學習日文既路途上總係諸多阻滯，無論係想學既，自學既，甚或者出去學校學既都好，都總會遇上唔少瓶頸位無辦法突破，例如初學既，總會背唔熟五十音又或者搞唔清幾時要讀長音；已經捱過左初學階段既，又會被一大堆背極都背唔完既生字嚇親，再唔係就係啲文法記極都記唔入腦；即使大家突破左以上咁多關，相信最後都會發現自己聽力或寫作能力方面好難改進…
I know that feel！作為一個過來人，大家所遇到既問題筆者都有遇到！以下筆者會將自己遇到過既問題同最後解決既方法分為六個，並且由淺至深排列，將自己所得既經驗歸立好再係度分享比大家，等大家可以對症下藥！
五十音
背五十音係每一位日語學習者既必經階段，但背曬佢都要下一番苦功，唔知有無讀者係仲未記到五十音呢？不如參考一下以下既方法啦！
如果你係「死記硬背派」，或者可以參考我寫過既兩篇文章先，其實背五十音可以比想像中有趣得多，不如睇下以下兩篇所提供到既方法幫唔幫到你
無論背咩都好，其實用愈多方法去記，去刺激大腦就最快入到腦！但係如果以上講過既種種方法都行唔通呢？
筆者就會建議大家…跳過背訟部分，直接學習生字同課文！
放心！筆者唔係hea大家話求其skip左佢就算。如果大家真係嘗試過曬各種方法，但五十音總係記唔熟，其實真係唔緊要—雖然大家記唔「熟」啫，但點都會有個約莫印象既，只要你對每一個字都有一個「丫！呢隻字呀嘛，我有見過有印象呀！」既感覺既話，其實剩下來要做既野只不過係透過唔同既方法加深隻字既認識，而最直接既方法就係直接進入之後既學習階段，讀課文，學生字。
可能你會問如果遇到唔識熟既字應該點算，答案好簡單，就係老實地去返五十音表度查返個讀音，但未完！查清返個讀音之後就成個生字讀出聲，當你連埋個生字一齊去記五十音既時侯，你個大腦就會多一種方法去回憶返呢一隻字，從而加深印象！更好既係，呢種方法可以順道幫你記埋生字，唔需要學黎學去都係五十音咁沉悶！
係未完全熟透每一隻字既讀音既情況下，直習去學習生字／課文既效率可能係會有少少低，但相信筆者，速度會愈黎愈快！自自然然，大家就會無啦啦驚覺自己已經識背曬唔五十音架啦！
長音
所謂日文既長音，簡單黎講就即係將發音延長，例如讀おかあさん既時侯，大家係唔會讀「お·か·あ·さ·ん」，而係會讀「お·か～·さ·ん」;但問題就來了，到底咩時侯要長音，咩時侯唔需要呢？「速讀日本語」呢個網站就介紹左當中長音既文法規則，亦都係唔少人學習長音既方法：
好複雜？好麻煩？筆者都覺呀！筆者以前就係用背文法規則既方法去學習長音，雖然有一排真係可以背得好熟，但每次讀之前都要先諗一諗真係好麻煩，而且又讀得慢…
但原來學識長音既方法好簡單，就係唔好理以上既文法規則，讀書既時侯有理無理讀左出聲先！透過自己實際用口讀左出聲再體會所謂長音，就係長音最好既學習方法啦！
講就容易，但實際操作應該係點？首先大家可以拎返自己既教材聽一次正確既讀法，之後跟返平假名慢讀一次，再快讀一次…相信大家係快讀既時侯就會發覺遇到長音既時侯，自自然然就會讀到出黎，並唔需要事前記一大堆文法規則！而長音組合黎黎去去都係個幾個（例如 あかさたなやまわ)再加上あ）等，只要練習時捉緊幾個例子，讀多幾次聽多幾次，下次遇到同樣長音既時侯就會自然讀到出黎！而事實上筆者都係用咁既方法學會長音變化！
生字
提到有關日文生字既困難，相信唔使多講大家都會知係咩—就係生字太多，時間太少！啲生字總係背極都背唔曬，到底要點解決？
