飽覽伊勢灣景色旅館推介：若松知多溫泉旅館

話說之前去名古屋採訪LEGOLAND®嘅時候，我就諗除咗可以去白川鄉同飛驒高山之外，附近仲有冇值得一遊同發掘嘅城市呢？然後就畀我發現咗同樣位於愛知縣嘅南部城市：知多市！

呢度係一個位於海邊（眺望伊勢灣）嘅小鎮，麻雀雖小五臟俱全，有各種特色嘅景點可以滿足唔同遊客嘅喜好同需要！今日首先同大家介紹我哋係知多自由行3日2夜逗留時寄居咗兩晚嘅超靚溫泉酒店：若松知多溫泉旅館啦！

今次介紹嘅若松知多溫泉旅館，原先係一間舊式日本溫泉旅館，經過內部重新設計同裝潢之後，搖身一變成為現代感滿滿嘅溫泉旅館！

你見到門口、內部走廊、屏風等都係非常傳統日式設計，但無論係大堂、房間甚至溫泉風呂嘅設計同設施都好有taste、現代化及高科技，住起上嚟非常舒適！

全間酒店只有18間房間，而全部都係面海㗎！旅館員工對每位顧客都非常體貼。例如，你一入門口佢哋就會收走你對鞋，而你亦會換上旅館入面專用嘅拖鞋。每次你出門佢哋都會記得你係著邊對鞋，再拎返啱你對鞋出嚟！佢哋送餐呀、幫手安排溫泉預約時都非常好服務，真心值得讚！

5層樓高嘅若松知多入面，除咗有基本嘅男女湯各一之外，仲有一個半露天私人風呂，同埋位於天台嘅露天私人風呂。

室內溫泉就係公家用，隨時可以浸嘅（留意返一樓同上半層嘅男女湯每日清潔完會對調，即係男湯可能某個時間後會變咗做女湯，所以大家入之前一定要望清楚唔好入錯呀XD）。

另外兩個私人風呂都要事先同旅館預約時段（check in 嘅時候已經可以預約），尤其如果想係天台個溫泉睇日出日落嘅話就更加搶手！每段入浴時間為45分鐘，情侶一齊浸又係、一家人一齊浸又係，浸前浸後都要去大堂交收鎖匙架～

我就真係好享受係房間休息嘅時間，因為實在太正啦！每間房都勁大之餘，仲有落地玻璃可以睇到沙灘同海景，而且仲有露台可以行出去吹風～

另外除咗張好舒服嘅tatami大床（若松布團）之外，間房嘅光暗、溫度、音響、甚至窗簾都可以用iPad Pro上面個app調節～見到無電視？唔洗驚，因為呢個iPad入面已經收藏左好多間「私人影院」Apps，淨係Amazon Prime Video都睇到我爽，勁多歐美電影、日劇日影同動漫揀（日本節目的話冇字幕）！

最後梗係唔少得介紹呢度嘅飲食啦！呢度附近都有菜館同餐廳（不過全部都係開車距離），而相信大家上網book嘅時候都可以揀包唔包早晚餐嘅。早餐除咗有傳統日式料理外，仲有一個係好特別嘅早鍋，晨早流流就可以喺房間享用，有專人送入嚟幫你set好曬！