相信唔少「絲打」對文具都有一份執著，因為好嘅文具唔止令工作變得方便，仲可以增添生活樂趣！日本12月15至17日即將舉行「文具女子博2017」，招攬超過70間文具相關廠商及店家參展，展出日曆、手帳令人感到開心嘅文具禮品，仲有限定商品發售！如果你都係「文具控」嘅一分子，記得唔好錯過喇！
專為女性而設的文具展！
據官方介紹，雖然文具唔難購買，但一般人可以參與嘅大型文具展覽唔多，好難一次過睇到大量嘅日本產文具。而講起文具，第一時間諗起嘅就係「女子」！因為好多女性見到文具都會好興奮，對於文具有種莫明的執著，所以今次嘅「文具女子博」專為喜愛文具嘅女性而設，希望每位女性可以感受文具嘅魅力及採購嘅喜悅！
不過，只要你係「文具控」，其實男性都可以入場嘅。
過70間參展商！日本最大級文具祭典！
「文具女子博2017」自稱係「日本最大級文具展覽」，除左有大家都熟知嘅文具老牌、新興文具製造商參展，仲邀請到文具控中超有名氣嘅小店，作為待別出店參展！「文具女子博」至今公佈的參展商已超過80間，另外仲有2間「特別參戰」嘅文具鋪，陣容可以話十分強大！
以下為大家介紹幾款特別嘅參展商品：
超可愛蠟筆配色手錶！
呢款係日本手錶牌子NEO與日本經典蠟筆品牌CRAY-PAS，合作推出嘅手錶系列！手錶用上經典蠟筆配色作主調，每款都好可愛！今次event買齊12色，就送搞怪的蠟筆型包裝盒，值得收藏！
＝＝＝＝＝＝＝＝＝＝＝＝＝＝＝＝＝＝＝＝
古川紙工限量Memo紙
凡於會場嘅古川紙工買滿2000yen，每日頭150位客人就可以獲得限量嘅Memo紙！古川紙工嘅紙箋出名紙質好、上色精緻，而且限量Memo嘅動物都好可愛，文具控真係唔可以錯過！
＝＝＝＝＝＝＝＝＝＝＝＝＝＝＝＝＝＝＝＝
和風限量postcard及wrapping paper！
日本NB Co.ltd專門出產紙品文具，今次與展覽合作，推出限定的postcard及wrapping paper！
＝＝＝＝＝＝＝＝＝＝＝＝＝＝＝＝＝＝＝＝
Stock的異國風文具
這間名為Stock嘅小店，專賣異國風情嘅文具，很受日本文具控喜愛！泰國，甚至連意大利嘅文具都有售賣！
＝＝＝＝＝＝＝＝＝＝＝＝＝＝＝＝＝＝＝＝
每日買都有啲不同嘅日曆
這間ハルカゼ舎有樣很特別嘅商品，就係購買日曆時，每頁都會告訴你當日是甚麼特別日子！
＝＝＝＝＝＝＝＝＝＝＝＝＝＝＝＝＝＝＝＝
即場體驗工作坊
除此之外，會場還設有工作坊，讓大家即場DIY手作！像是「蠟製紙」嘅工作坊，就以蠟去加硬紙張，令原本普通的紙張有「過膠」效果，製成小卡、禮物掛牌都好適合！
雖然官方未公佈展覽嘅所有內容，但參展品牌眾多，相信總有商品適合大家！有時間記得唔好錯過呢個文具展喇！
圖片來源：bungujoshi (Instagram)、Harukaze＿sha(Instagram)、ts-neo
文具女子博2017
時間：
2017年12月15日-16日 10:00-17:00 （16:00 最後入場）
2017年12月17日 10:00-16:00 （15:00 最後入場）
地點：
東京都大田區平和島6-1-1（東京流通中心 第二展示場 F Hall ）
入場門票：500日圓（含稅）
詳情可參閱官網
About Post Author
