大家覺唔覺得高田馬場好熟，但又好似無去過咁呢？
因為佢的確唔係咩旅遊區，但又係山手線有嘅站，所以可能大部份人都係喺架JR入面經過左佢lu～
其實高田馬場成日都充滿生氣嫁，因為果到好多學生，所以無論朝早定夜晚都係年青人多。亦都因為咁，果到有好多好多餐廳，小店定連鎖店都有，專食肉嘅，食麵嘅，食炸物嘅，統統都有！而且因為知道果區比較多學生，所以價錢方面都自然經濟D，又可以食到D地道嘅日本料理，係咪聽到都心郁呢！好啦唔講啦，而家就介紹5間好味夾抵食嘅餐廳比你地啦！
5.成蔵
成蔵呢間餐廳主要係食炸豬扒飯，但除左豬扒好食之外，飯係用左山形縣產嘅白米，仲有自家製嘅蛋黃醬，所以賣點有好多嫁！
無錯有時係要排隊添嫁！
日本人食評：「超好食。肉嘅油係甜嘅，肉甚至係炸果層皮嘅口感都好好。呢間係同我去過咁多間炸豬扒店之中最與眾不同嫁！」
售價：日：1000円～1999円／夜：2000円～2999円
4.つけ麺屋 やすべえ 高田馬場店
呢間主要係食沾麵嘅，佢有咩特別呢？就係好多種類嘅topping比你揀之餘，細碗定係大碗都係同一價錢嫁！抵到呢！仲有，如果你係叫細size嘅話，餃子、雞蛋呢D本來要錢嘅topping都會變左做免費比你嫁！真係勁吸引！
售價：日：～999円／夜：～999円
3.末廣ラーメン本舗 高田馬場分店
講完沾麵到拉麵啦！呢間勁咯，佢係昭和13年（1938年）已經創業嘅老字號！佢嘅特別就係果碗勁深色嘅湯底，既香甜同時又有好多蔥花喺上面，令到個湯底較濃得黎唔油膩。
日本人食評：「醬油湯底比人一個家傳食譜嘅感覺。食落比望落去更加唔油膩，重點係食完成碗都唔會口渴呀！」
售價：日：～999円／夜：～999円
2.鳥やす本店
呢間唔係食主餐嘅，係以食串燒為主，重點係好平！Menu入面有大部份串燒都係唔洗100円就食到，而且仲有7串510円嘅組合，抵到笑呀！呢個時候配番杯生啤就大滿足啦！
店裡貼滿左手寫嘅Menu，令到個環境勁有日式昭和感覺，睇唔明唔驚，因為都有正常嘅Menu，而且有埋圖畫唔怕唔識日文。
日本人食評：「想落單果時一睇Menu，比佢串燒咁平嘅價錢嚇親！然後明明咁平但都幾好食，呢個質素配呢個價錢，我諗就係呢間串燒店會咁多人嘅原因啦！」
售價：日：～999円／夜：2000円～2999円
1.とらとはと
呢間餐廳係麵屋黎，而佢嘅賣點就係佢個湯底啦！嗱豬骨湯就成日聽啦，咁「野菜豬骨湯」又聽過未呢？呢間野嘅湯底入面，加入左南瓜同埋松茸，有滋養效果嫁！
另外佢嘅入口都幾特別，令到經過嘅人都是忍唔住望兩眼呀！
售價：日：～999円／夜：～999円
如果唔想食太貴但又想食正宗日本料理，一於去呢幾間餐廳試下啦！
反正高田馬場咁就腳，只係去食個飯都唔會阻到行程呀嘛！
About Post Author
