講起日本美食，好多人都會諗起拉麵。有說東京嘅拉麵源自1910年左右嘅淺草，經過過百年嘅發展後都內已經有超過3000間拉麵店。喺日本相當有名嘅餐廳指南「食べログ」就喺今年設立咗「食べログ 百名店 2017」大獎，表揚喺唔同種類中總評分榮獲首100位嘅餐廳，當中因為拉麵部門太多優秀嘅小店仲分咗東京、東日本同西日本三個地區。今次我哋就一齊嚟睇下東京入面TOP7嘅拉麵店啦。
「食べログ」使用嘅評分方法係以5分滿分，但總評分拎到3.50分嘅已經係全站TOP4%，超過4分嘅更加只係得500間連資深「食べログ」食評用家都讚不絕口嘅餐廳。「想喺呢刻就品嚐到人間美味嘅話，就係呢間。」雖然準備介紹嘅小店都唔喺東京嘅熱門旅遊地區，但絕對值得你去一試！
**注意：呢7間小店真係好細，所以成日都排長龍。建議去嗰時預鬆時間，並不時留意官方Twitter/Blog更新嘅營運情況，以免因為完售或臨時休業而撲空！另外，大部份小店都係完售就會早收，想去朝聖嘅話唔好等到就收舖先去啊！**
第7名：つけ麺 道
得分：3.93
先去葛飾區食沾麵。雖然同區仲有一燈呢個TOP，不過道個湯底以豬骨同海鮮熬成，同一燈係唔同嘅感受。有網友就話覺得明明同平時食開嘅湯底好似，但又有啲唔同，係又熟悉又新鮮嘅感。特別一提佢地嘅服務都好好㗎，排隊嗰時會提供麥茶，見到你個麵好似涼咗仲會問你使唔使加熱。不過佢地係每四個咁入座嘅，所以如果多人一齊去但係要排隊嗰時就未必可以一齊入到座。
地址：東京都葛飾区亀有5-28-17（JR亀有駅北口徒步約2分鐘）
電話：03-3605-8578
營業時間：11:30～完售（大概18:00～19:00）
定休日：星期一、星期二
座位數量：8
第6名：しば田
得分：3.95
之前介紹嘅小店都算做近鐵路站，但しば田就比較遠，要行約10分鐘，係一間名符其實嘅「隱世小店」（食べログ咁分類㗎，唔關我事～）。不過啲人食完都話呢10分鐘絕對抵行，佢地嘅拉麵仲係極品中嘅極品喎。
店裡面主要得「中華そば」同「煮干しそば」兩種。前者嘅湯底除咗有雞之外仲加埋鴨去熬製，比一般嘅中華そば清爽，而佢嘅鴨香都係吸引唔少食客嘅秘笈。而佢嘅醬油湯底仲係用5種醬油調製，充分帶出到佢嘅香氣，係令人一試難忘嘅新感受。
溫馨提示：佢個官方Twitter都retweet咗唔少其他同行嘅資訊，睇之前要check清楚係咪由佢發嘅Tweet先，以免中伏。
地址：東京都調布市若葉町2-25-20（京王線「仙川」站徒步約10分鐘）
電話：080-4001-0233
營業時間：11:00～15:00，17:30～20:30
定休日：星期日、星期一
座位數量：8
官方Twitter：https://twitter.com/takashi5746
第5名：Japanese Soba Noodles 蔦
得分：3.95
相信唔少人都會聽過呢一間拉麵店嘅名，甚至曾經慕名而來——冇錯，佢就係第一間入選米芝嘅拉麵店，分店開到去香港㗎。蔦同大部份拉麵店一樣都係分日頭同夜晚兩場，夜晚就好普通咁排隊啦，但係朝早就勁啦。雖然11點先開舖，但7點就已經開始派「整理券」（籌），仲特登開左個Twitter（https://twitter.com/number_ticket）話比大家知啲整理券派成點。如果要朝聖，真係要做好功夫去排隊拎籌啦。不過蔦所在嘅巢鴨都算喺東京中心，拎完籌仲可以沿山手線去池袋或者再遠啲新宿行下先返去都得，唔使得個企字。
喺呢度可能你會有個疑問，明明係米芝蓮一星餐廳，點解只能屈居第四呢？呢個係同佢嘅湯底有關。以雞同海產撈熬製而成嘅湯底加上咗黑松露，係相當大膽嘅做法，唔少人食完都覺得好特別而且意外地相配。但對於比較鍾意簡單口味嘅食客而言，呢個複雜嘅湯底就唔太合佢地心水啦。
**蔦提供英文餐單，仲會詳細咁寫明材料，有食物敏感嘅朋友都唔使擔心
**拎籌嘅時候每人要比1000円按金以防止no show，另外因為係一人一籌，如果有朋友係食嗰時先到就要同店員講清楚有幾多個人
地址：東京都豊島区巣鴨1-14-1 Plateau-Saka 1F（JR山手線「巣鴨」站南口徒步約2分鐘；都営三田線「巣鴨」站A1出口徒步約3分鐘）
電話：03-3943-1007
營業時間：11:00～16:00，18:00～21:00
定休日：星期三
座位數量：9
官方網站：https://ameblo.jp/yuki-onishi/
第4名：中華ソバ 伊吹
得分：3.96
喺日本，不時都會見到「中華料理」店。但呢啲小店賣嘅唔係中國料理，而係一啲改良成符合日本人口味嘅獨特料理。通常入面都會有煎餃子、炒飯、同「中華そば」——以中國麵條製成嘅拉麵。而位於東京西北、同埼玉縣相隣嘅板橋區嘅伊吹就係以中華そば有名。佢日頭大概會賣65碗麵，淨係得招牌濃厚煮干しラーメン同偶然先會有嘅限定菜單，夜晚就會有埋「端麗（即係「淡麗」，清湯拉麵）」可以揀，不過總共得約45碗，每日嘅份量亦都會調整，所以想去嘅話要當日上佢地嘅官方blog睇清楚先。
