體驗日式校園祭@早稻田祭！

相信好多睇開日劇嘅朋友都唔會對「校園祭」感到陌生。「校園祭」感覺就好似我哋所講嘅學校開放日，等公眾可以去參觀一間學校，了解佢哋嘅校園生活。而學生們亦都會落手落腳整攤位、裝飾班房等等。

不過平時日劇或動漫就睇高中校園祭多，今次我哋就嚟到日本頂尖學府之一嘅早稻田大學校園祭，一齊睇下同我哋香港嘅大學Open Day有咩分別啦！

呢個早稻田祭係一年一度嘅盛事，每年都係11月頭左右舉行，為期三日。雖然係短短三日嘅活動，但好多學生係會提早成大半年開始準備㗎！

成個祭嘅活動有分幾種：

1）露天舞台活動（比較多舞蹈、啦啦隊、唱歌、甚至特攝舞台劇等表演）

2）課室展覽（多個大學生社群會於唔同課室或講廳進行展覽、展出平時社團活動成果等）

3）特色攤位（部分社團會係課室或室內擺設買賣攤位，比較特別的例如有足湯或陶瓷市場、或漫畫研究部嘅人像繪畫）

4）美食攤位（部分社團會係室外擺檔賣各種特色美食賺取營運社團用嘅經費，例如沖繩文化會就會煮沖繩特色美食、韓國學生社團就煮韓國小食等）

早稻田大學一啲都唔細，要行晒所有攤檔、展覽係非常之有難度㗎！因為呢個校園祭每年都吸引超級多人去參觀，所以其實比較人氣嘅表演（例如「Mr.早稻田選舉」）或學會展覽等都要排隊先睇得！去之前最好check下官方網站睇吓有冇特別想睇嘅嘢，mark低個schedule會比較好～

當日我哋行過一間課室嘅時候被門口嘅怪獸吸引咗，原來呢度就係早稻田大學嘅公認特攝學會「怪獸同盟」。有睇開幪面超人系列嘅朋友應該就唔會對「特攝」感到陌生。特攝可以解為「拍攝穿著特殊服裝進行帶特效嘅特技表演影視作品」（例如《哥斯拉》、《超人》系列等）。估唔到竟然有個學會咁犀利，我哋梗係即刻入去參觀啦！

課室入面有啲特別服裝供試著，全部都係部員們親手整，有啲仲用咗半年時間！另外仲有縮細版嘅城市模型畀大家影下相感受下做特攝英雄嘅feel XD 我哋訪問部長森口君嘅時候佢話呢個學會一般嘅活動包括自製特攝片、彩排表演、製作小冊子同整道具等！真係feel都佢哋製作好認真同好有heart㗎！（詳情記得睇樓上條片！）

除此之外小編仲搵到有個男聲優同好會w 忍唔住入去同人嗲咗兩句哈哈。另外仲有女僕cafe研究學會，仲真係整咗個女僕cafe出嚟（好似睇日劇／動畫嗰啲咁），不過因為大排長龍，我地就我哋冇入去睇嘞。