相信各位識飲識食嘅朋友近年都意識到香港多咗好多關於清酒嘅Promotion同活動，例如日式超市會搞啲期間清酒祭，仲有提供好多元化嘅清酒比大家揀。另外有啲餐廳會舉辦清酒Free Flow Party或者Food Paring等等，有Demand先會有Supply，呢一切都證明左清酒熱潮已經黎到香港喇！作為一個喜愛日本，同時喜愛日本清酒嘅年青人，當然想將日本清酒文化介紹比更多人識，因為飲酒最緊要係開心Share！
日前就我聯同Like Japan嘅Emily應邀參加左一個係香港嘅清酒盛會 — 由新潟縣酒造組合主辦嘅「香港新潟日本酒祭2016」。呢個香港日本酒嘅盛事喺The MIRA Hong Kong舉行，只要$400(早鳥優惠)，相等於一餐飯嘅價錢就可以入場任試由新潟縣30個酒藏帶來嘅超過200款清酒，同時間可以同藏人交流清酒心得，無論係資深飲家或清酒初心者都盡興而歸。
新潟縣以生產優質稻米而聞名，當中最出名嘅越光米「コシヒカリ」，相信有唔少朋友都聽過。雖然越光米係食用米，但其實新潟縣同時都有出產唔少釀酒米，好似雄町、菊水、五百萬石、山田錦等等，有好米自然有好酒，所以新潟縣嘅清酒絕對係日本數一數二 。另外新潟冬天比較寒冷，清酒經過低溫發酵，口感清爽細緻，形成新瀉淡麗風格。
每間酒造都精心挑選左3-4款唔同級數嘅清酒推介比大家試，我呢啲酒鬼當然好似去左天堂一樣咁「飲み放題」逐間逐款試啦，但對於好似Emily呢 D清酒初心者黎講都有唔少入門好選擇：
1. 久保田．萬寿 — 純米大吟醸（朝日酒造）
識飲清酒無可能未聽過「久保田」呢個名，佢係新潟縣其中一個最大規模嘅酒造。
而「萬寿」（圖右一）就係久保田系列入面頂峰之作，以優質釀酒米「五百萬石」釀造，香氣清新味道平衡而且口感柔和。話說我當初都係因為飲過呢支「萬寿」之後就愛上左日本清酒。
2. 市島．純米ぷらちなスパークリング — 発泡性純米（市島酒造）
Emily話最鍾意Sparkling Sake，因為易入口，同埋好鍾意個種清新微甜嘅感覺。呢支「市島 純米ぷらちなスパークリング」係樽內進行二次發酵，產生細緻幼滑嘅氣泡，輕微甜味而且口感清爽，啱晒女生們口味。
3. カワセミの旅 — 純米（越之華酒造）
另一支極受女生們歡迎的清酒，皆因日本酒度逹負30度，味道十分甜美。而且呢支酒被法國知名巧克力師Jean-Paul Hevin推薦為最適合配朱古力嘅清酒。酒造代表仲即場比左D朱古力我地配酒，呢款酒果然令到朱古力嘅香氣係口入面提昇，好似食緊高級法式甜品咁，女生們實鍾意啦。
4. 綠川．大吟釀 （綠川酒造）
如果大家都係好似我咁唔喜歡太甜，喜歡辛口少少又有深度嘅話，呢支「綠川．大吟釀」(圖右一)就啱晒你喇。「綠川．大吟釀」經過長時間工序同熟成，香氣味道豐富而平衡，餘韻帶些微木香。
來自台灣的陳帥哥為我們介紹綠川的特色。
除左清酒之外，仲有用梅酒比大家揀。
另外，無親身嚟到現場參展嘅酒造提供嘅清酒都有成過百支比大家「自由斟」。
除咗酒之外，大會仲提供精緻小食等大家邊飲邊食。
其實好酒太多不能盡錄，無論你本身對Sake有無認識都好，你總能夠係呢二百多款酒入面搵到啱你心水嘅酒，喜愛日本嘅你絶對值得黎體驗一下！最後要多謝咁多位遠道而來嘅酒造代表為我地帶嚟咁多好酒，同為我地詳盡介紹新潟清酒嘅特色！如果下年有機會再舉辦大家就唔好錯過呢個機會喇！
以上，由酒友酒魅Drinklawei．Mike & 喜愛日本Like Japan．Emily為大家報導。
About Post Author
