集體回憶呢啲，到咗某個年紀就會明㗎喇…8、90後由細食到大嘅元綠，由以前同元氣鬥到你死我活，連Twins都係佢地代言人，到今日執下執下淨返最後一間！聽講水準已經大不如前，更被冠以「新。明將」嘅稱號。正所謂新年新開始，元綠決定攪個［$48任食迴轉壽司］睇下可唔可以起死回生，但網上就有前員工勸籲各位為身體著想千祈唔好去，既然係咁，就等我入天水圍做死士，幫大家探下路喇。
點知去到發現有超多人係門口等緊，由於好多人放棄唔等，加上我係1個人去，所以大約等咗2個鐘左右就入得喇！（我在場聽到3-4個人去嘅，由12:00等到4:00先有得入啊）
5點前入座$48（60分鐘）／5點後入座$68（90分鐘）
以前我好鍾意Twins㗎！有佢哋代言嘅產品就會試！你鍾意阿Sa定阿嬌啊？
今次呢個優惠打響旗號，＄48食到飽！咦？啲壽司呢？
有啦！煙鴨胸、鴨煙胸、胸煙鴨？
等咗足足差唔多成分鐘先有下一碟壽司！咁計法，1分鐘一碟，如果你食得快嘅….都真係可以食60碟嘅！
吖….唔記得同你講，我係處於迴轉壽司嘅中上游，所以都仲有少少款可以揀，至於隔離呢班巴打就慘喇，處於下游位置，5分鐘先有一碟壽司，仲要4個人分！
壽司普普通通，唔算好難食，但一定唔係好食囉，明將應該好過佢。
煙鴨胸超鹹、甜蝦暖粒粒嘅、壽司飯好大嚿、炸蝦好厚皮……
隔離巴打餓到要問我借碟壽司食住先
有個仲飛象過河過嚟我哋呢邊迴轉帶拎添啊
加一杯茶要＄3，除非你想渴死，如果唔係都要加㗎喇
傳單上嘅壽司幾乎冇出現過咁制
以下係我係呢60分鐘入面見過嘅食物
最後食咗6碟壽司同2碟小食
當我嗰60分鐘已經不知不覺過去咗，預備離開嘅時候，迴轉帶居然出現大量食物！實在太過份喇！
所以到底食得飽唔飽，係好視乎你嘅運氣！而呢個優惠會做到一月底，如果你想去懷緬下過去，咁就去喇。
元綠壽司
地址：天水圍天華路33號頌富商場2期1樓128號舖
分店電話：2893 8113
送禮物時間
今次嘅禮物係
1. 讚好LikeJapan Facebook專頁
2. 註冊成為LikeJapan網站會員
3.瀏覽此博客文章時，點選左方的「分享博客文章」以獲得分享連結
4. 會員可透過各大社交平台及討論區分享連結網址，LikeJapan會統計每條連結的點擊次數，會員也可於博客頁面左方查閱點擊排行榜。
5. 截止時間內的分享連結點擊次數愈多，獲獎機會愈大。如有會員的分享點擊數目相同，將根據系統紀錄最快達到該點擊次數的參加者得獎。
詳細玩法亦可參考此頁
＊如有任何爭議，LikeJapan將保留最終決定權。
About Post Author
