【靚景遊】高山・北陸5日遊行程推介
上次同大家介紹完高山、北陸地區周遊券(傳送門)，到底可以用佢去咩景點呢？今次就為大家推介一個高山、北陸5日行程，等大家用呢張PASS去睇靚景。
第一日：金澤（兼六園、金澤21世紀美術館、東茶屋街）
第二日：五箇山、白川鄉
第三日：高山（三町）
第四日：下呂溫泉
第五日：名古屋
第一日：金澤（金澤21世紀美術館、兼六園、ひがし茶屋街）
由大阪去金澤可以坐JR 特急雷鳥（Thunderbird）號列車，雷鳥是往返大阪及金澤的主要列車，途經新大阪、京都、近江今津、敦賀、武生、鯖江、福井、芦原温泉、加賀温泉、小松、金澤等等車站。車程大約2.5小時，不過由於唔同班次嘅雷鳥，停嘅站都會有少少差別，所以連車程都會有微妙差距，要坐雷鳥嘅朋友記得望一望個時間表啦。驚無位坐嘅朋友可以先到JR票務中心預約指定席。
金澤21世紀美術館
金澤21世紀美術館有6間收藏品室同8間特別展覽室，會定期舉行藝術展，包括金澤一帶市民嘅藝術作品。美術館入面最出名就係阿根廷藝術家Leandro Erlich嘅作品《泳池》，喺美術館嘅天窗加一層水同泳池扶手，遊客利用陽光折射，好似置身喺真嘅泳池一樣，港電視劇《最美麗的第七天》都曾經喺度取景。
美術館會喺星期一休館，如果去之前可以睇下官網（http://www.kanazawa21.jp/en/），唔駛去摸門釘。
金澤21世紀美術館
地址：石川縣金澤市廣坂1-2-1
開放時間：10:00-18:00（星期五、六開放至20:00）
入場費用：全免
交通手段：於金澤站乘坐以下巴士
路線巴士（路線バス）
城下町金澤周遊巴士（城下まち金沢周遊バス）
金澤市巴（まちバス）
兼六園穿梭巴士（兼六園シャトル）
兼六園
日本三大名園之一嘅兼六園，是具代表性的江戶時代大名庭園，迴遊式庭園有池塘、亭台茶室，四季有唔同植物可以觀賞，包括山茶花、櫻花、紅葉等植物，冬天雪觀一樣咁靚。
兼六園
地址：石川縣金澤市兼六町1-4
開放時間：（3月至10月15日）07：00-18:00，（10月16日至2月）08:00-17:00
費用：成人310円、兒童100円、65歲以上出示護照全免
交通手段：於金澤站乘坐以下巴士
路線巴士（路線バス）
城下町金澤周遊巴士（城下まち金沢周遊バス）
兼六園穿梭巴士（兼六園シャトル）
另外，兼六園會喺清晨時分開放畀公眾，如果你想慳番啲入場費，可以選擇朝早先去兼六園，詳細免費時間如下：
|
日期 |
免費開放時間 |
|
3月1日∼3月31日 |
5:00 |
|
4月1日∼8月31日 |
4:00 |
|
9月1日∼10月31日 |
5:00 |
|
11月1日∼2月底 |
6:00 |
去完兼六園，如果有時間，可以行埋隔離嘅金澤城公園，參觀河北門費用全免。
金澤城公園
金澤城係江戶時代加賀藩始祖前田利家官邸，由著名基督教大名高山右近指導興建，後來經過多次大火後重建變成現時嘅景觀。2008年被評為國家史蹟，宜家同兼六園成為金澤嘅地標公園，作為承傳石川縣歷史、文化同傳統嘅象徵。
金澤城公園
地址：石川縣金澤市丸之內1-1
開放時間：09:00-16:30
費用：河北門免入場費，菱櫓、五十間長屋及橋爪門続櫓：成人310円、兒童100円）
交通手段：於金澤站乘坐以下巴士
路線巴士（路線バス）
兼六園穿梭巴士（兼六園シャトル）
