【 從外國人角度看日本生活文化習慣】
你地有無試過留喺日本比較長嘅時間呢？
如果有嘅話，我相信你地都會察覺到當中一啲日本同香港嘅文化差異。可能你地會話，「我去旅行幾日都留意到啦！」無錯，的確可以，因為日本確實有一堆對於香港人黎講都幾特別嘅文化或習慣，例如有咩？即刻同你睇下啦！
第一，日本煙民人數眾多，而且比香港多吸煙區，但仍然係最長壽國之一！
去日本果時，你地有無發覺其實都好多日本女人係食煙嫁呢？
我第一次留意到嘅時候都嚇一嚇，因為喺我嘅印象中香港唔係無女人食煙，
但對比男人都唔算太多，但係日本嘅女煙民絕對可以用多黎形容！
雖然我解釋唔到點解咁多人食煙都仲咁長壽，但我留意到嘅就係，
日本街頭上係幾乎無人邊行邊食煙的，呢個景像就同香港有好大差別了。
日本通常都有個框框係「喫煙所」，所有煙民都會喺入邊食。
個人認為呢個設施非常之好，起碼唔洗吸二手煙先丫嘛！
第二，電車有時間表
呢樣野又係香港無嘅。香港mtr就只會顯示幾多分鐘後會有車，
而唔會好似巴士咁有時間表。其實我就覺得呢個差異唔算太特別，
但原來日本人眼中覺得我地無時間表係好不可思議嘅事黎嫁！
我曾經同日本人傾過，因為佢地係甚至會將張「時刻表」貼喺屋企，
所以一聽到話香港無果時係真係O左咀嫁！係真係O左，仲要超驚訝！
第三，街頭免費派紙巾
我諗呢個經驗應該唔少去過日本嘅人仔都試過啦，
就係佢派紙巾就等如香港派傳單咁！
講真，免費有紙巾我真係覺得超荀！！因為成日都會有時大頭蝦，
唔記得帶紙巾出街，喺呢個時候唔洗特燈買，
只係等人派比你就得啦！真係好正囉。
而且有時紙巾上邊嘅廣告仲設計到好靚，唔多捨得用tim嫁！
第四，藝術品一樣的便當
呢個大家睇劇睇動漫都知啦，日本人食lunch係自己帶便當，
而唔係好似香港人咁出去食嫁！無論番學定番工，
佢地都離唔開便當，而呢D便當唔係普普通通，而係整到勁靚，
砌到成幅畫咁款！
恨唔黎嫁啦，喺香港呢個時間等於所有嘅社會，
邊有人會早起整靚靚便當嫁？訓多陣好過啦。
第五，著suit嘅的士司機
由於我係窮L，所以無試過喺日本搭的士，
但我都知道，日本嘅的士司機係著到成個上班族咁，
打哂領帶嫁！第一次見到果時，真係突然覺得連司機都高級過人！
第六，女性超悉心打扮
雖然我係女人，但我出街係鍾意?女多過?仔嘅！
然後我就發現，每次喺日本街頭見到嘅女性全部都打扮到好靚！
拿香港女仔會打扮同hea look嘅人數我諗係一半半左右，
但日本誇張D講，可以話無人會hea嫁！
Oh my god點解會咁呢到底，我睇唔透。
佢地慣左著高跟鞋，慣到直頭可以跑去追車，
而且9成都會化妝，素顏嘅得好少數！
對於我黎講就有好有唔好，
好嘅就係自己都可以打扮得靚D，著D平時香港唔敢著出街嘅衫，
唔好嘅就係望到D架妹咁靚會好自卑嫁嗚呀。。
講住咁多先啦！有無覺得文化差異其實係好有趣嘅野黎呢？
原來人地習以為常嘅野我地會驚訝，相反都係，
所以有時去旅行最好嘅地方就係唔單止吃喝玩樂，
仲可以了解下另一個地方嘅生活文化，擴闊下視野！
About Post Author