如果係第一次食煮干しラーメン嘅朋友，無論係店主定網友都會建議先從「淡麗」入手，因為伊吹嘅「中華ソバ」本身已經係相當濃厚，可能未必可以接受到。如果本身就已經唔鍾意食「煮干」，咁可能就要考慮去其他小店朝聖啦。
地址：東京都板橋区前野町4-58-10 見次パークマンション 1F（都営三田線「志村坂上」站A2出口徒步約6分鐘）
電話：080-4928-0013
營業時間：11:45～14:30，18:40～20:35
定休日：星期一、第一・三個星期二
座位數量：8
官方blog：http://ameblo.jp/surtrece/
第3名：煮干鰮らーめん 圓
得分：3.99
我地而家稍向西移跳出東京23區，去到緊貼神奈川縣相模原市嘅八王子市。雖然咁聽落好似好偏遠，但佢都同鐵路站好近，特別係去神奈川嗰邊玩嘅時候不妨途經一下八王子去試下呢個市內NO. 1嘅隱世拉麵店。
圓嘅主打正如其名，就係煮干しラーメン啦，不過喺呢度就稱為「煮干らーめん」。一般煮干しラーメン都會比較濃厚，但圓就唔同，一眼望落去個湯底竟然可以好似清湯拉麵咁清，不過食落去又唔會冇左煮干し本身嘅風味。有網友推介話本身唔太鍾意嘅人都可以一試，相信對煮干しラーメン初心者而言都會係一個好好嘅入口。
地址：東京都八王子市横山町21-21（京王線「京王八王子」站西口・中央口徒步約4分鐘；JR中央線・八高線・横浜線「八王子」站北口徒步約5分鐘）
營業時間：11:00～15:00，17:00～23:30
定休日：年末年始
座位數量：7
官方Twitter：https://twitter.com/niboshiiwashi
第2名：Homemade Ramen 麦苗
得分：4.04
呢間小店係一間「取材拒否店」，換言之佢唔會接受媒體訪問。但喺冇媒體宣傳嘅情況下佢仍然可以佔據全東京NO. 2，就可以感覺到佢幾有實力。
麦苗所在嘅品川區鄰近雲集有名市街同地標嘅港區，對旅客可能會方便啲。店內最出名嘅有「醤油らあめん（醬油拉麵）」同「にぼらあ（煮干しラーメン，一種湯底以乾燥咗嘅海鮮熬製而成嘅拉麵）」。不過在此想特別講講佢嘅「実家の魚めし（老家嘅魚飯）」。喺日本拉麵配飯係相當普遍嘅食法，好多拉麵店都會發售一啲份量比較細嘅蓋飯，「実家の魚めし」正正如此。原來店主屋企賣魚已經賣咗個半世紀，會限量提供時令嘅新鮮魚生，好味程度媲美出名嘅壽司店！不過佢每個時段限定5碗（週末同假日10碗），想食就要趁早啦。
地址：東京都品川区南大井6-11-10（京浜急行本線「大森海岸」站或JR京浜東北線「大森」站北口徒步約7分鐘）
營業時間：（平日）11:30～14:30，18:00～完售；（週末同假日）11:30～16:30
定休日：星期四
座位數量：9
官方Twitter：https://twitter.com/fukaya_akihiro
第1名：麺屋 一燈
得分：4.09
榮獲全東京甚至全日本NO. 1嘅拉麵店就係呢間「一燈」啦。佢位於東京東北、千葉縣市川市隔離嘅葛飾區，但離JR新小岩站非常近，所以都算交通方便。
一燈嘅湯底以兩款為主：「濃厚魚介」同「芳醇香味」。前者以雞白湯配合5種海鮮熬成，如其名濃厚非常；後者以平時3陪嘅雞骨熬出，係打破業界常識嘅「淡麗ラーメン（清湯拉麵）」。「食べログ」上大部份網友都大推「濃厚魚介つけめん（濃厚魚介沾麵）」，如果嗌「大盛り」或以上嘅份量仲有得免費添湯。不過佢都幾大份量下，只係「大盛り」都400g，所以點餐前都係要三思啊。
喺每個月嘅星期一，一燈都會有限定餐單，日頭夜晚各限定15碗，每碗盛惠800円。今個月嘅就係「純鶏白湯そば（純雞白湯蕎麥麵）」，湯底以特別方式熬製，同「濃厚魚介」完全唔同。其他月份嘅請留意官方網頁嘅更新啦。
地址：東京都葛飾区東新小岩1-4-17（JR総武線「新小岩」站北口徒步約3分鐘）
電話：03-3697-9787
營業時間：11:00～15:00，18:00～22:00
定休日：年末年始
座位數量：11
官方網頁：http://www.menya-itto.com/
官方Twitter：https://twitter.com/menyaittou
其他得獎店舖可以去返「食べログ 百名店 2017」東京拉麵部門官方網站（https://award.tabelog.com/hyakumeiten/ramen/tokyo）睇返，仲有烏冬、蕎麥麵、甜品同麵包等嘅排名，下次去日本旅行嘅話請務必一嚐日本TOP100嘅味道啦！
About Post Author
