上個禮拜同大家介紹過一間動漫cafe，其實佢除左係油麻地有店之外，荃灣都有㗎！
今日就帶大家嚟荃灣拜訪下呢間cafe，順便睇下荃灣究竟有咩遊戲動漫熱點啦！
我地第一站要去嘅係Youme Cafe，佢係一間由日本animate同埋香港沙嗲王集團合辦嘅動漫cafe。佢會不定期更換主題，好似油麻地就做《暗殺教室》，荃灣就做《歌之王子殿下》
由地鐵站b出口行過去大約3分鐘就可以到㗎啦
認住間萬寧就唔驚去錯地方
一上到餐廳，佢前舖會係江戶前，後面先會係youme cafe，唔駛怕以為自己去錯地方。
由於我係book閒日下晝4點去，所以個陣一個人都無，係坐耐少少先有兩個人入嚟。佢有5個唔同嘅時段俾你揀，雖然walk in都ok，不過建議假期最好都係訂左位先，聽聞都會多人，穩陣d嘛！上網book就OK！
一入到去已經見到好多《歌之王子殿下》嘅野啦，大型紙牌啦，Menu啦，枱墊啦…仲有播住佢地嘅歌添。
每個角色都代表住一種野食同埋野飲，如果你係粉絲嘅話，梗係揀番你嘅本命啦，但因為我無特別喜歡邊一個，我就淨係揀我自己想食嘅，點知咁岩兩個都係音也Otoya！其實食物質素幾好，始終都係沙嗲王集團，食物有番咁上下保證嘅。
我嘅咖哩肥牛烏冬，仲要有音符做裝飾so cute！！
呢個係洛神花黑加侖子配雪糕，幾好味，唔錯！雪糕都好大球！
由於每個時段係一個半小時，大約係倒數半個鐘嘅時侯，可愛嘅侍應生妹妹就會出嚟同我地玩遊戲，每人會有3張咭代表包剪拓，舉高你想揀個張，ready之後侍應妹妹就會抽個波波代表佢出乜野，贏咗就可以揀一個杯墊！正常全場應該淨係得5個人可以拎到，但因為我地全場得3個人，所以一贏就有，今次我都係揀左otoya！
每個人都會有兩個牌子，一個係for抽杯墊，一個係for抽書簽！你可以隨時出去或者埋單個陣先抽都ok！
收銀旁邊仲有一個禮品區，主要係賣文具同鎖匙扣個d為主！
最後埋單114蚊，價錢算中規中距。可能因為無咩人嘅關係，所以無乜氣氛。如果一大班朋友一齊嚟可能會開心d，有陣時仲會有cosplayer上嚟添架！但可能要假期吧！如果係有蠟筆小新嘅主題就好…哈哈
食飽飽就同大家行街街消化下！荃灣近年多左好多大型嘅商場，不過今日帶大家遊嘅係兩個比較街坊嘅商場。
第一個就係荃豐中心商場，唔好睇佢殘殘舊舊咁，其實佢底層全層都係賣電腦產品，遊戲，動漫精品咁，小編平時買遊戲都會去！由youme cafe行過去嘅話10分鐘內就會到。
另一個係荃灣新之城，佢下層叫南豐中心，上一層先係新之城。由荃豐行過嚟都只係10分鐘。呢邊雖然無遊戲賣，但係就有好多精品，仲有一個好大嘅扭蛋區。我數過total有成294部機，你想點扭就點扭！
係我好鍾意嘅蛋黃哥同Sailormoon 
今日嘅介紹就差唔多啦，歡迎問問題，或者你地又有無咩動漫好去處可以介紹呀？
下次再見BYEBYE 
About Post Author
