上次同大家約略介紹左威士忌嘅分類，了解完當然要實戰啦！
去到日本就算你唔買，總梗有個朋友叫你幫佢班支「響17, 響21」返黎比佢享受一下。如果唔知窿路的話好多朋友都會等到臨走Duty Free先黎入貨，唔係話唔得，Duty Free有嘅酒款始終有限，而且日威的話仲有好多價錢特別嘅「特別版」俾大家選購。其實日本烈酒稅比香港相對平，所以就算買其他國家出產嘅Whisky都較香港抵，所以唔買宜係走寶喇！
有見及此，今次就為大家介紹幾個絕對值得去入貨嘅地方！
某好受歡迎的Whisky推出左「機場特別版」，如果十分喜歡同欣賞個包裝同有大量銀彈嘅朋友歡迎大量入貨。
- 係人都會去但可能無留意到嘅 – 激安の殿堂ドンキホーテ
相信去過日本嘅朋友都一定去過「ドンキホーテ」，全日本好多地方都可以見到佢，對遊客黎講佢最吸引嘅地方就係乜都有，仲會開到凌晨可以留返時間係半夜「ドンキホーテ」雖然唔係賣酒專門店，但勝在方便，仲可以夾埋其他嘢退稅。
基本入門款式嘅日本威士忌都可以係到搵到，如爆晒人氣嘅響，山崎，白洲，余市，竹鶴等等一定可以搵到，雖然無年份居多，但如果你個日人品爆發，有機會可以用正常價錢買到響17/21, 甚至係山崎18年我都試過買到！記住去碰下運氣喇！除左日本威士忌外，蘇格蘭，美國波本等等都可以搵到，不過都係入門款式為主。
2. 東京的美酒專門店 – 信濃屋 SHINANOYA
信濃屋係我每次到東京必去嘅酒類專門店，佢係東京有多間分店，而係橫濱都有一間。呢度嘅Whisky由日本，蘇格蘭，美國，加拿大等等都可以搵到，除左款色多之餘，仲可以搵到好多珍貴稀有嘅酒款如高年份的單桶酒（Single Cask）（蘇格蘭威士忌居多），佢地仲會定期推出一D同酒廠合作嘅「信濃屋特別版」作品，所以呢到絕對係Whisky愛好者嘅天堂。唯一個缺點就係無得辦退稅喇。
有次同店長傾開計，佢見我都係個識酒之人，佢仲免費請左我試左D珍貴稀有酒款（右圖：已係1996年倒閉連廠都拆埋嘅蒸溜所Glen Esk），同客人嘅關係好似酒友咁十分溫馨！
左圖為信濃屋特別版嘅Tomatin Single Cask，右圖為店長請我試飲嘅Glen Esk 1984 By Cooper’s Choice。
3. 全日本都有分店的酒類連鎖店 – 「リカーマウンテン」Liquor Mountain
如果唔係去東京嘅朋友都唔洗失望，「リカーマウンテン Liquor Mountain」幫到你！Liquor Mountain 係全日本有好多間分店，香港人經常會去嘅大阪，京都，名古屋等等都有好多間分店，雖然某啲分店Whisky款式比起信濃屋可能無咁多選擇，但係基本款嘅日本Whisky，或者特別少少嘅蘇格蘭Whisky都可以係到搵到。Liquor Mountain勝在多分店，而且部份分店仲接受退稅，所以都值得一去！
雖然係咁，如果你都係鍾情日本Whisky，想買返支少有嘅「響30」或者「山崎25」返去擺下嘅話可能以上嘅地方未必幫到你。如果搵唔到岩心水嘅日威，買返隻蘇威返去絕對係一個好選擇。
某啲日威已經變到可遇不可求，比你遇到而且唔係「炒價」的話你就唔洗諗咁多喇，Take my money！
如果大家對揀Whisky有咩疑問嘅歡迎留言交流下～
+++++++++【樂天平掃日本貨】+++++++++
外加必掃福袋，詳情請參考： www.likejapan.com/cymonbottom
About Post Author
