【貝遊日本】北海道滑雪初體驗－札幌國際滑雪場

難得冬天黎到北海道，唔係唔試下滑雪麻？
一個未試過滑雪嘅新手（我）最後揀左呢間距離札幌好近嘅札幌國際滑雪場，只要係札幌撘個半鐘頭巴士就可到達，方便我可以即日來回。

札幌站會有巴士到滑雪場，但注意返尾班車嘅時間，平日8:20就係最後一架去滑雪場嘅巴士啦，
詳情可以睇返官網：http://www.sapporo-kokusai.jp/tw/access.html

而由於我間酒店比較接近巴士第二個站，所以我就冇係札幌站上車啦。

上到車唔駛即刻比錢，職員會係所有人上晒車之後再逐一問你收錢，車票價錢來回係2500YEN一個人，
佢另外仲有一個PACKAGE，就係來回車票＋滑雪場一日卷＝4980YEN
最尾我係買左呢個PACAKGE嘅，但後來我發現我係唔需要買架，至於點解，繼續睇落去啦！

到左啦，呢個就係札幌國際滑雪場，位於定山溪溫泉街附近的山區，背靠朝裏嶽。

一入到去左手邊就會係租野比錢嘅地方。

正面就係電梯上去滑雪場同食野買野嘅地方。

而右手邊就係LOCKER同更衣嘅地方，全部一目了然！

咁呢個係租野嘅地方，咩都有，帶個人黎就得架啦，除左滑雪裝備之外，雪褸雪褲手套雪鏡冷帽咩都一應俱全！

租用價錢主要如下：
一日滑雪裝備：5200YEN
滑雪服裝（雪褸雪褲手套雪鏡冷帽包晒）：4200YEN
詳情：http://www.sapporo-kokusai.jp/tw/price.html

咁由於我未滑過雪，亦唔識滑雪，所以我係預先上網預約左教鍊。
點樣預約其實好簡單，只要上以下網址：http://www.sapporo-kokusai.jp/school/
揀返適合你嘅課程，我就揀左20000YEN 2小時2個人個個班。

預先預約定最大好處係可以寫明想要英文導師。因為話明札幌國際滑雪場，即係好INTERNATIONAL，所以預先講定係有英文老師提供XD

另外，我岩岩咪話其實我係唔駛巴士買定Package，因為原來預約左上堂係已經包埋一個滑雪一日卷，即係同巴士Package個張一樣，所以佢最後有退返1500YEN比我，但係我個巴士PACAKGE係4980YEN，扣左來回巴士票2500YEN嘅價值再扣埋退返個1500YEN…仲有980YEN去左邊呀…..@@ （算吧已經成定局了）
！！所以報左課程就千萬唔好買巴士Package呀，但其實我覺得如果你冇報名搵教練但都係新手嘅話都唔好買Package，因為你都唔識滑，所以你並唔會撘到好多次吊車，分分鍾係唔會有機會撘到，因為撘吊車重點係有上冇落！！但唔駛驚，滑雪場有一個纜車Cabin係可以落返去，來回價係1350YEN，去到買呢個就OK我覺得！

另外報名課程仲有滑雪裝備租用折扣優惠，由5200YEN變左3500YEN，
所以2人報名連課程最後價錢係（唔計巴士）：20000YEN（課程費）＋7000YEN（2人裝備租用費）＋8400YEN（2人服裝租用費）＝32400YEN

如果去到先決定想上堂嘅話，好多時都冇機會，睇下我一去到就見到呢個牌了，所以都係盡早預約好啲！
滑雪班有SKI同SNOWBOARD揀，咁今次我揀左學SKI，即係傳統啲有2支棍揸住個隻，因為睇相感覺上好似易啲咁（但最後我係有啲後悔XD）

我係9點鐘到達，10點半就開始上堂啦，其實比錢換衫放野入LOCKER所有野加埋真係需要個半鍾先搞掂。
著齊裝備啦！出發！

呢個就係我嘅教錬，時川先生，佢話佢英文名係TIME RIVER，好搞笑XD

首先一開始要做熱身先

正式上堂！首先教我地點樣可以係斜路停低（最主要係打橫個人行），
再開始教點行，佢經常提及大 PIZZA同細PIZZA，即係好似圖中咁，教鍊雙腳形成嘅大三角就係大PIZZA，我個個就叫細PIZZA，細PIZZA腳就係前進，停嘅話就要大PIZZA腳，而且要內八字，不過其實我講就講得簡單，到真實情況真係好難呀><