集中目標
隨住大家學習日文既程度愈學愈深既同時，所接觸既生字量一定會隨之而大量增加，但腦就得一個，時間就得廿四個鐘一日，我地一定要搞清楚各種生字既分類—一黎可以就住唔同種類既生字分別作唔同既方法去溫習，等記生字呢個步驟可以事半功倍；二黎分清楚之後我地就可以先集中處理一啲重要，要優先處理既生字
筆者溫習生字既時侯會簡單將生字分做三大類—分別係(1)外來語 (2)音讀漢語 (3)和語
(注意呢個分類只係方便大家溫習使用，同真正日文文法分類會有唔同既地方）
(1)：粗略地分，大多數以片假名黎表示既都係外來語黎既，例如スプーン (spoon)，バス (bus)等等，而呢類既生字筆者建議大家唔使放太多時間落去，因為好多時只要讀過一兩次，就會知道佢係來自邊一種英文字，對應返就已經會明白該種生字既意思！甚至去到後期一啲比較深既外來語，例如コミュニケーション(communication)，ユニフォーム(uniform)其實都係一樣做法！
(2)：漢語既處理方法一樣簡單，係學習每一個漢語我都會進行兩個步驟(i)確認意思；(2)重覆朗讀。可能大家會問筆者點解要確認意思呀？咁似中文字，唔使睇意思我都明啦～
咁你就大錯特錯啦，有唔少漢語都同大家日常用開既中文有所不同架，等我比三個字大家估估係咩意思啦：
． 愛人；
． 床屋；
． 大家
答案：
．情夫／婦；
． 剪髮屋；
． 房東
筆者係學習漢語既時侯都不時搞錯呢啲生字！你話如果同日本人溝通講錯你話幾尷尬呢，所以學漢語之前，記得確認一下佢既意思先！之後既步驟就簡單得多，就係透過多次既朗讀（記得要讀出聲，唔係得個睇字），將讀音同漢字之間做一個連結，等自己下次讀既時侯可以有個反射，知道呢隻漢字係點讀。
(3)：和語最大家應該花最多心神落去溫習既一類，而佢既範圍亦都係最廣，借用WIKI定義：「漢語和外來語+動詞「する」構成的複合詞（「選択する」、「サービスする」等）以外的幾乎所有動詞，幾乎所有的形容詞，以及全部助詞都屬於和語。例詞如：みる（見る）、はなす（話す）、よい（良い）、が（主格的助詞）、うみ（海）、やま（山）、さくら（桜）等。」
最慘係訓讀名詞既讀音簡直係捉唔透，又有邊個估到山係叫YAMA，海係叫UMI先得架…不過又唔係灰心，係處理呢一類字語方面筆者都有少少心得。當然同課文有關既重點字眼要記熟佢，但每課都都總有好多額外既生字去記，呢個時侯我地可以借用一下「背五十音」既拖延方法：就係遇到佢既時侯照讀照過，只要成功對生字有個初步印象就可以。因為尤其係初學階段，好多生字都會係之後既課文出現返，到時只需要印象又會再進一步加深。
當然生字唔似得五十音咁常見，未必可以係之後學習既內容見得返面啦！所以我會建議大家買一本雞精生字書，因為生字書比起逐課課文比你既生字分類得更加有條理，例如佢地會一次過將生字分返あいうえお音序，同埋分埋詞性比大家等等…將有印象但未背熟既生字集中係生字書溫係筆者咁耐以黎覺得比較有效率既溫習方法！
今次分享到到呢度先！唔知以上既方法幫唔幫到大家呢？大家試過有用既話都可以分享返比朋友或者比啲feedback筆者，等方法可以變得更加完善！而有問題亦都可以係facebook或者我地既伸手區發問架！
剩餘既文法，聽力，寫作既改善方法都會一次過係下一次既文章提到架！記得緊貼我地LikeJapan專頁啦！
About Post Author
