愈嚟愈多人去旅行都會試吓住 Airbnb，好壞參半，今次我去大阪都住返兩晚 Airbnb 先～
其實個人鐘意 Airbnb 多過日本嘅酒店，因為日本好多酒店都好細！連個篋都開唔到，開到又無位行…
Airbnb 就可以揀間大間啲嘅，最好就係揀啲可以最多住 4 – 6 位住客。但係如果兩個人去都只係會收兩個人錢！
你話抵唔抵先？不過都有缺點嘅～
今次就揀咗呢間 Great Location 5Mins to Dotonbori, 唔知點解佢會改個咁嘅名 lol。
網站顯示就 $296 一個人一晚，不過仲要計埋清潔費果啲，最後埋單就係 $880 兩晚，都唔算係好平。
book Airbnb之前最重要係睇評價先，雖然唔係好多人留reviews，得十個，但係整體都好評，所以應該無咩問題嘅～
我事前仲要無同過個主人溝通過，淨係比錢，佢 email 啲資料俾我，然後我就自己去喇，所以其實都有啲驚中伏。
缺點嚟喇，Airbnb 都係公寓，係 Google map 搵唔到，要靠個主人 send 俾我個濕鳩地圖指示！
（佢 email 個地址仲要係錯，唔知係咪特登）雖然離地鐵站唔係好遠，但係都夠我搵餐死…
終於到咗樓下，住宅區，周圍無乜店鋪。
然後自己喺個郵箱度拎鎖匙，搵咗一搵，又真係有喎～
上到房，兩張雙人房，乾淨企理，仲有位打開篋，又可以將啲野周圍放，地方夠晒大，點呀？爽囉！
屋內佈置就唔係好多，簡簡單單咁，不過有張枱用吓電腦都幾好
最重要嘅係 Airbnb 設備通常都齊全！有廚房、大雪櫃同微波爐，真係可以學黃秋生煮野食～
仲有免費洗衣機！可以洗衫～不過唔好半夜洗喎，因為會發出嘈音，又會俾人鬧嫁喇。
陽台一個。外面風景都無咩野睇。
仲有個缺點，住宅區樓下乜都無，便利店都無間，好彩都有部機買吓嘢飲，如果唔係半夜頸渴真係唔知點算！
整體嚟講，呢間 Airbnb 都唔錯，因為都近心齋橋，行十五分鐘左右，而行十分鐘開始都會多返啲食店同酒吧，地點都算唔錯啦，幾熱鬧。
不過就係樓下乜都無囉，要買嘢就要行返出去，同埋地址比較難搵。
要注意住 Airbnb 盡量唔好整污穢人地地方，我走之前都有執返整齊嫁！
揀 Airbnb 果陣要小心啲揀，睇多啲評語先揀，咁就無咁易中伏喇。
咁酒店真係比 Airbnb 穩陣好多嘅，揀邊樣其實都各有各好，如果你好似我咁有冒險精神不妨試下 Airbnb 啦！
About Post Author
