去日本一個月，就住足淺草一個月。之前成日上網或者睇旅遊書嘅雷門寺，變成每日來往嘅必經通道。
既然我同佢咁有緣，無理由就咁同佢「Just to say Hi」㗎，今次就同佢大家介紹下浅草雷門通り同周邊商店街嘅小食啦。
1）亀屋
▼第一間要試食嘅就係就係呢間淺草寺御用供品嘅「龜な 仙貝」啦。
▼店裡面其實仲有賣人形燒，都好受歡迎㗎。唔知會唔會係因為睇住師傅新鮮制作，零舍吸引呢？
▼仙貝擺放得井井有條，真係未試都已經覺得好吸引。而且佢仲有分唔同嘅味道同厚度。厚嘅就500円5塊、薄嘅就500円8塊。貪心嘅話仲可以要求兩種唔同口味嘅Mix添。
▼今次我就買咗厚身嘅「龜」口味（應該係醬油味![【大檢閱】淺草人氣小食試食報告]()
）
食後感：一咬落去個感覺就好似食旺旺咁，可能因為醬油味嘅關係，所以味道偏咸。唔知係咪因為揀咗厚身嘅關係，佢比想像中硬好多，要咬開會比較費力！如果我可以再揀，應該揀薄身易食啲，啱晒夜晚係酒店口痕嘅時侯過下口癮。不過價錢方面我就覺得有少少貴。
2）舟和（Funawa)
▼有去過淺草嘅朋友一定唔會對呢間舟和感到陌生。因為單係淺草佢已經有七間分店，係呢個區域入面，佢就好似7-11咁，梗有一間係左近。
▼圍繞住店舖嘅客人大多都係食佢嘅雪糕，不過今次我想試嘅係佢另一種人氣食品。
▼登登，就係佢啦！「蕃薯羊羹銅鑼燒」，盛惠240円！到底一個平平無奇嘅銅鑼燒加埋蕃薯羊羹會唔會產生乜野神奇嘅化學作用呢？
食後感：紅豆甜度適中，粒粒分明。蕃薯條亦出奇地夾，甚至比紅豆更搶。可惜餅皮有少少硬，唔夠鬆軟，或者同佢一早整好有關。除咗呢點比較扣分，整體上配搭亦都相當唔錯，可以一試。（特別當你想FF自己係叮噹嘅時侯![【大檢閱】淺草人氣小食試食報告]()
）如果淨係想食蕃薯條亦可以選擇單買。
3）花月堂
▼呢間店除咗同舟和一樣，梗有一間係左近。總共有5間分店係淺草！不過令我印象最深刻嘅其實係佢個陣「香氣」！
▼每次經過附近嘅時侯都會聞到一陣陣好甜嘅氣味，跟住味道走，你就會發現原來係佢地嘅「菠蘿包」。而除咗菠蘿包，佢嘅蘋果批亦都好出名。
▼單買一個包或者批就要220円，不過如果人多嘅話，可以試下買呢個SET，5件加埋只需要1000円！
▼今次我就試咗佢嘅招牌包同批啦。個包大到同我塊面差唔多Size呀～（話晒我都係大面界代表呀![【大檢閱】淺草人氣小食試食報告]()
）
食後感：同菠蘿包無菠蘿味一樣，其實佢都只係形態上似。（同埋其實日文係蜜瓜包）佢表面香脆，仲有白糖舖面，唔會過甜。食落口感似忌廉包，好鬆軟，整體配搭唔錯。雖然佢好似大大個咁，但食完都唔覺漏，買嚟做早餐非常正！而蘋果派酥皮亦非常香脆，蘋果餡味道適中，不過如果表面掃上一層糖漿先焗或灑上糖粉，味道應該會更加Perfect啦！
4）浅草メンチ
▼以下落嚟介紹呢個係極強力推薦嘅「炸肉餅」。因為真係好好食，好好食，好好食～～（好重要所以要講三次![【大檢閱】淺草人氣小食試食報告]()
）
▼佢係人氣天婦羅店「大黑家」前面。舖仔細細，炸肉餅分批出爐，我去到嘅時侯都要等一等。
▼我買完食緊嘅時侯，人龍馬上出現！仲要幾乎全部都係日本人，可見當地人都相當熱捧。
▼肉餅細細粒一個200円。新鮮熱辣整起，急不及待咬一啖落去，你睇下啲汁多到。
食後感：佢唔單只個皮好脆，一咬落去入面除咗肉仲有洋蔥（豬肉Mix牛肉）。重點係：啲肉汁湧晒出黎，夠晒juicy！我食完第一啖已經忍唔住係咁講好好味！而且因為太好賣，所以全部都即場做，好新鮮。如果唔係仲有好多野要試同埋生瘡真係好想再Encore！！（講起都好想食![【大檢閱】淺草人氣小食試食報告]()
）
5）壱番屋
▼炎炎夏日，梗係要嘆下冰解解暑啦！今次就同大家試呢個「果實冰」。
▼佢總共有4種口味俾你選擇，我比較貪心。所以就揀咗Mix（芒果，提子，士多啤梨），盛惠500円。
▼本身我以為佢係刨冰之類，點知原來佢係棉花冰。細細杯，唔會膩。
食後感：由點單，收錢到拎野食，整個過程唔駛兩分鐘非常快捷！而且佢唔係冰汁分離！而係混和一齊，偶爾仲可以食到小小嘅果粒，酸酸甜甜咁好醒胃！加上棉花冰真係整得好幼滑，大熱天時食返杯真係忍唔住講句爽呀！大推！
其實淺草嘅小食又點只咁少，好似炸饅頭，團子，刨冰等等…但奈何個胃唔爭氣，所以難免要做出取捨。如果單就以上我提到嘅食物，我真係非常強烈推介大家去食個個「炸肉餅」同埋「果實冰」。當然各人口味唔同，不過未試過嘅都不妨試下啦！
你地係淺草又有無食過啲咩好味小食可以分享呢？不妨大家開心Share下啦![【大檢閱】淺草人氣小食試食報告]()
【亀屋】
地址：東京都 台東区 浅草 1-37-1
電話：03-3844-7915
時間：9:30－19:00
網站：http://www.koedo-kameya.com/
【舟和/Funawa】
地址：東京都台東区浅草１丁目３−５
電話：03-5828-2701
時間：10:00－19:30
網站：http://funawa.jp/
【花月堂】
地址：東京都 台東区 浅草 1-32-14
電話：03-3843-6526
時間：10:00－17:00
網站：http://www.asakusa-kagetudo.com/
【浅草メンチ】
地址：東京都 台東区 浅草 2-3-3
電話：03-6231－6629
時間：10:00－19:00
網站：http://asamen.com/index.html
【壱番屋】
地址：東京都台東区浅草1-31-1
電話：03-3842-5001
時間：10:00－18:00
網站：http://www.senbei-yaketayo.com/
About Post Author
