廣島位於日本嘅西南面，係一個具有多個歷史建築物同充滿文化氣息嘅城市，之但係….一樣有行街shopping嘅地方㗎！
今次介紹嘅就係距離廣島駅16分鐘車程嘅大型商場YouMe Town，無論你係一家大細，定係男女老幼都啱去，因為有得食、有得買、有得玩仲有得抖添。
前往方法：
在《廣島駅》乘搭 “廣島電鐵５號線 – 廣島港”，係第7個站《皆實町二丁目》落車
商場出面有個公園仔，條瀡滑梯係鐵造㗎，可以帶小朋友去放下電
一入商場就見到不二家嘅蛋糕店！牛奶妹好得意！
好大粒牛奶糖啊！
寫明係用北海道牛奶整！好心動啊！！！！！
心動不如行動！我買咗一個返香港做手信！（食後感：中間嗰層夾心好香好濃牛奶糖味，食過番尋味！）
價錢係日本嚟講都算係公道
連鎖式經營嘅Karin果汁工房，非常多選擇
飲咗杯呢杯期間限定，唔錯，幾清甜
衫褲鞋襪、生活家品、嬰兒用品一應俱全
商場入面有條“餐廳街”，一齊入去睇下有咩食囉
唔洗港幣$100嘅豆腐料理放題，眼見入面有好多唔同菜式，想食清少少嘅朋友不妨試下，特別適合有小朋友或者老人家同行嘅朋友
牛肉／豚肉火鍋，最平約港幣$70有得食，想食貴啲嘅話可以試下“國產黑毛和牛＆黑豚” $210左右埋單！呢個價錢香港肯定食唔到！
鍾意食牛又鍾意食香口嘢嘅朋友，可以試試呢間“牛たん物語”
其實除咗以上幾間餐廳之外，商場最頂層仲有個大Food Court，大家到時可以慢慢發掘！假若你係Backpacker（我都做過），唔想花費太多金錢係飲食上，但又想對自己個肚好啲…..我都有辦法！一入商場右邊就有個大超市，入面有好多日本太太係度買餸㗎
有冇人同我一樣係薯餅迷？薯餅約港幣$5/件
天婦羅約港幣$5-9/件
串燒約港幣$9-14/串，右上嘅鹽燒海蝦好吸睛！
足料壽司賣港幣$40/盒左右，流哂口水喇……
咪住！呢盒仲平過頭嗰盒100Yen，揀邊盒好？兩盒都揀咪得囉！哈哈
見到日本太太買餸，令我諗起“我們這一家” 花師奶啊….
如果你同我一樣住嘅地方有廚房，可以試下係日本買餸返去玩煮飯仔
食飽飽去行下街….由於商鋪太多不能盡錄，係咁易講兩、三間香港人比較有興趣嘅鋪頭喇，行街之前提提你，商場提供咗啲小朋友車仔俾顧客用，除咗圖中嘅Miffy同Hello Kitty之外，我仲見到有Mickey Mouse等等，另外都有輪椅提供俾老人家或者行動唔方便嘅客人
全店300Yen，約港幣$20/件，貨物質素唔錯！可以當手信！
帆布鞋一樣係300Yen，平到笑出嚟
隔離就係ABC-MART，鋪頭夠大，款夠齊，而且人流少可以慢慢揀
大大間GU，又係人流少，可以靜靜地行街
日本人相當重視情人節，好多唔同類型朱古力
行得攰可以坐低抖抖
頂層有小朋友遊戲室，咁就唔怕小朋友扭計喇
送禮物時間
今次送嘅你2016最新商品「One Piece曲奇餅」，Fans一定唔可以錯過，想要就快啲登入然後按「分享博客文章」拎禮物喇！
1. 讚好LikeJapan Facebook專頁
2. 註冊成為LikeJapan網站會員
3.瀏覽此博客文章時，點選左方的「分享博客文章」以獲得分享連結
4. 會員可透過各大社交平台及討論區分享連結網址，LikeJapan會統計每條連結的點擊次數，會員也可於博客頁面左方查閱點擊排行榜。
5. 截止時間內的分享連結點擊次數愈多，獲獎機會愈大。如有會員的分享點擊數目相同，將根據系統紀錄最快達到該點擊次數的參加者得獎。
詳細玩法亦可參考此頁
＊如有任何爭議，LikeJapan將保留最終決定權。
About Post Author