城下町金澤周遊巴士（城下まち金沢周遊バス）
東茶屋街
東茶屋街被日本選為「重要傳統性建築物群保存地區」，保留住傳統茶屋文化色彩。茶屋係指江戶時代藝技表演舞蹈、大鼓同三味線嘅娛樂場所，而東屋茶街就係金澤最出名嘅茶屋街，由幾條舊街道交織而成，至今仍然保留古色古鄉嘅傳統古街，喺街上會聽到三味線嘅琴聲。
金澤出名製造日本金箔，全國有98%嘅金箔都產自金澤，所以當地唔少產品都同金箔有關，金箔雪糕就係其中一種。
「箔一」係金澤生產金箔製品嘅傳統老店，店內共有兩種金箔雪糕，分別有成塊食用金箔鋪喺雪糕面嘅奢華版雪糕（891円）同有少量金箔碎同銀珠喺面嘅雪糕（450円）。
東茶屋街
地址：金澤市東山一丁目
交通手段：於金澤站乘坐以下巴士
路線巴士（路線バス）
城下町金澤周遊巴士（城下まち金沢周遊バス）
箔一東山店
地址：石川県金沢市東山 1-15-4
開放時間：09:00-18:00
如果大家用高山、北陸地區周遊券係唔包金澤市內巴士嘅，市內北陸鐵道巴士每程要200円，如果一日大家去晒以上景點，可以喺JR金澤站東門口對出嘅車站買北鐵巴士1日乘車券（500円），搭多過兩次就抵番晒。
第二日：五箇山、白川鄉
五箇山
因為五箇山一帶係大雪嘅地方，以前為左方便打掃積雪，所以興建人字屋頂嘅茅房，屋頂外形就好似雙手合掌嘅形狀，所以呢啲屋就稱為「合掌造」。喺五箇山有相倉同菅沼兩個合掌村莊，呢兩個村莊喺1970年就被日本列為國家史蹟，95年同白川鄉被聯合國教科文組織列為世界遺產（文化遺產）。
用高山、北陸地區周遊券喺新高岡站坐世界遺產巴士去「相倉口」同「菅沼」就去到，車程大約75分鐘。雖然呢兩個地方嘅合掌造冇白川鄉咁多，但勝在地方夠晒幽靜，畀人一種舒服寧靜嘅感覺。
喺相倉口站落車過對面，行呢條路入去就會到相倉合掌部落。
相倉合掌造り集落
地址：富山縣南礪市相倉
菅沼合掌造り集落
地址：富山縣南礪市菅沼
白川鄉
坐世界遺產巴士一樣去到白川鄉，由相倉口站到白川鄉站車程大約50分鐘。喺金澤出發，坐濃飛或北鐵巴士去亦得，車程約個半鐘。坐接駁巴士（每程200円）上觀景台就可以一次過睇晒白川鄉百幾間合掌造，場景非常壯觀！！！
白川鄉有全日本最多嘅合掌造，目前有113間，當中和田家係唯一一間被日本政府列為「國家指定為重要文化財產」，主屋部分地方對外開放，可以睇到呢種傳統居所嘅樣貌。
每年1/2月舉行嘅點燈活動更加係旅客至愛! 不過留意2018年開始出於人流管制，點燈期間展望台不得步行前往，而必須坐接駁巴士，而且要有整理券才能入場，整理券以當日入住白川鄉民宿者優先，都時出示訂房資料便可。(官方告示:http://lightup.asia/transportation/)
價格: 500日圓
整理券販售地點：JA駐車場
販售時間：16:30~售完為止
白川鄉合掌造り集落
地址：岐阜縣大野郡白川村荻町
前往方法：
1.由名古屋站前往:乘坐岐阜巴士高速白川郷線(車程約2小時50分/必須預約)
2.由高山站前往:乘坐濃飛／北陸鐵道巴士白川郷・金澤線／白川郷線(車程約50分/部分班次必須預約)
3.由高岡站前往:乘坐加越能巴士 五箇山・白川郷方面(車程約2小時/不須預約)
4.由金澤站前往:乘坐濃飛／北陸鐵道巴士白川郷・金澤線(車程約1小時15分/必須預約)
和田家
地址：岐阜縣大野郡白川村荻町997
