相信有唔少熟悉日本嘅朋友，每年到呢個時候一定會成日有人問一個問題，就係日本係咪都過緊年……
其實日本轉咗行新曆好耐，慶祝新年全部都跟新曆1月1日，有啲傳統少少嘅日本人農曆新年搞下儀式敲下鐘，但始終唔係公眾假期，點都比唔上佢地過公曆嘅新年。
相反呢，佢地反而比較重視每年立春嘅前一日，即係「節分」，仲有個令外國人幾不解嘅活動：撒豆。
話說日本傳統就話每逢轉季嘅時候，就會有鬼出現。呢啲鬼同我地中國人講嘅鬼唔同，並唔係講人死後徘徊喺人間嘅鬼魂，而係一隻人型嘅怪物。
呢啲怪物仲有5款顏色，代表唔同人性嘅弱點。咁啲鬼叫得做怪物，就梗係會四處搞下破壞呀，搞到人叫苦連天咁囉。咁其實件事又關啲豆咩事呢，最初我都以為係咪好似萬聖節咁，餵飽班反斗星等佢地收手嘛。
點知原來有啲日本人話豆(mame)原來可以寫做魔滅，即係消滅魔鬼喎。其他仲有幾種講法，不過老實講佢地想點就點啦~
做法方面，撒豆都唔係亂咁撒㗎。首先啲豆一定係炒過嘅「福豆」，要放喺屋企嘅神棚前面或者放喺高過個人嘅地方用白紙墊住黎供奉下，到咗節分嘅黃昏時候開咗屋企個窗，先至由呢間屋嘅主人或者係呢一年犯緊太歲嘅男仔，由屋入面向外撒豆，仲要一路叫「鬼は外、福は内(鬼向外，福往內)」。
撒完啦，趕完鬼啦就要嗱嗱林關返個窗，屋企所有人馬上食返自己歲數咁多粒嘅豆，食完先叫驅完鬼。另外春分仲有食惠方卷嘅習俗，呢個就比較正常，係唯獨食呢一部分年年都聽到因為惠方卷太長而噎到嘅新聞……
雖然節分就唔係咩野大日子亦都無假期，不過傳統習俗上亦都算係繁複嘅一個節日咁啦，其實日本人都開始有啲求其㗎啦，仲要聽講有人會用花生代替福豆驅鬼，花生咁犀利，真係要食多啲先得。
資料來源：http://www.mag2.com/p/news/236174
About Post Author
