![[不敗日記]我在上野公園櫻花之中找到快樂](https://www.likejapan.com/wp-content/uploads/2016/04/thumbnail/719_20160407162121.jpg){kind=small}
唔知大家信唔信緣分嘅呢？
經過上一次係某地方，俾我遇上㗎仔「周國賢」，仲要一齊睇東京鐵塔。
我就開始相信緣分！
「從來也沒試過這種心動」
3月23日，我同Mika去咗上野公園玩～
可能你會話「上野公園有咩好玩呀？」
又或者會話「櫻花有咩好睇呀？可以做d咩呢？」
去睇櫻花，重點唔係d櫻花開得有幾多有幾靚，
而係企係你身邊同你一齊睇櫻花嘅人係邊個！
正當我同Mika玩緊既時侯，㗎仔突然send咗個msg，佢同我講佢嚟咗上！野！公！園！
上次同佢一齊睇過東京鐵塔，咁我梗係想同佢睇埋櫻花㗎啦！！！
![[不敗日記]我在上野公園櫻花之中找到快樂](/2016/04/editors/296/20160407153918_KgXwyMnt.jpg)
於是就同佢玩緣分遊戲，憑佢send俾我嘅一張櫻花相，
我要係上野公園到搵到佢係邊！！！
於是我就望住手機張相，周圍搵櫻花，一搵到櫻花樹就同張相拼吓。
![[不敗日記]我在上野公園櫻花之中找到快樂](/2016/04/editors/296/20160407151702_UM3L4Zoy.jpg)
搵極都搵唔到，成個公園可以睇櫻花嘅地方都幾乎俾我行哂喇…
但係都係見唔到佢，真係好心灰。
個時，Mika同我講︰「算啦！可能佢係網上求其dl張相落嚟呃你㗎咋！」
我相信佢係唔會呃我㗎！
所以，我堅持繼續搵落去！！！
![[不敗日記]我在上野公園櫻花之中找到快樂](/2016/04/editors/296/20160407151702_USttcMJy.jpg)
行吓搵吓，就已經開始天黑喇……
真係好灰…好灰…點解搵極都搵唔到…
突然見到前面有棵好靚嘅櫻花樹，我即刻衝埋去！
![[不敗日記]我在上野公園櫻花之中找到快樂](/2016/04/editors/296/20160407151702_gYxpWwF2.jpg)
用手機影返張櫻花相！
![[不敗日記]我在上野公園櫻花之中找到快樂](/2016/04/editors/296/20160407152259_vzFHk1A8.jpg)
再對比吓手機張相！
係一樣㗎！係一樣㗎！
係隱若見到心心㗎！你見唔見到？你見唔見到呀？？
當時心情好激動，因為終於俾我搵到相中個棵櫻花樹！！！
咁開心，梗係同Mika拍片自拍吓～
![[不敗日記]我在上野公園櫻花之中找到快樂](/2016/04/editors/296/20160407151702_rXCRNh5a.jpg)
正當Mika話拎機出嚟自拍時，我不經意嘅一望……
我好似見到佢！佢好似企係不遠處到！！
當我眼甘甘望佢時，咁岩佢又眼甘甘咁望過嚟！！！
但係，我太深近視，睇得唔太清，又怕認錯人！（大佬！認錯人好樣衰㗎嘛！）
於是，我派Mika行過去幫吓眼，睇睇係咪真係佢！！！
Mika好快跑返過嚟向我報告～然後同我講咗句「加油！」就閃咗人！
喇喇喇…有d野唔洗講到咁明嘅～（奸笑）
「一切多完美，彷似一場戲，如果可以到最後也不心死。」
![[不敗日記]我在上野公園櫻花之中找到快樂](/2016/04/editors/296/20160407151702_XMWgVLks.jpg)
古語有云︰眾里尋他千百度，驀然回首，那人卻在，燈火闌珊處。
![[不敗日記]我在上野公園櫻花之中找到快樂](/2016/04/editors/296/20160407151702_Kcu4hxVw.jpg)
![[不敗日記]我在上野公園櫻花之中找到快樂](/2016/04/editors/296/20160407151702_uFAaXN1Q.jpg)
![[不敗日記]我在上野公園櫻花之中找到快樂](/2016/04/editors/296/20160407151702_SSkvIwyJ.jpg)
夜晚睇櫻花，唔算睇得好清楚，雖然有好多燈籠……
但係，你懂的～～
正所謂，醉翁之意不在酒，在乎身旁之人也！（喂！後面個句好似唔係咁㗎喎！）
如果你有睇我條片，應該都記得我講咗句…
「櫻花雖少，更顯珍貴！」
![[不敗日記]我在上野公園櫻花之中找到快樂](/2016/04/editors/296/20160407151702_GobSCjkB.jpg)
係個刻，我真係有呢種感覺……
或者，可能係因為我知道仲有唔夠一星期就要返香港，所以我更加珍惜同佢相處嘅時間。
3月9日，佢走入我嘅生命……
3月23日，我發現，佢已經走入我嘅心房……
「十四天的光陰不算悲劇收場，曾共你一起走過已不錯」
3月30日，我要走喇…要返香港喇……
當我搭JR去羽田機場時，腦海不斷浮現同佢相處嘅片段。
包括，同佢一齊坐山手線……
諗到呢到，視野變得矇矓，只好低頭，伸手抹去淚水。
「要走的都要離開，還是換了另一種方式去愛」
![[不敗日記]我在上野公園櫻花之中找到快樂](/2016/04/editors/296/20160407155117_CPogaLdk.jpg)
我習慣搭車時聽歌，當播緊目黑時，我抬頭一望，下一站目黑。
我即刻影相，放上FB同大家分享，記得有巴打留言問我有無去目黑…我無去呀…
但願5月再去日本時，會係同佢一齊去目黑，一齊去那個摩斯漢堡店！
我在上野公園櫻花之中找到快樂，找到緣分，找到戀愛。
About Post Author
![[不敗日記]我在上野公園櫻花之中找到快樂](https://www.likejapan.com/wp-content/uploads/2018/09/1-1471327241-150x150.jpg){kind=avatar}