開放時間：9:00-17:00
入場費：成人300円、小童150円
第三日：高山
三町古街
嚟到高山當然要去三町古街啦，由JR高山站步行大約10分鐘就到！呢度有「飛驒小京都」之稱，同金澤東屋茶街一樣被日本列為「重要傳統性建築物群保存地區」。古街仲保留住江戶時代嘅特色建築，喺度可以搵到唔少飛驒娃娃嘅同好正嘅飛驒牛美食。
飛驒娃娃
由白川鄉到高山都會見到一隻好可愛嘅娃娃，佢叫SARUBOBO（さるぼぼ），喺飛驒古語有「猿寶寶」嘅意思。飛驒娃娃係古時候當地媽媽整畀小朋友嘅護身符，頭同四肢都係紅色、再加上一塊菱形肚兜，因為佢係守護神所以就冇眼耳口鼻，永遠都係以「大」字形態視人，寓意小朋友可以好似馬騮一樣精靈活潑咁長大，宜家就成為高山地區受歡迎嘅手信之一。
飛驒牛
呢間飛驒こって牛寿司就係古街食飛驒牛嘅人氣壽司店，亦係食べログ話題食店，售賣最高級5等級飛驒牛。飛驒牛係歧阜縣產嘅黑毛和牛，脂肪比例較高且分佈均勻，肉質柔軟，我覺得係日本三大牛以外必試嘅和牛。
呢度一共提供4種飛驒牛壽司，包括
A：飛驒牛手握壽司（竹炭鹽及薑醬油味各一件）600円
B：飛驒牛軍艦兩件 700円
C：三種盛壽司（竹炭鹽、薑醬油味、軍艦壽司各一件）900円
X：飛驒牛拖羅壽司兩件 900円
由於太好味嘅關係，大家記得預番大約20分鐘時間去排隊。
喺古街除左可以搵到飛驒牛壽司，仲有串燒、可樂餅等多種飛驒牛美食，記得唔好錯過呢度啦。
飛驒こって牛寿司
地址：岐阜縣高山市上三之町34
營業時間：10:00-17:00
第四日：下呂溫泉
下一站就應該去日本三大名泉之一嘅下呂溫泉，呢度一共有42間溫泉旅館，大家可以喺度住番晚浸溫泉。
下呂溫泉係鹼性單純溫泉，無色透明，水質溫和，帶有微香，有消除疲勞、改善風濕痛症等功效。
係下呂溫泉街，隨處可見免費嘅足湯，最近JR下呂站就係モリの足湯，由車站行大約會分鐘就到，可以趁等車期間去浸一浸。
另外仲有其他有特色嘅足湯，就好似係白鷺の湯門前呢個維納斯足湯咁，足湯中間有一座維納斯神像，有份歐式感覺。
第五日：名古屋
名古屋城
名古屋城係江戶幕府德川家康興建嘅平地城堡，名古屋城中最出名嘅懸掛喺天守閣嘅金鯱，原本用作城堡防火符咒來裝飾大樑，後來就代表城主權利嘅象徵。
四季可以喺名古屋城嘅庭園欣賞到唔同嘅植物，春季有櫻花、山茶花、牡丹；夏季有紫薇、繡球花；秋季帶芙蓉花；冬季則有梅花。
名古屋城
地址：〒460-0031愛知縣名古屋市中區本丸1番1號
開放時間：09:00-17:00
入場費：成人500円、中學生以下免費
交通手段：
地鐵名城線 「市役所」 下車 7號出口徒步 5分
地鐵鶴舞線 「浅間町」 下車 1號出口徒步 12分
白鳥庭園
白鳥庭園係名古屋一池泉回游式庭園，以日本中部地區地形為背景，用「水的故事」做主題，用假山做御嶽山、河流為木曾川、池塘做伊勢灣，四季景色優美。去白鳥庭園交通好方便，由JR名古屋站乘搭東海道本線到熱田車站，再步行13分鐘左右就到。
白鳥庭園
地址：〒456-0036 愛知縣名古屋市熱田區熱田西町2-5
開放時間：09:00-17:00（最後入園時間：16:30）
休園日：逢星期一、12月29日至1月3日
入場費：成人300円、中學生以下免費
交通手段：
地鐵名城線 「神宮西」 下車 4號出口徒步 10分
About Post Author
