曲水之庭 玉泉酒店係位於島根嘅玉造溫泉街內，由JR玉造溫泉街站坐車約5分鐘就會到，有需要嘅可以聯絡酒店嘅人，佢哋會有專人去車站載你㗎！（接送巴士提供服務時段15：00～20：00）
一入到去就可以見到一個大廳，出面有個好靚嘅庭園「曲水之庭」，日頭同夜晚會有好唔同嘅感覺，坐喺大廳到睇下靚景休休息好舒適㗎～而除咗大廳可以見到依個庭園靚景之外，其實酒店房內都可以睇到。玉泉酒店一共有121間房，可以容納到680位住客，房間有多個唔同嘅設計，全部都係以和式風格為主，設備完善，房間好靚好大好闊落仲有免費Wi-Fi。
嚟到島根縣又點唔可以唔去浸溫泉呢！玉泉酒店係西日本最大級嘅大浴場（容納到男女各200人）同一個露天溫泉可以容納到男女各40人），邊睇住出面大自然嘅風景一邊浸真係好豪華的享受同埋好舒服！天氣凍嘅時候去露天溫泉浸更加係人生一大享受阿！
而且玉造嘅溫泉水係出哂名對皮膚非常好，有「神之湯」之稱，有美肌作用，浸完皮膚真係好滑㗎！
浴場依到仲有桑拿同專為女士們而設嘅化妝間，可以慢慢休息，將一日嘅疲勞消失～！
浸到舒舒服服就緊係要食餐好㗎啦！玉泉酒店有超豪華嘅早餐同晚餐，首先早餐就會有多款西日式自助早餐，麵包，沙律，炒蛋至到日式嘅茶漬飯，日式炆牛肉同各種飲品等等應有盡有，包你食到飽飽有氣力可以出發 去島根唔同地方繼續玩！
晚餐就豪華啦！好似依個叫おもむき嘅餐咁，除咗有新鮮嘅楚蟹之外，仲有高級鮑魚，紅喉魚，島根和牛等等超好食嘅食材集於一身，美食滿滿咁放喺枱上面，真係好幸福㗎～（內容同價錢會因季節而有所改變，詳請請參照官方網站）
玉泉酒店每日晚上9點10分都會舉行山陰傳統鄉土「安來節民謠」表演，係非常受歡迎嘅節目，仲會邀請觀眾一齊跳，酒店職員同我講有時多人到滿坐，大家要企住睇添㗎！
玉泉酒店內亦都有各種手信店，除一般食品類手信類之外，一講起島根就當然係結緣啦！呢度都有結緣手飾，仲可以因你嘅出生年月日計出最適合你嘅水晶，再自己去揀鐘意嘅繩同水晶，再整成電話繩等裝飾都可以㗎！
另外酒店內有卡啦OK房，居酒屋等等，有得玩有得睇有得買！去玉造溫泉街玩嗰陣，可以考慮曲水之庭 玉泉酒店住啦！
曲水之庭 ホテル玉泉
地址：島根県松江市玉湯町玉造５３−２
一般Check in時間：15：00～
一般Check out時間：～10：00
（會因應住宿Plan而有所改變）
詳細價格資料以及最新嘅預約狀況可以直接於官網查詢：按我
或者去FB專頁：按我
About Post Author
