【‪‎Like Japan 放送室】專訪日本網絡紅人－水手服伯伯

今個禮拜嘅《Like Japan 放送室》，我哋請嚟係亞洲都有一定知名度同人氣網絡紅人、「水手服伯伯」Grow Hair（真名：小林秀章）先生！

5年前就已經著住水手服遊走東京，不時出現喺Comic Market等大型Cosplay活動，因為阿伯外形同水手服形成嘅反差萌成為焦點嘅Grow Hair其實係因為一次「膽量挑機」所以先會踏上呢條水手服之路！話說本身佢有去開一啲地下嘅活動，有時都會係個啲活動都著水手服，意外得到好評。而5年前，即係2011年嘅6月，佢發現一間拉麵店居然做緊一個優惠活動，就係30歲以上嘅食客著水手服幫襯嘅話，就可以得嘅到一碗免費嘅拉麵。佢就決定試下著住自己擁有嘅水手服答電車特登出去食喇。而呢次都成為第一次著水手服外出嘅經過。

水手服伯伯係有一份正職，所以平日都以普通嘅上班族造型返工。但放工或週末佢就會著住水手服周圍去。佢話公司嘅人而家都知道佢呢個身份。以前，佢嘅同事或上司有叫佢唔好再著，就俾唔到一個理由去說服佢。佢自己覺得又唔係做緊傷天害理嘅事，而且亦無害到佢哋，所以就一於懶理佢哋嘅要求。除此之外，水手服伯伯非常豁達。佢知道自己重口味嘅look唔係個個人都啱，所以佢唔會特登去睇或者理啲傷害或者鬧佢嘅留言。反而，佢仲更加珍惜讚佢同埋為佢加油嘅網絡留言添！

除咗水手服，水手服伯伯話都想試吓著女僕服或者lolita。但佢就話其實建立新形象係非常難嘅。佢就曾經試過著浴衣，但因為無人認得出佢係水手服伯伯，所以變咗大家都覺得佢好奇怪，避開晒。所以佢知道如果要重新建立一個look就要話好多時間再次建立形象！但佢話佢都試過飲醉酒同朋友著咗高中女學生先會著嘅「死庫水」（運動服），只係當佢清醒番就再無呢個勇氣喇。