登登，今日就同《街霸V》做番個試玩報告。記得小編第一次玩街霸已經係小時侯，對於純格鬥遊戲，其實唔算好大興趣，不過呢d咁經典嘅作品又點可以唔試下哩，即刻睇下有咩玩！
遊戲一開始會以故事帶你進入教學模式，啱晒小編我呢d智障人士重新學習。除左基本出拳腳（分弱中強）同埋一d閃避同埋身技之外，今集佢仲有個特別嘅技能就係V-trigger，每個人使用V-trigger所發動嘅招式都唔同。好似Nash可以用V-trigger嚟瞬間移動去偷襲敵人嘅上下位置，而春麗就可以增強攻擊力等等。
遊戲主要分4個模式，劇情，訓練，對戰同生存，另外仲可以連線對戰。
小編本身想玩故事先，但驚難會死，所以玩左訓練模式先。因為實在唔熟悉d技，就搵個人嚟練下先，我就揀左Cammy （女仔通常都揀番女仔㗎啦）隨時都可以翻睇招式表複習複習又複習…
故事模式總共有16個角色俾大家選擇，咁練開Cammy，我就用番佢嚟玩，但完全超出我想像。竟然係非！常！簡！單！成個故事模式只有3 round，而且對手非常之弱，感覺係頭先我唔駛特登學咩技，求其拳腳都可以打得死佢地。所以一個角色嘅流程非常之快，10分鐘之內可以完成。另外每完成一個角色就可以獲得一套新嘅costume，不過就要係商店購買（遲d推出）。
再之後我就去左挑戰生存模式。佢總共分4個LEVEL分別係簡單，普通，困難同地獄。小編只係玩左普通同困難，以小編呢d弱雞嘅程度，玩普通玩左10幾round就byebye咗。如果你地獄級嘅話唔只敵人勁咗，仲要總共過100關先得，真係諗起都覺得地獄。
因為你嘅血量係累計到下一場，所以你想回血或者增加其他技能就可以靠《Battle Service》，如果你得分越多，就可以買越多野。以下就係可以買嘅野。買乜做乜都係自己策略或者致勝嘅關鍵。
- 體力回復
- EX Gauge(Battle開始時已滿)
- V Gauge(Battle開始時已滿)
- 提升防御力
- 提升攻撃力
- 提升體力防御
- Score Chance(下次對戰對手嘅攻撃力同Stun Damage會增至兩倍，所獲得嘅Score都係兩倍）
之後係連線模式，分別有格鬥大廳，排名賽同非正式對戰。你可以係格鬥大廳自由開局或者進入人地房間進行格鬥。排名賽就係同世界各地高手挑機，每局完左都會得到League Point，呢個分亦都會影響你嘅排名。最後就係非正式對戰，可以單純享受對戰嘅樂趣，唔駛計分，而且仲適用於唔同mode,例如Training同story mode咁。小編分別嘗試左非正式同格鬥大廳。但兩邊分別連左大約5-10分鐘都連唔到，之前都有網民話過佢連線速度好慢，呢樣野我唔肯定係我問題定佢server問題，各位有興趣可以自己試下。
玩後感：
畫面走華麗動畫風，其實都幾賞心悅目嘅！只係主角d比例係走外國風？春麗條脾仲粗過佢隻手囉…劇情亦比我想像中單調，一直就只係對戰對戰同埋對戰。如果你係街霸粉絲或者勝負慾好重（鍾意不斷同人地挑機），咁呢隻遊戲好適合你玩。其實生存模式要爆晒嘅話，都算耐玩嘅，但始終唔係小編杯茶，所以唔會有個種不斷挑戰嘅心！我都係返去玩返GTA算。（純個人喜好）
送d遊戲片段俾你地睇下啦
About Post Author
