日本觀光廳喺8月22號公佈咗2018年嘅予算概要，入面提及多項未來希望修改嘅稅收政策，包括簡化消費稅免稅政策。
有意見指免稅政策手續繁複，令唔少人都覺得混亂。根據外國訪日旅客問卷調查，喺免稅店消費嘅外國人入面，有六成表示有「難以區分一般物品同消耗品」同埋「唔清楚要分開一般物品同消耗品計金額」等等嘅問題。
計劃簡化免稅政策 一般貨品消耗品 退稅程序二合一
為咗方便外國旅客，觀光廳計劃修改稅收政策，簡化消費稅嘅免稅手續。將現行嘅一般貨品、消耗品分類合併。兩類物品，只要喺同一日同一間鋪買￥5000 以上、￥500000以下(未包稅)，就可以免稅。免稅商品唔可以喺日本用，亦要喺買咗嘅30日之內帶出日本。
重點：修改政策後，無咗分類之後一般物品同消耗品嘅金額可以加埋計，容易買夠￥5000達免稅要求
現行免稅政策 一般貨品消耗品 退稅程序做兩次
留意番以上嘅新政策仲喺計劃階段。為咗比較佢有幾方便，等我地一齊重溫一下現行嘅免稅政策係點啦！
日本依加嘅消費稅係8%，喺免稅政策下所有唔係長期住喺日本而拎住短期居留（短期滞在）簽證嘅人就合符免稅資格。
免稅規則
可以免稅嘅嘢分做兩類：一般物品同消耗品；一般物品係可以重覆使用嘅物品，例如衫褲鞋襪、手飾家電等等，而消耗品就係用完就無嘅嘢，例如食品飲品化妝品。
一般物品：同一日同一間鋪買夠￥5000 (未包稅)，就可以免稅。一般物品可以喺日本用，要喺買咗嘅6個月之內帶出日本。
消耗品：同一日同一間鋪買￥5000 以上、￥500000以下(未包稅)，就可以免稅。消耗品唔可以喺日本用，所以店員會用個免稅袋入起佢，而消耗品要喺買咗嘅30日之內帶出日本。
重點：因為一般物品同消耗品嘅免稅規則並唔一樣，所以一般物品同消耗品嘅金額唔可以加埋計架！
退稅程序
買完嘢之後就要做退稅嘅程序。拎住passport、買嘢張單同買咗嘅嘢比店員，店員就會整張「購入者誓約書」寫清楚個人資料同買咗D咩。喺誓約書上面簽名，再由店員喺passport上面黐好「購入記録票」同蓋印、退稅。最後去到出境都唔好搣走「購入記録票」、唔好用咗D消耗品，咁就完哂成個免稅手續喇。
簡化手續令到買夠￥5000容易咗好多，如果同時買咗一般貨品同消耗品亦唔駛分開搞兩次退稅程序。加上2020年日本舉辦奧運，日本政府期望外國訪日旅客增至4000萬人次。遊人日次多咗，買嘢優惠易用咗，相信可以進一步刺激消費。
About Post Author
