（警訊腔）最近（其實都已經兩個月前XD）有市民於網上反映，曾經於網上「走紅」嘅疑似日本人Eddie哥，似乎最近又有新一批好心人喎。話說最近就有一位自稱叫eddie嘅日本人（連日本人都係自稱…）經常會於「紅色」又會經旺角嗰條線向其他乘客求助。
先唔理呢個傳聞係咪又係另一件「鮫島事件」，成件事嘅基本流程其實都係好似其他疑似街頭騙案咁上下，就係對方因為各種原因身上無錢, 朋友又賣甩佢,於是就好唔好意思咁問你借幾百蚊做路費。 而嗰位仁兄通常都係「外語台」, 「個殼」都係斯斯文文,同你講野經常轉移話題,仲會主動留聯絡資料畀你，話會還返畀你, 叫你聯絡佢等等等等……
以今次傳聞為例，大約就係你會遇到一位自稱Eddie嘅自稱日本人（好多自稱XD）,佢身份就真係多到數唔晒，由留學生到自由行，甚至學做動畫設計都有。通常佢起初都唔會講任何同錢有關嘅話題，最多都係問吓路點去機場。不過搞咗一大輪之後，當然最後就會同你講佢趕唔切去機場。（有網友發現架機10點半飛佢9點仲係太子，似乎真係要call架飛機畀佢趕飛機）所以佢會以「欲佢還迎」嘅態度等你借錢畀佢。
傳說中eddie哥嘅真跡（感謝圖片授權：john yip）
而且，佢會好主動咁問你攞聯絡方法，甚至留埋聯絡方法畀你，話會還返錢畀你。不過當然最後就係影都冇埋啦。而佢留聯絡方法嘅方式都有好多，由地址到電話（WhatsApp）到電郵都有。不過佢留嗰個日本電話就有啲詭異，得9個數字。如果之後你遇到有一個人畀個日本電話號碼，只其實都應該唔會打得通。因為日本嘅固網電話號碼係有10個數字，而手提就更加有11個，9個字嘅號碼基本上就唔會有嘅。
當然嗰位EDDIE哥係咪真係日本人，小編未見過真係唔敢下定論(頭盔MODE)。不過居港日本人生活習慣其實就同香港人分別不大，可能只係一啲生活嘅細節唔同，例如比起茶餐廳、大排檔佢地會更傾向去日本人自己開嘅餐廳或者咖啡廳，又或者比起本地嘅幾間大型超市或者一般街市，佢地會比較傾向光顧日系，或者睇起嚟係日系嘅超市。小編問左本人識既日本人，香港對佢地嚟講，除咗景點似乎真係唔係太多野吸引到佢哋。除非佢哋有個別興趣，搵到固定朋友同佢地一齊玩下活動好似羽毛球之類，大多數收工唔係落酒吧就係返屋企。日本人嚟到香港，某啲工作因為上司都係日本人，所以好大機會要按著日本文化黎做——即係OT，閒日除咗酒吧，其實都未必會見到住喺居港日人嘅蹤影。
另外日本人除非工作能力有問題，否則比較少向外人借錢。就算借，都會非常清楚咁留低單據借左幾多比你。當然，性格呢啲野邊都有個人差，總之就自己小心啦。最後，日本人除非有外國血統，否則好少會幫自己改英文名，亦都唔會主動叫你用呢個名叫佢。所以就算唔識日文，留意下呢啲細節某程度都都有助辨認對方係咪日本人。
不過就算對方真係日本人，都唔代表佢唔會呃你，好似最近名古屋就有人放售面值100萬美金嘅紙幣，你冇睇錯！ 係100萬美金嘅紙幣！ 佢說服人哋用150萬日圓同佢買，仲話每張美金1年可以翻都4500萬日圓添。結果一樣有人中招，真係唔到你唔服。
About Post Author
