日本嘅煎餃喺國內外都廣受歡迎，唔少明星好似NEWS嘅增田貴久都超鍾意食餃子㗎。當中「餃子の王将」就係當地中華料理界亦係餃子界嘅表表者，單喺東京就已經有61間分店。最近佢地其中幾間分店就舉行緊超抵嘅下午茶放題！
雖然唔同分店都有唔同嘅放題優惠，不過呢個就肯定係最平嘅！
叫得佢做下午茶放題，相信大家都明白呢個任食放題喺平日下午茶時段3點到6點先有，但如果你係佢地嘅餃子俱樂部會員就可以係平日嘅任何時段都享有優惠。
放題限時一個鐘，由你落單嗰刻時開始計，而毎次落單嗰陣一個人只能叫兩人份（12隻），加單都要食淨2～3隻先可以，以防你食唔曬外亦係保持食物嘅水準。另外佢地都唔容許客人食淨或者打包，所以真係「食得曬先好嗌」。落單之後約5分鐘餃子就會送到，但夠鐘前10分鐘截單，食嗰時要預返好啲時間啊。
雖然係放題，但網民都話啲餃子仲係保持水準，唔會細咗或者難食咗。不過留意返放題嘅只係餃子，如果想嗌白飯或者飲品都要額外俾錢嘅。
網上面雖然好多人都話想去一試，但唔少人食完都話勉強先回到本，紛紛話唔太抵。原來「餃子の王将」嘅餃子本身就已經240円（未計稅）一碟，所以男性要食到4碟、女性就3碟先回到本。但餃子都算易食滯，好多人食到第3碟已經開始覺得飽，如果唔係好大食就可能要三思一下。不過府中本町駅前店同アリオ松本店分別有含酒精飲品7折優惠同食放題送飲品嘅優惠，都算抵返條數。
餃子の王将 餃子食べ放題
日期：即日起至2017／10／31（府中本町駅前店，其他未定）
時間：平日 1500～1800
價錢：￥900（男性）、￥600（女性）、￥300（小學生），小學生以下免費
實行分店：
東京 府中本町駅前店（東京都府中市本町1-29-1）
新潟 弁天橋店（新潟県新潟市中央区紫竹山6丁目1-18）
長野 アリオ松本店（長野県松本市深志1丁目2-30）
About Post Author
