當日本人住進九龍城寨

專欄：[香港在日本]

如果你係上世紀末來港嘅留學生，你會選擇住喺邊呢？

現任さいたま市（埼玉市）議員吉田一郎就選擇咗九龍城寨，原因只有一個：平。

吉田一郎曾經著有「九龍城探訪」一書

可能你聽完都會好似節目嘅主持同嘉賓咁吓出聲，九龍城寨出名冇皇管，甚至有人覺得係生人勿近，佢仲夠膽住？喺呢個咁危險嘅地方住咗5個月之後又過咗30幾年，吉田終於喺《激レアさんを連れてきた。（我帶咗超級罕見嘅人嚟啦。）》中同大家分享佢眼中城寨嘅生活係如何。

（圖／截自《激レアさんを連れてきた。》）

就係因為間屋平就喺傳說中嘅無法地帶「九龍城」獨自生活嘅人，吉田（右）

先講講節目對九龍城寨本身嘅印象先啦。

一開頭介紹嘅片段中多次提及到佢係「傳說中嘅無法地帶」同埋「超級貧民窟」。主持人之一嘅若林正恭（Audrey）都十分認同呢種講法，話覺得城寨好似一個唔可以入去嘅區域，又好似喺電影先會出現嘅場景，住喺入面嘅全部都係黑社會。城寨密集嘅樓房同令人不可思議嘅衞生環境都為佢地驚訝，喺日本一定唔會見到咁話。

節目以可以容納約5萬人嘅東京巨蛋同城寨作比較。城寨面積細東蛋一倍，但居住人數都係約5萬人！淨係睇示意圖都嚇咗跳。

若林：做啲嘢咁衰嘅！！

點解吉田又會無啦啦住咗入城寨呢？話說喺1985年，當時只係21歲嘅吉田因為覺得搵工好煩，本身又對香港有啲興趣，就決定嚟香港留學。一開始佢住喺日本人嘅share house度，冇幾耐問題就嚟啦：去咗香港咁耐，佢居然淨係講到日文！為咗學好廣東話，吉田就決定要搬出去住。事實證明佢嘅決定係有成果嘅，節目上面吉田都讀過唔少廣東話嘅句子，全部都發音得唔錯㗎，後來仲做埋本地日文新聞嘅記者?！

好！搬喇！（請幻想弘中綾香主播同吉田講廣東話）

大家都知香港嘅樓價⋯⋯（笑）吉田仲係個學生哥，根本冇咩錢租屋。喺呢個時候就比佢搵到九龍城寨嘅樓盤！雖然地圖又淨係得白紙一片，地產經紀都唔建議佢租嗰度，但抱住「百聞不如一見」態度嘅吉田就用咗三日分別喺唔同時間探險。

第一日	16:00	著校服嘅女中學生好普通咁行緊
第二日	20:00	好多人喺街度買嘢
第三日	02:00	有啲不安但都冇奇怪人吖～

就係咁吉田就決定要租落城寨嘅「筍盤」：頂層14樓角落嘅單位，兩房再加埋獨立廚房同廁所，月租1萬円（而家約港幣700）。全場一片鴉雀無聲——1萬円換一個咁危險又污糟嘅居住環境，對於主持同嘉賓而言都係難以接受。吉田就解釋話香港樓價係東京嘅一倍有多，當時平均一個月租都成3、4萬円，算係咁㗎啦！仲要頂層日照同通風都良好，又冇咩臭味，亦唔會受污水影響，吉田對呢個屋企好似都相當滿意，若林都忍唔住吐槽「講到好似真係超筍咁嘅你！」

通常貪平都冇好結果，九龍城寨嘅生活可以話除咗平之外都一無是處。但錢就交咗啦，吉田唯有繼續住落去。不過呢個神秘小區入面都有鮮為人知嘅一面，雖然未去到刮目相看咁誇張，但總叫令主持、嘉賓同小編我都對城寨有更豐富嘅見解。

（在此響起成龍嘅《英雄故事》，作為背景音樂去講返吉田嘅另類「英雄故事」！）

最令人覺得嫌惡嘅就係城寨嘅衞生環境。

一show咗上圖出嚟，大家都紛紛話望住都聞到陣臭味，比想像中仲要惡劣。吉田補充話水渠嘅惡臭好嚴重，因為啲大廈起到好密，外牆嘅水管爛咗都修理唔到，所以啲排泄物就會漏曬落街，一個唔好彩仲會淋到全身都係。上圖就係吉田住嘅大廈嘅入口，雖然佢話住住下會慣，仲可以靠聽聲去預測以免「中招」。

另外吉田都有提及到城寨嘅水又鹹又混咗砂，對於直情可以飲水喉水嘅日本嚟講可以話難以想像。但係水費就比正常高出五倍有多，因為當時係由城寨嘅黑手黨負責收嘅。

食物衞生同樣係一個令主持人同嘉賓訝異嘅地方。講起城寨嘅食物自然就係諗起魚蛋，所以節目都展示咗以下魚蛋工場嘅圖片。吉田就話其實喺香港基本上都會煮過啲食物，唔會好似日本咁生食，所以冇問題啦～

城寨嘅生活當然唔係淨係得咁少問題啦。呢五個月間吉田又不停比便衣警察以為係可疑人物（終於連警察都認得佢啦），每日上落十四層樓梯出街同返屋企，仲有舊啟德機場係左近而被飛機聲騷擾住，若林都忍唔住問你仲唔搬？不過以一句「咁我交咗租吖嘛～」帶過嘅佢就真係好似幾留戀呢個地獄咁嘅地方，喺城寨拆咗之後佢覺得好寂寞，比起而家咁靚嘅公園都係鍾意舊時無政府狀態嘅城寨多啲。（而家吉田作為議員正大力推廣緊舊大宮市（現埼玉縣埼玉市大宮區）嘅自治同獨立）

不過城寨其實都有好普通嘅一面。住喺入面嘅同吉田一樣都係好普通嘅人（吉田表示我第一個見到嘅就係女高中生啦，你話幾普通），過住普通人返工返學行街食飯嘅生活。喺吉田比警察查問嗰陣仲會有人幫手解圍，亦有街坊會舉辦唔同活動，絕對唔係好似若林印象中咁淨係得黑社會。另外，當地外牆寫住防止劫匪既警告標語，但又真係幾恐怖既⋯⋯