東京最近開咗間文青風香港粥店「3米3」，店長Henry同Vincci兩個本身都係中學教師。Henry話：「我地以前教同一班，我教中文，佢教英文，大家都係新人，好自然就一齊咗。」問到係邊個做主動？Henry即刻指住太太Vincci話：「佢囉！！！」
教書教咗9年，兩個人加埋每個月收入有成十萬有多，又冇小朋友，可以話係人生勝利組。Vincci話：「其實做老師這份工係好好嘅，不過可能我地比較貪心，覺得而家都已經教咗九年書，咁如果再做多十年、二十年，一世人就咁樣，對自己係唔係一件好事呢？」Henry亦覺得：「同一件事練習咗九次，可能會好純熟，但完全唔一樣嘅挑戰？真係好似冇。」佢地結婚之後，Henry問Vincci，你有咩夢想？一直以來都好鐘意日本嘅Vincci就話：「我唔想返工，想去日本住！！！」
於是上年7月底，佢地就覺得真係時候離開香港去日本啦！夢想達成之餘，最近仲同朋友Ramie一齊夾份開咗間粥店叫做「3米3」㖭～Ramie形容佢地兩個係「得意鬼馬夫婦」，成日都好好笑，Henry反駁：「你見到我成日畀人鬧就緊係覺得好笑啦！我覺得唔好笑！」變返認真mode，Henry話Ramie嘅存在係兩公婆之間嘅中和點：「好似我話A好，但係我老婆又覺得唔好，咁冇計啦！但係過幾日Ramie又問Vincci不如試吓A好唔好？佢就會覺得好啊好啊咁…」所以3米3冇咗Ramie真係唔得㗎！
3米3成間餐廳都係藍色白色，入面又有好多小盆栽，感覺好小清新，同其他喺日本嘅香港餐廳好唔同。Vincci解釋：「最初我第一個堅持，就係唔想將佢變成一間茶餐廳咁。好多喺日本嘅香港餐廳都係紅色、黃色，好中國feel，但係我覺得唔洗要紅燈籠、大帆船，先代表到香港。」Vincci心目中香港最香港嘅部分，就係中西合壁。所以佢用佢最心愛嘅波蘭餐具，去載香港嘅粥，「我覺得咁好帶出到我心目中中西合壁的感覺。」
Henry笑笑口話：「我地冇咁偉大，要喺日本開間博物館保存香港文化。我地只不過係想將我同我老婆2個人對香港嘅回憶、或者理想中嘅香港、甚至係我地覺得香港美好嘅地方是點樣，我地想將佢在日本重現出嚟。」以前兩公婆住大角咀，有好多街坊小店，唔係淨係為咗賺你嗰幾十蚊，而係真係會用個心同客人傾計，關心客人。「唔只係嚟食飽肚，而是有一種人際交流嘅感覺。我地想將這個關心其他人嘅精神，帶嚟日本。」
有目標當然好，不過人在異鄉開舖頭，談何容易？Vincci回想籌備開店嗰陣：「我們地語言不通，冇生意經驗，裝修、請人、入貨，每一樣對我地嚟講都係全新嘅。我們有講笑話過，依到每一樣嘢，甚至一張櫈、一隻碗，都係得來不易。其實很多時都想放棄，覺得好失望、甚至絕望。」
好彩船到橋頭自然直，喺危急關頭伸出援手嘅，往往就係你嘅好朋友。Vincci喊住講：「有一次個雞蛋仔機壞咗，萬念俱灰，諗住死啦今日沒有雞蛋仔賣啦…我就拆開佢，影張相send畀我一個喺香港做電機工程的朋友。他就畫張線路圖，教我你點駁點駁啲線啦！你就會覺得，雖然我地分開好遠，但係佢地都會好幫我。真係會有人純粹見到你開心，佢都會好開心。」
睇到依幕，相信大家都會好心嗡，何況係Henry？「我有時覺得對佢唔住，我同佢講你嚟日本係畀你嘆世界，但有時見佢夜晚十點先返嚟，或者燙傷咗切傷咗，我就諗係咪做錯咗咩決定，令佢咁辛苦？不過有一日佢同我講，多謝我帶佢嚟日本，畀佢咁充實嘅生活，依啲體會同經驗係以前冇嘅。聽到佢咁講就覺得咁辛苦都係值得嘅。」問到佢有冇後悔過嚟日本？佢就話：「我嚟到日本，即使我失敗，我都覺得依個後悔係遠遠細過我喺香港過十年廿年，先後悔點解自己後生時冇試吓去闖闖呢？」
PS.想了解更多有關3米3嘅故事，可以上佢地官網睇睇～
About Post Author
