［專欄：日本在香港］
如果畀3小時你去旅行，你會用嚟做咩呢？每星期二晚播出嘅《有吉弘行のダレトク（有吉弘行的誰得益）》喺最近就搵來3位藝人挑戰用3個鐘香港旅行。參加嘅藝人包括有「香港通」中川翔子、淺野裕子同紫吹淳，其中中川翔子更加係兩母子一齊出動！認真講，其實3小時真係不能算長，隨時塞塞車都可能已經冇咗一半。究竟佢哋會點樣用嗰3小時？一齊睇下佢哋點樣計劃呢個3個鐘嘅行程？
＝＝＝＝＝＝＝＝＝＝＝＝＝＝＝＝＝
中川翔子
先出場嘅係嚟過20次香港、曾任觀光大使、最鐘意李小龍嘅「超級香港通」中川翔子。中川翔子公、私事加埋幾乎年年都會帶埋母親來港，照計應該都已經係「無限接近地膽」。佢除咗作為「李小龍粉」不得不去嘅李小龍銅像外，亦去咗唔少同李小龍有關嘅景點，當然就唔少得享用美食啦。
＝＝＝＝＝＝＝＝＝＝＝＝＝＝＝＝＝
我哋先睇睇佢去咗邊：
1.李小龍銅像
2.福臨門酒家
3.滬江飯店
4.糖朝
5.李小龍屋企舊址
6.新和富小廚
7.南北樓
果然係李小龍嘅死忠！ 中川翔子嘅挑戰係以尖沙咀海旁為起點，一開始 就同最愛嘅李小龍銅像打招呼。之後佢把握時間，搭的士同跑去福臨門酒家，仲要用10分鐘就食完一碗高級魚翅。之後佢又去滬江飯店「光速」食咗個蟹粉上湯豆苗就即刻跑去糖朝食佢認為係糖醋骨新革命嘅士多啤梨骨。不過佢食到一半就又要趕去下一站：李小龍屋企嘅舊址。搞到去到新和富小廚時已經得返45分鐘。點咗一客籠仔蒸蟹炒飯。
最後去埋電影《死亡遊戲》嘅取景地南北樓，就結束今次嘅行程。
點咗5個菜嘅翔子話自己咁辛苦做嘢就係為咗嚟呢度食野，又高呼香港萬歲。
＝＝＝＝＝＝＝＝＝＝＝＝＝＝＝＝＝
淺野裕子
第二位出場嘅係淺野裕子。長年擔任香港親善大使嘅佢，差唔多每年都會嚟香港，更加試過一年嚟5次。
＝＝＝＝＝＝＝＝＝＝＝＝＝＝＝＝＝
我哋先睇睇佢去咗邊：
1.中菜廳龍景軒
2.高級腳底按摩中心富足臨
3.海港城
4.屈臣氏
5.半島酒店
6.海運新大樓觀景台「海運觀點」
以中環海濱為起點嘅挑戰開始。同「走難」一樣嘅翔子唔同，淺野裕子由頭到尾都好淑女咁慢慢行。節省時間嘅方法係用人脈預先訂位。第一個去嘅地方係5星級酒店四季酒店中菜廳龍景軒。享受飲茶嘅佢分享嘅最愛係菠蘿叉燒包、瑤柱小龍包同埋鮑魚撻。
之後又去高級腳底按摩中心富足臨。為咗慳時間，平時都揀50分鐘嘅佢揀咗25分鐘套餐。之後佢去海港城買手套。點知行咗幾間鋪，用咗半個鐘多啲先買到，反而喺屈臣氏就果斷大手掃京都念慈菴喉糖，仲話好受日本嘅演員歡迎添。
最後45分鐘，淺野裕子嚟到半島酒店食high tea。要排長龍嘅半島酒店high tea係身份嘅象徵，而用人脈預先訂位嘅裕子一行入酒店就有人接待喇。之後再去咗今年十月尾新開嘅海港城新景點「海運觀點」，可以270度一覽維港景色。而中川翔子訪港期間見到嘅「UFO」,其實就係嚟自呢度嘅活動。
按摩完時間已經過咗1個鐘零15分鐘。要由港島去九龍，淺野就介紹搭天星小輪唔駛十分鐘就到。
原來京都念慈菴喉糖好受日本嘅演員歡迎。
可惜時間有限，睇唔到夜景。
＝＝＝＝＝＝＝＝＝＝＝＝＝＝＝＝
紫吹淳
今星期出場嘅紫吹淳本身係寶塚歌劇團嘅成員，10幾歲訓練當時就已經深受香港吸引而嚟咗超過10次。今次佢主要想嚟香港shopping。以銅鑼灣Sogo做起點嘅挑戰。
＝＝＝＝＝＝＝＝＝＝＝＝＝＝＝＝＝
我哋先睇睇佢去咗邊：
1.銅鑼灣地帶
2.屈臣氏
3.Roger Vivier
4.Tory Burch
5.港島香格里拉大酒店café TOO
6.算命
7.印鑑店Tangs
第一個去到嘅係銅鑼灣地帶。紫吹淳覺得呢度係年輕人行街嘅地方。過咗20分鐘，佢竟然走咗入屈臣氏。原來今次係去買念慈庵喉糖，睇嚟念慈庵係日本真係好有人氣！
之後紫吹淳行咗入法國Roger Vivier鞋店。雖然日本都有分店，但係喺香港可以買到日本無嘅款式。下一站係隔離嘅另一間鞋店Tory Burch，原來呢間鋪買嘅鞋係送比一直幫佢手嘅經理人。到咗食飯時間，佢地坐的士嚟到五星酒店港島香格里拉大酒店café TOO，café TOO入面有超過10個國家嘅料理，而紫吹淳就同經理人一齊食飯。
食完飯之後佢去咗搵風水師李丞責算命。今年已經48歲但未結婚嘅紫吹淳就想睇下自己嘅姻緣係點。最後去到嘅係印鑑店Tangs。用咗一分鐘，就決定要買最開運嘅紅色猴年印鑑。而為咗準備將來結婚嘅時候可以喺印鑑上面刻上丈夫嘅姓氏，佢今次冇喺印鑑上面刻任何野。紫吹淳嘅香港旅行就係一連串嘅購物之後完滿結束。
算完命時間已經得返半個鐘，佢地搭的士去半島酒店購物，到酒店嘅時候已經得返10分鐘。
About Post Author
