喺呢個Moment睇緊呢篇野，証明而家好得閒冇野做啦！唔好浪費生命，不如參考吓日本網友喺Twitter上分享嘅超簡單蘋果批食譜，整返個暖笠笠軟綿綿嘅蘋果批啦！
呢個蘋果批勁在要準備嘅材料得幾種，個製作過程仲好簡單幾乎零失敗（除非你係終極地獄廚神），所以一放上Twitter就好快就有超過10萬個Like，當時人應該都嚇咗一跳！
好，事不宜遲，首先大家要準備嘅材料有蘋果、牛油、現成pancake粉、砂糖、牛奶。
蘋果要先切成薄片備用，跟住就將牛油同大概3湯匙嘅砂糖放入煎Pan以細火煮溶，要小心糖好容易濃，所以呢個過程千祈唔好行開。
當見到啲牛油開始轉色，就可以慢慢逐塊蘋果懶靚咁一塊塊舖好。由於要好貼近個煎Pan，大家要小心唔好燙親！
喺煎緊啲蘋果之際，可以開始搞搞個批底。因為係用現成Pancake粉，所以只要跟住個包裝左溝右溝就OK！不過要留意，一日未倒啲漿入煎Pan，一日都要Keep住不停發。
個漿搞掂就可以輕輕手咁倒入煎Pan，而成個甜品已經完成一大半！
倒哂啲漿入去就可以閂蓋，久唔久就可以打開睇吓入面咩情況，如果Pancake冇癡住個煎Pan，就可以用竹籤拮一拮睇吓有冇漿粉癡住，冇的話即係個Pancake已經熟哂，可以上碟～
搵個靚靚地嘅碟嚟裝係咪呃得吓人呢！
想將個蘋果蛋糕變得更完美，一定要整埋個絕配Source！
只要將蘋果切成細細粒，再將砂糖一齊倒入個煎Pan度煮溶佢，煮到差唔多次後就可以加少少紅酒，等蘋果嘅水份畀熱力迫哂出嚟之後就可以熄火攤一攤個紅酒蘋果。
攤凍咗之後就可以用個兜仔裝起佢㗎啦～
放少少喺蛋糕隔離，係咪好似Cafe先食到、幾十蚊一件嗰啲高級甜品呢！
圖片及資料來源：nlab.itmedia.co.jp
About Post Author
