出尼望下對面馬路樓上牌就會見到嫁啦~

 

上到去佢大部份坐位都會有半牆仔同其他食客揀開，咁就有返私人空間同埋唔怕俾側邊嘅人太興奮衝過尼啦!

 

去到最興奮睇MENU時刻，唔好意思筆者真係太興奮，竟然連相都唔記得左影(跪低)千萬分抱歉，不過唔緊要，佢個網站都有附上MENU，仲係有埋圖嘅!

附送連結一個:https://www.torikizoku.co.jp/menu/

真係無講大話，所有野都只係280YEN，連左稅都只係302YEN~

 

串燒方面佢大部份都係以雞嘅唔同部份為主，個人建議大家最好都係叫返有關雞嘅料理啦，因為牛有少少一般…都唔係一般…有少少咬唔開…雞個方面佢有好多唔同嘅配汁，睇唔明MENU講咩都唔緊要!佢有圖!不過睇圖能力要有返咁上下!好似筆者咁一時興奮叫多左唔小心叫左雞皮…(一直都好驚叫左雞屁股，只係留意屁股個字而輕敵左仲有雞皮呢個選項)

嗯…食落係幾香口，不過佢燒到變左黑色有少少在意，同埋食一兩舊就夠啦。

 

唔小心講多左衰野，其實佢雞肉真係幾嫩幾甜嫁!我個人本身又好鍾意食雞，如果俾我揀多次，我會叫曬雞肉串!(因為食落真係幾嫩) 雖然佢有好多種配汁，但係我覺得雞配鹽係最能特顯鮮味，圖中嘅雞肉燒蔥都係一個好唔錯嘅選擇!

除左雞之外，芝士燒年糕同埋拉麵都係唔錯嘅選擇。野飲仲有好多款，啤酒仲係大大杯!加上佢時間大多開到凌晨，絕對係一班FRIEND去嘅好選擇。不過…要小心睇圖呀!

 

重點係呢一間野好平！

 

 

鳥貴族：https://www.torikizoku.co.jp/

 

全力支持：大新銀行