今日想同大家去嘅百老匯，並唔係睇戲或者賣電器，而係一個男女皆宜，動漫迷必去嘅天堂！去中野百老匯非常方便，如果係新宿站出發，只需五分鐘左右就可以到達！
▼「中野百老匯」位於中野車站北口，一出嚟就可以望到前面嘅商店街，只要沿住商店街直行幾分鐘就可以到達。
▼唔好見佢好似殘殘舊舊咁，但其實只要你係一個動漫迷，入到去都會無比興奮。點解？因為佢入面有各式各樣嘅動漫產品，好似漫畫，模型，CD等等。而且大部分都係二手商品，價錢方面好多時都可以為人帶來驚喜。
▼好似呢間店除咗賣大型Figure，都會賣比較多小型嘅精品，好似鎖匙扣，磁貼，甚至扭蛋同盒玩都有，而且仲可以單隻購買。如果儲開扭蛋嘅朋友就可以係呢度找尋自己所需嘅扭蛋或者盒玩啦！
▼而系列方面，佢就男女性向都有。男仔嘅可能Gundam，龍珠，星矢，數碼暴龍等等，女仔嘅就有美少女戰士，Melody，Hello Kitty等等。
▼至於呢間分佈日本各地嘅連鎖店「Mandarake」係商場入面就已經有好幾間！
▼除咗有唔同嘅精品同模型出售之外，佢仲有一個令我雙眼發光嘅區域。
▼就係呢個漫畫區域啦。睇下幾多人係度睇緊。佢仲有個好大嘅特價區。
▼再行前少少睇，價錢係超平！100円一本，200円三本(未連稅）。
▼雖然係二手，但係其實好多書都保存得好好，唔會出現霉爛嘅情況。
▼有好多經典嘅漫畫，好似「頭文字D」，「One Piece」，「進擊的巨人」同「City Hunter」，另外仲有蠟筆小新，叮噹，金田一，柯南等等。真係就算唔識日文都想買返去珍藏。
▼但因為行李關係，我都只可以忍痛咁，淨係揀咗三本返去（係我最愛嘅金田一同小新
）
）
▼舖頭仲提供退稅服務，各位精明嘅朋友買開野就記住留意返啦！
▼商場入面設有扭蛋區域，仲有我之前介紹過嘅「隱面子」。
▼如果動漫產品滿足唔到你，商場入面其實仲有好多唔同嘅明星商品。好似呢間就賣好多日雜，寫真集，CD同各類周邊商品，甚至連地下偶像團隊嘅產品都有。
▼好多都好有歷史嘅痕跡，夠晒經典。不過時間許可，建議都可以同場格下價。因為同款嘅明星商品，兩間舖頭差價可以去到200円。
▼如果身邊女朋友對動漫同明星都無興趣咁點算好？唔駛驚，因為中野百老匯入面同相連嘅商店街其實都有唔同嘅零食，藥妝同服妝店！咁你就可以安心同女友分開行動，各自各精彩啦！（話唔定佢買得比你更開心
）
）
後記：對比起秋葉原，可能佢店舖規模或者數量唔算多，但係勝在夠集中。你想要嘅基本上都滿足到你！不過呢度係賣中古品較多，如果想買新品就可以選擇去番秋葉原啦！商場周邊亦都有好多唔同嘅食肆，我地行完之後就去咗一間比較特別嘅居酒屋。呢個就留待之後寫blog介紹啦！如果你係動漫或者明星發燒友，呢度起碼可以行番兩個鐘或以上。就好似新東方不敗咁，淨係揀要邊個錦戶亮好，都諗咗好一陣子。加上地理位置方便，都值得大家過嚟呢邊逛一逛呀！
【中野百老匯】
地址：5-52-15 Nakano, Tokyo 164-0001日本
時間：12:00－20:00
電話：3-3388-7004
About Post Author
