繼台灣開完展之後，伊藤潤二粉絲等到頸都長嘅「伊藤潤二恐怖美學體驗大展」終於開到嚟香港PMQ啦！如果一早已經去過台灣站展覽會的話，唔好以為香港就唔值得再去，因為製作團隊特意加入咗本港獨有嘅元素同「香港獨家專區」，場地亦比台灣站大兩倍！所以小編幾時都話香港係一塊福地~哈哈
區內最特別嘅就係AR互動體驗區，只要戴上AR眼鏡，再行近區內展示嘅恐怖漫畫前，驚悚動畫就會即刻湊近眼前，而且仲有埋音效！細膽鬼要留意了~不過可以見到識郁嘅人頭氣球同埋富江，感覺好奇妙~!
係水內重生中嘅富江！
當然唔少得同富江合影吧~
除咗富江之外仲有雙一！
場內仲有真人版富江同雙一可以野生捕獲！所以打扮得暗黑啲，影相時就可以同佢地融為一體XD
輪到香港獨家專區，係伊藤潤二專登同展覽團隊合作創造以香港為背景嘅漫畫，包括富豪雪糕車等，相當有誠意！
同樣係香港粉絲獨佔嘅，就係場內會展出10張伊藤潤二嘅作品「魔之碎片」珍貴手稿，包含取錄自「富夫：紅色高領衫」、「緩慢的告別」、「解剖妹」同「黑鳥」等短篇故事，大家可以近距離欣賞老師嘅鉛筆稿同手寫對白！
最後就係「人頭氣球恐怖拍照亭」，入去影完相就會發現「人頭氣球」變咗做自己個樣！就連伊藤老師自己都表示，呢個係佢最喜愛嘅環節~
行完展覽區，當然要買番啲野返去做手信啦！個人覺得口罩同tote bag最實用。
真心鐘意伊藤老師嘅畫的話，手繪本亦好值得購入！
至於門票，可以經由Timable或Ticketflap網站訂購，每張售價為HKD$100，如果想有埋香港限定嘅人頭氣球布袋同埋人頭氣球，就可以購買HKD$200嘅「香港限定人頭氣球套票」，留意番數量有限，想收藏就唔好猶豫啦！
日期：即日起至2月26日
時間：10:00-21:00
地點：PMQ元創方（中環鴨巴甸街35號）
官方Facebook：www.facebook.com/itojunjitaiwan
About Post Author
