大碼朱古力「超級軟雪糕」 日本便利店 184円就買到！

近來日本好興超長雪糕，個個都排長龍爭住買，排死人啦TT  好彩而家便利店都有得買最新出嘅大碼長雪糕，唔洗排到頸都長，yeah～

 

依款「朱古力X雲呢嗱味 超級軟雪糕」（赤城　スーパーソフト ショコラ＆バニラ）雖然冇舖頭嗰啲長雪糕長得咁誇張，但小記親身去度過佢size，都有成12CM咁長，普通軟雪糕嚟講，叫做加大碼㗎啦！

（圖左：普通軟雪糕 圖右：朱古力X雲呢嗱味 超級軟雪糕）

 

依款2溝雪糕雲呢嗱味比較重，好彩上面㵉咗啲朱古力醬，大家一啖就食到兩種朱古力味，朱古力味唔洗怕「冇碇企」～～～

 

其實喺便利店買到嘅雪糕，好多時都因為雪得太硬或者因為保存問題，搞到個雪糕冇咁軟身。不過值得一讚嘅係，今次依款「超級軟雪糕」嘅口感依然十分軟滑，我諗你話係舗頭新鮮唧出嚟都有人信～

 

便利店嘅雪糕最大賣點就係擺得，唔洗逼住即刻食！食飽飽返酒店前買返2枝雪住先，可以等到「落格」後先嘆甜品，係咪very good先www

朱古力 x 雲呢嗱  超級軟雪糕

價錢：184円            

指定販賣點：Family Mart、Circle K、Sunkus