[不敗日記]帶你去六本木嘅美少女戰士展

又嚟到[不敗日記]喇，上集嘅[不敗日記]賣關子，大家係咪好心急想睇下集呢？

喇喇喇！我認我腹黑！所以今集都係吊一吊大家胃口先～

繼續為絲打們謀福利～

 

美少女轉身變～已變成戰士～

 

女仔，除咗幻想過自己係公主之外，都一定幻想過自己係美少女戰士～

幼稚園時，我已經扮過豆丁兔喇～

 

 

今次，知道六本木有美少女戰士展，我就梗係要變身做月野兔啦！！

一入到會場，就俾東京鐵塔吸引咗我，行到過去，見到成個月野兔企係到！！！

 

 

我就梗係唔執蝕，即刻同月野兔影合照啦～

影完相，抬頭一望，就見到新版Crystal版本幾位主角嘅海報，再上面仲有月宮殿嘅長型海報！！！

 

 

 

真係超靚！！！不得了！！！

轉個身一望，就見到超巨型月野兔海報。

 

 

呢一張海報，係為咗今次展覽而造出嚟㗎！！！

 

 

再望望隔離，有哂五位主角嘅人形紙牌，俾大家任影唔嬲！！！

 

 

之後周圍都有歷代美少女嘅產品，扭蛋、變身器、畫簿，應有盡有。

 

 

而且都有安迪米歐王子同倩尼迪公主嘅一比一模型！！！

 

 

 

 

仲有展示舞台劇入面所用過嘅服裝、道具！！！

 

 

 

嘩！真係唔係講笑！好鬼童年回憶！！！

 

 

我著呢套水手服，都係為咗呢個美少女戰士展而專登買㗎！！！

係會場內，仲有武內直子嘅親筆簽名！！！！

 

 

到尾聲，仲有哂主角咁多個嘅人型紙牌俾大家合照！！！

 

 

睇嚟，我應該染金毛！！！

其實我想同哂咁多個影㗎，但當時太多人影相，所以我只係同咗月野兔同豆丁兔影咋！（淚）

 

臨走前，有個房仔嘅地方可以買美戰嘅精品～

 

 

 

不過，好多人排隊買嘢，如果絲打們想去血拼嘅話，建議早d去！！

每次只想買二十件商品，如果想買更多，就要再排過隊入去掃貨喇！

 

行完個美戰展之後，隔離有間Chibi Cafe～

一場嚟到，點都要食吓嘅～

 

 

選擇唔算好多，不過，我見在場嘅人都係兩個人「些牙」一個甜品，食完就閃＝0＝」

但係，4點鐘時，我係出面排隊，都排咗成個鐘先入到去坐低……

 

 

藍莓味嘅露娜P慕絲雜果拼盤～ 1200YEN～

對於鍾意食酸嘢嘅我嚟講，呢個藍莓味真係正正正！！！

而且，露娜P真係整得好迫真！食個時呢，我唔係幾忍心毀佢容XDDD

 

 

豆丁兔變身器馬卡龍草莓雪糕布甸拼盤～1100YEN～

好老實講，我本身唔鍾意食馬卡龍嘅！！！但係呢個真係好好食！！！推介推介！！！！！

草莓雪糕呢，似係乳酪雪糕咁，唔係甜嘅，係酸酸地嘅！

 

 

天空奇蹟浪波雪糕特飲～1250YEN～

草莓雪糕同馬卡龍果個雪糕係一樣嘅～個月亮就係白兔糖味朱古力～

但下面d啫喱嘅味道就………＝～＝」

 

 

火野麗什果特飲～850YEN～

個味道就似什果賓治咁～個月亮又係白兔糖味朱古力～

 

總結︰味道還好啦，不過現場氣氛搭救，一邊食一邊聽住美戰歷代OP同ED，真係好開心！

 

呢個美少女戰士展開到6月19日（日），如果咁啱去東京嘅絲打，就去睇吓玩吓啦～

開放時間：10：00am － 10：00pm（最後入場時間係9：30pm）

入場票價：成人︰1800YEN，高中生＆大學生︰1200YEN，4歳〜初中生：600YEN，65歳以上長者：1500YEN
購票方法：直接喺展館3樓買就ok～（不過要排隊㗎！）

地點︰六本木森美術館（地址︰東京港區六本木6-10-1 Mori Tower 52/F）

交通︰地鐵都營大江戶線六本木站（行12分鐘）

 

 

即刻分享博客，玩法如下：
送禮玩法
1. 讚好LikeJapan Facebook專頁
2. 註冊成為LikeJapan網站會員
3. 瀏覽此博客文章時，點選左方的「分享博客文章」以獲得分享連結
4. 會員可透過各大社交平台及討論區分享連結網址，LikeJapan會統計每條連結的點擊次數，會員也可於博客頁面左方查閱點擊排行榜。
5. 截止時間內的分享連結點擊次數愈多，獲獎機會愈大。如有會員的分享點擊數目相同，將根據系統紀錄最快達到該點擊次數的參加者得獎。
詳細玩法亦可參考此頁!
＊如有任何爭議，LikeJapan將保留最終決定權。
 

各位絲打，如果有興趣買我著個套美少女戰士衫嘅話，要注意一吓！

唔好諗住上身衫有鬆，下身就一定大丈夫呀！因為裙嘅腰圍係比上身衫嘅腰圍細㗎！

呢套衫只係2990yen！計埋稅＋兌返港紙大約230蚊左右！
邊到買就唔公開講，費時話我賣廣告！私下inbox我Facebook專頁問我啦～https://www.facebook.com/fuhai0w0/

好啦！下次[不敗日記]再見～ByeBye你條尾～